ورلڈ اکنامک فورم ءِ کارندہ سادیہ زاہدی ءَ مزن وزیر شہباز شریف ءَ گوں گند ءُ نند کتگ، پاکستان ءِ جوانیں اقتصادی رپک، اصلاحات ءِ کوشست آنی ستا

اسلام آباد۔30جولائی  (اے پی پی):جہانی اقتصادی فورم ءِ منیجنگ ڈائریکٹر ءُ منیجنگ بورڈ ءِ باسک سعدیہ زاہدی ءَ مزن وزیر محمد شہباز شریف ءَ گوں گند ءُ نند کت۔ گند ءُ نند ءِ ساھت ءَ مزن وزیر ءَ ورلڈ اکنامک فورم ءِ گوما پاکستان ءِ مھکمیں ءُ دیریں شریکداری ءِ یک رند ءَ پدا گوشت ءُ سوئٹزرلینڈ ءِ شہر ڈیووس ءَ وتی سالانہ گند ءُ نند آنی وسیلگ ءَ ڈبلیو ایف ءِ پاکستان ءِ گوما برجاھیں سیادی ءَ را ساڑات۔ مزن وزیر شہباز شریف ءَسعدیہ زاہدی ءَ گوستگیں لستیں سال آنی تہ ءَ پاکستان ئِ تہ ءَ مزنیں اقتصادی برجائی ئِ بابت ءَ سرپد کت۔ مزن وزیر محمد شہباز شریف ءَ ڈبلیو ایف ءِ گوما ھاسیں رنگ ءَ اقتصادی دیمروئی، صنفی شمولیت، پیشہ وارانہ تربیت ءُ ڈیجیٹلائزیشن ءِ شوبگ آنی تہ ءَ وتی کمک ءَ را گیش مھکم کنگ ءِ واستہ پاکستان ءِ سک باز واھشت ءِ درشان کت۔ ورلڈ اکنامک فورم ءِ منیجنگ ڈائریکٹر ءَ ھم اے معاملہ ءَ دلگوشی ءِ درشانی کتگ۔ سادیہ زاہدی ءَ مزن وزیر ءِ تر ءُ تاب ءِ وھد ءَ جوانیں وش اتک کنگ ءِ پد ءَ مزن وزیر ءِ شگر ءُ منت گپت۔ آئی ءَ پاکستان ءِ جوانیں اقتصادی رپک ءُ مزن وزیر شہباز شریف ءِ سروکی ءَ استیں حکومت ءِ نیمگ ءَ کتگیں اصلاحات ءِ کوشست آناں ساڑات۔ گند ءُ نند ءِ گڈ ءَ دوئیں نیمگاں برجمیں دیمروئی ءِ ھاترا پاکستان ءُ ورلڈ اکنامک فورم ءِ نیام ءَ شریکداری ءَ را مھکم کنگ ءِ وتی یکجائی ءِ عزم ءِ پدر کنگ بوت۔