ہنزہ۔ 26 اگست (اے پی پی) صدر مملکت ممنون حسین گلگت بلتستان نا ورناطالب علم آتیا زور شاغانے کہ او پوسکن انگا علم آن تینے آراستہ کرسا داقوم اکن غٹ لائخی تے کاریم اٹ اتسا خذمت کیر، ڈیہہ نا بہادر الس نا غیر معمولی کارنامہ غاتا اولیکو مظاہرہ عظیم شاہراہ ریشم نا جوڑجاڑ نا دروشم اٹی مون آ بس، الس شاہراہ ریشم آمبار بیرہ اقتصادی راہداری نا رکھ ئِ کرسا داڑآن پبی فائدہ ہرفسا گلگت بلتستان نا شونداری و شونہالی کن ہم تینا کڑد ئِ اداکیر، کنے گلگت بلتستان نا خلقت نا لائخی و عزم و حوصلہ غا بھروسہ ئِ۔ داخیال آتا درشانی ئِ او ہفتہ نا دے قراقرم انٹرنیشنل یونیورسٹی ہنزہ کیمپس نا بنائی دودآن تران کرسا کرے۔ داوخت آ گورنر گلگت بلتستان غضنفر علی خان، قراقرم یونیورسٹی نا قائم مقام وائس چانسلر ڈاکٹر خلیل احمد، استاد و طالب علم آتا بھلو کچ اس ہم ساڑی ئس۔ صدر مملکت پارے کہ منہ سال مست نن اسہ تغ اس خناسن ہرانا ہنزہ کیمپس نا دروشم اٹی زیبا انگا تعبیر ننا خن تا مون آٹی ئِ۔ کنا دعا ئِ کہ قراقرم یونیورسٹی نا ہنزہ کیمپس بروک آ دے تیٹی پین شون ہلیک ، ای سمجھیوہ کہ نیک انا کاریم اسے ٹی ہربابت شرکت و کمکاری صدقہ جاریہ نا اسہ دروشم اسے۔
