اسلام آباد۔23اگست(اے پی پی) ملک ئِ صدر ممنون حسین ئَ گشتگ کہ مشرق وسطیٰ ئَ امنءُ ایمنی ءُ مھکمی ئِ ھاترئَ پاکستان مسلم اُمہ ئِ اُمیتاں پیلو کنت۔ آئیئَ اے گپ اردن ئِ چیئرمین جوائنٹ چیف آف سٹاف لیفٹیننٹ جنرل محمود فرحت ئَ گوں گندءُ نند ئِ تہا گشتگ کہ آھاں چا رشمبے ئِ روچئَ ایوان صدر ئَ گندءُ نند کت گ۔ ملک ئِ صدرئَ شام ئِ جاورھال ئِ سرئَ اپسوز ئِ درشانی کتگءُ گشتگ کہ شام ئِ جاورھال ئِ سرئَ مسلم امہ ئِ یکوئی آماچ بوھگئَ اِنت۔ آئیئَ گشتگ کہ پاکستان شام ءُ یمنئِ جیڑھئِ سرئَ دربازی ئِ پالیسی ئِ منوک اِنت ۔ آئی ئَ گیش گشتگ کہ پاکستان امنءُ ایمنیں ءُ وشھالیں اوگانستانئِ منوک اِنت ءُ خطہ ئِ تہا امنءُ ایمنی لوٹ اِیت بلے تاں کشمیر ئِ جیڑھئِ گیشءُ گیواریئَ جنوبی ایشیا ئِ تہا امن ءُ ایمنی بوت نہ کنت۔ صدر ممنون حسین ئَ شاہ عبداللہ دوئم ئِ ھاترئَ ھم نیکیں واھشتانی درشانی کتگءُ آئیئِ سروکی ساڑاتگ کہ ایشی ئِ برکتئَ اردن ئَ دیمروئی کتگ۔ اردن ئِ چیئرمین جوائنٹ چیف آف سٹاف لیفٹیننٹ جنرل محمود فرحت ئَ گشتگ کہ اردن ئِ اُلس پاکستان ئِ گوما مہرءُ واھگ دار اَنت ءُ پاکستانی فوج سک باز پروفیشنل ءُ مزن دل اَنت۔ صدر ئَ اُردن ئِ چیئرمین جوائنٹ آف سٹاف ئَ را نشان امتیاز ملٹری ئِ دادھم داتگ۔ مراگشئِ تہا اعلیٰ سول ءُ فوجی حکام ھم ھوار بوتگ اَنت۔
