اسلام آباد۔ 28 اگست (اے پی پی) وزیراعظم شاہد خاقان عباسی پارینے کہ الس نا ویل آتا ایسری کن گچین مروک آ نمائندہ غاک تینا کڑدئِ گچین وڑاٹ اداکیر وخت اس کہ جاری شونداری ڈٹ آتا زوت آن زوت اس پوروی ئِ المی جوڑ کننگے۔ اوداہیت ئِ راولپنڈی ڈویژن آن تعلق تخوک آ مسلم لیگ (ن) نا قومی اسمبلی نا باسک آتا ڈل اتون ہیت وگپ کرسا پارے ہرادوشنبے نا داڑے اوڑتون اوڑدہی کریر۔ وزیراعظم آفس نا کنڈآن جاری بیان نا رداٹ قومی اسمبلی نا باسک آک وزیراعظم ئِ تینا حلقہ غاتا شونداری و السی شرحالی ڈٹ آتا بارواٹ معلومدار کریر۔ اوڑدہی کروک آڈل اٹی قومی اسمبلی نا باسک ملک ابراراحمد، ملک اعتبارخان، سردار ممتاز خان، چوہدری خادم حسین، نوابزادہ راجہ مطلوب مہدی، اسفن یاربھنڈار، مسز طاہرہ اورنگزیب ، نگہت پروین، مسز آسیہ ناز تنولی ، مسز سیما محی الدین جمیلی ، مسز فرحانہ قمر، مسز عفت لیاقت و مسز زہرہ ودود فاطمی اوار ئسر۔ داوخت آ وزیرپارلیمانی امور شیخ آفتاب احمد و سینئر کمامدارآک ہم ساڑی ئسر۔
