دہشت گردی نا برخلاف ننا عزم امن کن ئِ
پاکستان ڈیہہ ٹی امن کن ہمسایہ غاتون اواری اٹ تینا کڑد ئِ ادا کرسا کیک
اسلام آباد۔ 23 اگست (اے پی پی) وزیر داخلہ احسن اقبال پارینے کہ کانود غٹ اکن اسہ وڑئِ ، ملک انا وزیراعظم عدالت آتون مون تننگ و سزا وار مننگ کیک تو آئین ئِ پرغنگ و ملک ئِ خاخر و خون اٹی بٹوک آتے ہم بایدے عدالت آتون مون تروئی مرے، پاکستان ڈیہہ ٹی امن کن ہمسایہ غاتون اواری اٹ تینا کڑدئِ ادا کرسا کیک۔ دہشت گردی ئِ باتننگ کن اشتراک و کمکاری نا گرج ئِ۔ نادرانا دنگ ئِ ودفنگک و آسراتی تیٹی ودکی کننگک۔ چارشنبے نا دے بلیو ایریا ٹی نادرا نا میگا سروس سنٹر نا دورہ نا وخت آ ذرائع ابلاغ نا نمائندہ غاتون ہیت وگپ کرسا وزیر داخلہ پارے کہ نادرا نا سروس سینٹر نا دورہ نا مسخت نادرانا کنڈآن شاری تے تروک آ آسراتی تا جاچ ئِ ہلنگ نا ئِ۔ اوپارے کہ نادرا اسہ مایہ ناز ئُ ادارہ اسے ، 1998ءٹی ننا حکومت وژن 2010 ءنا رداٹ داادارہ نا بنداو ئِ تخاسس۔ داسہ دنیا ٹی دا ڈیٹابیس نا اسہ لچنڈ ئُ ادارہ اس جوڑ مسنے۔ اوپارے کہ پاکستان نا دا ڈیٹابیس پنی ئُ حیثیت اس تخک و چندی سروس آتا فراوانی کن اسہ پلیٹ فارم اس جوڑ مسنے۔ اوپارے کہ نادرا نا دفتر و موبائل وین تا کچ ئِ ودفنگ نا پارت کرینے تانکہ ملک انا غٹ علاقہ غاتا الس نادرانا آسراتی تیان فائدہ ہرفنگ کیر۔ اوپارے کہ 70موبائل وین تا دمدستی دستیابی ئِ المی جوڑ کننگک و شاری تے اوفتا اُرانا خڑک پاسپورٹ و شناختی کارڈ زانا فراوانی ئِ المی جوڑ کینہ۔ آن لائن نظام نا بناءآن شاریک خاص کر پیشن نا ملک پاکستانی تے بھاز آسراتی ملانے ، ویزہ غاتے ہم آن لائن جاری کننگک و اونا دنگ ئِ ودفنگک ، ہروڑنا جلعسازی نا توننگ کن گام گیج آتے ودفنگ انگ ئِ ، کسٹمرز فیڈ بیک نا نظام ئِ گچین جوڑ کننگک۔ پرویز مشرف نا پیشن نا ملک ہِننگ نا بابت سوج اسے نا ورندی ٹی وزیر داخلہ پارے کہ کانود غٹ اکن بایدے اسہ وڑمرے، ملک انا وزیراعظم عدالت آتون مون تننگ کیک و سزا وار مننگ کیک تو آئین ئِ پرغنگ و ملک ئِ خاخر و خون اٹی بٹوک آتے ہم عدالت آتون بایدے مون تروئی مرے۔ پوسکن آ امریکی پالیسی نا بابت اسہ سوج اسے نا ورندی ٹی وزیر داخلہ پارے کہ وزارت خارجہ دا معاملہ غا پاکستان نا موقف ئِ بیان کرینے، پاکستان آن زیات دہشت گردی نا برخلاف اسہ ملک اس ہم قربانی تسنے نئے اوفتا خذمت آک ئُ، نن دہشت گرد آتا غٹ آن بھلا نشانہ اُن، پاکستان دہشت گردی نا برخلاف ہراسرسہبی تے دوئی کرینے اوفتا مثال ملیپک۔ دہشت گردی نا برخلاف ننا عزم کس اسے خوش کننگ یا ناراض کننگ نا بابت اف بلکن امن کن ئِ، نن مچ آ دنیا ٹی امن نا خواہندار اُن ، شونہال آخبت کن بیرہ سیم تیا آخا بلکن ڈیہہ ٹی ہم امن مرے، ہمسایہ ملک آتون اواری اٹ ڈیہہ ٹی امن کن تینا کڑدئِ ادا کننگ آ یخین تخنہ و پاکستان تینا دا کڑد ئِ ادا کرسا کیک۔ اوپارے کہ ڈیہہ نا ملک آتے اواری اٹ دہشت گردی نا برخلاف بایدے کاریم کروئی مرے۔ دہشت گرد آک غٹ انا دشمنک ئُ و دہشت گردی ئِ باتننگ کن اشتراک و کمکاری نا گرج ئِ و جہانی و ہندی کہول آ نن تینا کڑد ئِ ادا کرسا کینہ۔
