پاکستان دہشت گردی نا برخلاف جنگ اٹی اہم ئُ سرسہبی دوئی کرے، ملک اٹی سیکورٹی حالیت آتیٹی گچینی نا سوب ترند تر اقتصادی ودیکی ممکن مس
اسلام آباد۔ 28 اگست (اے پی پی) امریکہ ٹی پاکستان نا سفیر اعزاز احمد چوہدری پارینے کہ پاکستان دہشت گردی نا برخلاف جنگ اٹی اہم ئُ سرسہبی دوئی کرینے و ملک اٹی سیکورٹی حالیت آتیٹی گچینی نا سوب ترند تر اقتصادی ودیکی ممکن مننگ کرینے۔ اوداہیت ئِ ورجینیاءنا بل رن پارک اٹی 31می سالانہ پاکستان فیسٹیول نا ساڑی مروک آتیان تران کرساپارے۔ فیسٹیول اٹی امریکہ ٹی رہینگوک آ پاکستانی کمیونٹی نا باسک آک جم و جوش اٹ بشخ ہلکر۔ پاکستانی سفیر پارے کہ امن و ایمنی نا حالیت آتیٹی گچینی و حکومتی گام گیج آتیٹی مچ آ دنیا نا زرکارآتا پت بحال مسنے، اینو پاکستان اٹی زرکاری نا بابت پبی وارخواہی دوئی ئِ و ملک اٹی زرکاری کن سازگار چاگڑد نا فراوانی ئِ المی جوڑ کننگانے۔ اعزاز احمد چوہدری پارے کہ چندی بشخ آتیٹی گچینی و اصلاحات ناعمل جاری ئِ ہرانا سوب ریاست نا پوسکن آ و حرکیت پذیر کچ اٹی ودکی مس، داڑتون اوار اوار راجی و اقتصادی ودیکی نا وارخواہی ہم ودنگ ئِ۔ اوملک انا 70 می یوم آزادی اڈتروک آ پاکستانی تے مبارکبادی تس و پارے کہ ننے بطور قوم 70 سال اٹی ملوک آ سرسہبی تیا بجاوڑاٹ فخر کننگ ناحق دوئی ئِ۔ پاکستانی سفیر قیام پاکستان نا ساڑی آ ویل آتا سرجمی اٹ ذکر ئِ کرے و پارے کہ آجوئی نا وخت اقتصادی سلامتی نا چیلنج آک ئسرولے پاکستان دا مشکل و چیلنج آتا مردی اٹ مقابلہ ئِ کرے، اینو پاکستان اقوام عالم اٹی سوگو، پرعزم و وت واجہ ملک اسے نا دروشم اٹ سلوک ئِ۔ اودااومیت نا درشانی ئِ کرے کہ چین پاکستان اقتصادی راہداری و علاقائی رابطہ غاتا رداٹ ایلو ڈٹ آتا پوروی آن پاکستان ئِ بابائے قوم نا وژن نا رداٹ اسہ پوسکن ئُ و شونہال ئُ ریاست اس جوڑ کننگ نا مزل دوئی کننگک۔ اوامریکہ ٹی رہینگوک آ پاکستانی کمیونٹی نا ورناتے امریکی سیاست اٹی سرگرمی اٹ بشخ ہلنگ نا پارت کرے وپارے کہ داڑآن او تینا کمیونٹی و پاکستان نا بابت گچینی نا معاملہ غاتیٹی زیات گچین و کلیدی کڑد ادا کننگ کیرہ۔ اوپاکستان فیسٹیول نا اڈتننگ نا خیرمقدم ئِ کرے وپارے کہ دادود امریکہ ٹی سویلی ایشیاءنا بابت اسہ نمان و موثر دود اسے نا اہمیت اختیار کرینے و داڑآن امریکہ ٹی رہینگوک پاکستانی برادری نا تینا ملک اتون مابت و عقیدت نا جوانی اٹ درشانی مریک۔ او فیسٹیول نا سرسہب اڈتننگ آ فیسٹیول نا کمیٹی نا کوشست آتا ستائِ کرے۔
