اسلام آباد۔ 26 اگست (اے پی پی) وزارت خزانہ تدوک آ دے درملکی وام تیٹی 18 ارب ڈالر ودکی نابابت میڈیا رپورٹ آتے مسترد کرسا اوفتے گمراہ کن و حقیقت نا منافی گوندانے۔ وزارت خزانہ نا ترجمان دا میڈیا رپورٹ آتا تردید ئِ کرینے کہ وزارت خزانہ سینیٹ نا قائمہ کمیٹی خزانہ ئِ درملکی وام تیٹی حکومت نا کنڈآن 18 ارب ڈالر ودکی نا معاملہ غا بریفنگ تننگ آن کترا و اختہ مننگ نا بہانہ ئِ کننگ ئِ۔ ترجمان صفا کرے کہ قائمہ کمیٹی ملک اٹی پارلیمانی جمہوری نظام نا المی ئُ بشخ اسے۔ خزانہ ، ریونیو، اقتصادی امور، شماریات و نجکاری نا بابت سینیٹ نا قائمہ کمیٹی نا شمار غٹ آن زیات فعال کمیٹی تیٹی مریک۔ و قومی اقتصادی امور نا بابت راہشونی تننگ اٹی متحرک کڑد ادا کننگ ئِ۔ ولے ترجمان صفا کرے کہ سینیٹ نا قائمہ کمیٹی نا دیوان بے کچ گونڈ ئُ نوٹس اسے آ بٹنگ انگا ہرانا سوب وزارت خزانہ دامعاملہ غا بریفنگ تننگ کتو۔ ترجمان است ہسونی نا درشانی ئِ کرساپارے کہ اسہ انگریزی اخبار اس معاملہ ئِ بھاز بھلو معاملہ اس جوڑ کننگ و وزارت خزانہ و کمیٹی نا نیام اٹ قائم خوشگوار ورکنگ تعلقداری تے خراب کننگ نا کوشست کرینے۔
