دے ٹک نیامی ٹی امن و سوگوی کن پاکستان مسلم امہ نا اومیت آتیا پورو سلک، شام و یمن نا ویل آ غیر جانبداری نا پالیسی آ سلوک اُن، اردن تون دفاع تون اوار غٹ بشخ آتیٹی کمک برجاسلک
اسلام آباد۔ 23 اگست (اے پی پی) صدر مملکت ممنون حسین پارینے کہ دے ٹک نیامی ٹی امن و سوگوی کن پاکستان مسلم امہ نا اومیت آتیا پورو سلک ۔ اوداہیت ئِ اردن نا چیئرمین جوائنٹ چیف آف اسٹاف لیفٹیننٹ جنرل محمود فرحت تون اوڑدہی ٹی پارے ہرا چارشنبے نادے ایوان صدر اٹی اوڑتون اوڑدہی کرے۔صدر مملکت شام انا حالیت آتیا است ہسونی نا درشانی ئِ کرے و پارے کہ شام انا تشویشناک حالیت آتیان مسلم امہ نا یکجہتی و سیوت زہمی مننگ ئِ۔ اوپارے کہ پاکستان شام و یمن نا ویل آ غیر جانبداری نا پالیسی آ پورووڑاٹ سلوک ئِ ۔ اومستی پارے کہ پاکستان پرامن و شونہال اوغانستان اسے نا خواہندار ئِ و ڈیہہ ٹی امن خواہک ولے کشمیر نا ویل انا ایسری اسکان سویلی ایشیاءٹی دیرپاامن ممکن اف۔ صدر مملکت داوخت آ چندی بشخ آتیٹی کمکاری ئِ ودفنگ آ زورشاغا و اردن نا ورناانگا افسر آتے پاکستان اٹی تربیتی ادارہ غاتیٹی تربیت نا ہم پیش کش کرے۔ صدر مملکت پارے کہ پاکستان و اردن نا نیام اٹ دفاع تون اوار غٹ بشخ آتیٹی کمکاری برجاسلک۔ اوپارے کہ پاکستان اردن تون تینا تعلقداری تے بھاز اہمیت ایتک و پاک۔ اردن دفاعی کمکاری تین پہ تینی فائدہ و جہانی امن کن ئِ۔ صدر ممنون حسین شاہ عبداللہ دوئم کن ہم نیک است خواہی تا درشانی ئِ کرے و اونا متحرک سروکی نا ستائِ کرے ہرانا سوب اردن ذکر انا قابل شون ہلک۔ اردن نا چیئرمین جوائنٹ چیف آف اسٹاف لیفٹیننٹ جنرل محمود فرحت پارے کہ اردن نا الس پاکستان تون مہرو مابت کیرہ و پاکستانی فوج بھاز پروفیشنل و دلیر ئُ۔ صدر مملکت اردن نا چیئرمین جوائنٹ آف اسٹاف ئِ نشانِ امتیاز ملٹری اس ہم تس۔ دود اٹی بڑزکو سول و فوجی کمامدارآک ساڑی ئسر۔
