اسلام آباد۔ 24 اگست (اے پی پی) وزیراعظم شاہد خاقان عباسی تون اردن نا سلہہ بند فوج انا چیئرمین جوائنٹ چیفس آف اسٹاف لیفٹیننٹ جنرل محمود اے فراحت پنچ شنبے نادے داڑے اسلام آباد اٹی اوڑدہی کرے۔ داوخت آ وزیراعظم پارے کہ پاکستان و اردن علاقائی و جہانی معاملہ غاتیا اسہ وڑنا موقف تخرہ۔ ہڑتوم آ ملک آتا شون پسند نقطہ نظر تون دنیا نا امن و سوگوی اتون اسیجائی فائدہ غاک وابستہ ئُ۔ اوپارے کہ پاکستان اردن تون تینا تعلقداری تے بھاز اہمیت ایتک۔ نن ہڑتوم آ ملک آتا نیام اٹ تعلقداری تے پین سوگوجوڑ کننگ خوانہ۔ وزیراعظم شاہد خاقان عباسی لیفٹیننٹ جنرل محمود اے فراحت نا پاکستان آ بننگ آ اودے بخیر اٹ پارسا شاہ عبداللہ دوم کن نیک است خواہی تا درشانی ئِ کرے و پارے کہ اونا دانشمندانہ سروکی ٹی اردن نا الس چندی بشخ آتیٹی شون ہلکونے۔ داوخت آ لیفٹیننٹ جنرل محمود اے فراحت جم و جوش اٹ بخیر کننگ آ وزیراعظم نا منت واری ئِ ادا کرے و اردن و پاکستان نا نیام اٹ ہڑتوم آ کنڈآتا کمکاری ئِ پین سوگو جوڑ کننگ نا خواہش نا درشانی ئِ کرے۔ اوڑدہی ٹی وزیردفاع انجینئر خرم دستگیر خان ، اردن نا سفیر نواف خلیفہ و سینئر سرکاری کمامدارآک ہم ساڑی ئسر۔
