پاکستان نا تینا وت واجہی و علاقائی سالمیت نا رکھ انا پکا عزم انا اعادہ، پاکستان نا برخلاف خاص انگا دوبہ غاک مسترد
نن پاکستان اٹی دہشت گردی ئِ تہو تننگ نا زموارآتون اوار اوغان گل زمین آ دہشت گرد و شرپسند آتا پناہ گاہ تا چٹفنگ کن گچین و دمدستی امریکی عسکری کوشست آتا خواہندار اُن ، قومی سلامتی کمیٹی
اسلام آباد۔ 24 اگست (اے پی پی) پاکستان تینا وت واجہی و علاقائی سالمیت نا رکھ انا پکا عزم انا اعادہ ئِ کرسا پاکستان نا برخلاف خاص انگا دوبہ غاتے یکسر مسترد کرے و داہیت آ زورشاغا کہ نن پاکستان اٹی دہشت گردی ئِ تہوتننگ نا زموار آتون اوار اوغان گل زمین آ دہشت گرد و شرپسند آتا پناہ گاہ تا چٹفنگ کن گچین و دمدستی امریکی عسکری کوشست آتا خواہندار اُن، اوغان جنگ پاکستان اٹی کننگ مفک، پاکستان اوغانستان و گیشتر ڈیہہ ٹی امن و سوگوی نا مشترکہ مسخت آتا دوئی کن جہانی برادری ئِ ہروڑکمک فراوان کرسا کیک۔ داہیت انا درشانی ئِ قومی سلامتی کمیٹی نا دیوان اٹی کننگا ہرا پنچ شنبے نادے وزیراعظم شاہد خاقان عباسی نا کماشی ٹی اڈ ہلک۔ دیوان اٹی ٹرمپ انتظامیہ نا سویلی ایشیاءحکمت عملی آ سجفنگا۔ جاری بیان نا رداٹ کمیٹی پاکستان نا برخلاف خاص انگا دوبہ غاتے یکسر مسترد کرے۔ داہیت ئِ نوشتہ کننگاکہ پاکستان ئِ قربانی نا اِیٹ اس جوڑ کننگ آن اوغانستان اٹی سوگوی ودی کننگ اٹی کمک رسینگپک ، درحقیقت اوغانستان نا خڑکی ہمسایہ مننگ نا ناطہ پاکستان نا اوغانستان نا امن و سوگوی ٹی مفاد وابستہ ئِ۔ کمیٹی پارے کہ پاکستان ئِ اوغانستان اٹی متکن آ جھیڑہ آن بھلو نسخان اس ہرفوئی تما ہراٹی داے بھلو کچ اسے ٹی باہوٹ آتا باریم ئِ ہرفوئی تما، منشیات و سلہہ غاتا نقل و حمل مس و ساڑی ہی ٹی دے ٹکی اوغانستان ، ہراکان پاکستان مخالف دہشت گرد گروہ کارروائی و پاکستان نا تہٹی جلہو کیرہ، ٹی دہشت گرد آتا رکھوک ٹھکانہ غاتا دروشم اٹی بے وڑ زہمی مسنے۔ دااسہ حقیقت اسے کہ اوغانستان نا تہٹی پیچیدہ ویل و داخلی حرکیات نئے بیرہ پاکستان بلکن گیشتر ڈیہہ و جہانی برادری کن سنگین ئُ چیلنج لاحق کیک۔ اوغانستان نا بھاریم ئِ تخنگ و ہموڑے حکمرانی نا بیدس وسیع علاقہ غاتے پدی ہلنگ نا امریکی عزم ئِ نوٹ کرسا کمیٹی پارے کہ پاکستان اسہ سوگو و پرامن اوغانستان کن غٹ جہانی کوشست آتا مدام مخ تفی ئِ کرینے و او اوغانستان اٹی بنداوی ڈھانچہ و راجی شونداری کن اسہ ارب ڈالر آن زیات وقف کرے۔ کمیٹی پارے کہ برس ہابرس آن پاکستان سیاسی مذاکراتی ایسری نا کمک اٹ امن نا مون آ دننگ کن امریکہ و اوغانستان ہڑتوم آتون اواری اٹ کاریم کرینے ہرا پاکستان نا نکتہ نظر آن جنگ آن تباہ حال داملک اٹی سوگوی ودی کننگ کن گچین ئُ کسر اسے۔ بیان اٹی پاننگانے کہ اوغانستان اٹی مریس عسکری مہم اٹی بھس کاری مس و ہزار آ اوغان شاریک خلنگار۔ پاکستان اوغان الس و اوغان سروکی ٹی امن کن گام گیج آتا ہم تائید و مخ تفی ئِ کرینے۔ بیان نا رداٹ پاکستان اومیت تخک کہ اوغانستان ئِ سوگو کننگ کن اختیار کروک آ ہر حکمت علی دا متکن آ جھیڑہ نا چٹفنگ اٹی سرسہب مریک و ملک اٹی من نا دوربناءکیک ہراڑآن پاکستان اٹی رہینگوک لکھ آ اوغان باہوٹ آتا باوقار پدی ہِننگ نا کسر ہموار مریک ہراڑکن نن ہروڑنا کمک فراوان کننگ کن تیار اُن۔ بیان اٹی داہیت آ زور شاغنگاکہ خاص کر نن اوغان گل زمین آ پاکستان اٹی دہشت گردی ئِ تہو تننگ نا زموار آتون اوار دہشت گرد و شرپسند آتا پناہ گاہ تا چٹفنگ کن گچین و دمدستی امریکی عسکری کوشست آتے ہُننگ نا خواہندار اُن، اوغان جنگ پاکستان اٹی کننگ مفک۔ قومی سلامتی کمیٹی پارے کہ تینا کنڈ آپاکستان غٹ دہشت گرد نیٹ ورک آتا برخلاف بے پرخ کارروائی کرینے و داجنگ اٹی ہزار آ سپاہی و شاریک قربانی تسر۔ پاکستان نا تہٹی سیکورٹی نا گچین حالیت مسنے ہرا دہشت گرد آتا غٹ ٹھکانہ غاتا چٹفنگ آن بیدس ممکن متوکہ، دہشت گردی نا اسیجائی دشمن نا برخلاف مستین اٹی امریکہ تون سرسہب کمک و دالعنت نا چٹفنگ کن پاکستان نا غیر متزلزل عزم انا عکاسی ئِ کیک۔ دیوان اٹی وزیر دفاع انجینئر خرم دستگیر ، وزیر خزانہ محمد اسحاق ڈار ، وزیر خارجہ خواجہ محمد آصف ، وزیر داخلہ احسن اقبال ، چیئرمین جوائنٹ چیفس آف اسٹاف کمیٹی جنرل زبیر محمود حیات، چیف آف آرمی اسٹاف جنرل قمر جاوید باجوہ ، چیف آف نیول اسٹاف ایڈمرل محمد ذکاءاللہ ، چیف آف ایئر اسٹاف ایئر مارشل سہیل امان ، قومی سلامتی سلاہکار لیفٹیننٹ جنرل (ر) ناصر خان جنجوعہ ، ڈائریکٹر جنرل آئی ایس آئی لیفٹیننٹ جنرل نوید مختار و سینئر سول و عسکری کمامدارآک ساڑی ئسر۔
