کشمیری الس نا سیاسی ، سفارتی و اخلاقی مخ تفی ننا دتراٹی اوار ئِ
اسلام آباد۔ 23 اگست (اے پی پی) وزیراعظم شاہد خاقان عباسی پارینے کہ کشمیری الس نا سیاسی ، سفارتی و اخلاقی مخ تفی ننا دتراٹی اوار ئِ، مشعل آزادی نا روشنائی کشمیر نا سہب انا آجوئی نا نوید جوڑ مریک و تقسیم ہند انا بے پورو ایجنڈا تینا پوروی آ سرمریک۔ اوداہیت ئِ چارشنبے نادے ”یوم نیلابٹ“ نا وخت آ تینا اسہ کلہو اسے ٹی پارے۔ اوپارے کہ کشمیر اٹی گدرینگوک آ اسہ سال نا واقعہ غاک داہیت انا ناقابل تردید شہادت آک ئُ کہ کشمیر نا تحریک آزادی سد درسد ہندی و غیر سلہہ بند ئِ ہرادے ریاستی دہشت گردی نا مون تروکی ئِ۔ وزیراعظم پارے کہ ہراوخت اسکان دنیا انصاف و حق خودارادیت کون آ تسلیم شدہ حق ئِ گوجالسا تینا اخلاقی زمواری تیان مون ئِ ہڑسسا کیک سویلی ایشیا ٹی امن نا تغ پورو مفننگ کپک ۔ اوپارے کہ پاکستان نا ریاست و الس دابارواٹی یک زبان ئُ کہ اہل کشمیر نا سیاسی، سفارتی و اخلاقی مخ تفی ننا دتراٹی ئِ۔ اوپارے کہ پاکستان نا 70 سالہ تاریخ اٹی اسہ وخت اس ہم دُن ئُ بتنے کہ پاکستانی قوم کشمیری تا دانصرت و تائید ئِ تینا اولیت آتیٹی اوار تخپروئے۔ وزیراعظم ”یوم نیلابٹ“ نا وخت آ پاکستانی قوم انا دا غیر متزلزل عزم انا تجدید ئِ کرسا پارے کہ او اہل کشمیر ئِ داکلہو ئِ تننگ خوارہ کہ سردار عبدالقیوم خان ایماندار کون آشخصیت آک آجوئی نا ہرامشعل ئِ روشناکریسر اونا روشنائی مچ آ برصغیر اٹی تالان مسنے۔ اوپارے کہ تاریخ نا پہیہ ئِ پدی پیری تننگ مفک، داروشنائی انشاءاللہ کشمیر نا سہب انا آجوئی نا نوید جوڑ مریک و تقسیم ہند انا بے پورو ایجنڈا تینا پوروی آ سرمریک۔
