توانائی ءِ وفاقی وزیر اویس   خان لغاری ءَ ڈائریکٹر آل چائنہ فیڈریشن آف انڈسٹری اینڈ کامرس ءِ سروکی ءَ چینی کاروباری ڈل ءَ گوں گند ءُ نند کتگ

اسلام آباد۔30جولائی  (اے پی پی):وزارت توانائی ءَ وفاقی وزیر ءِ توانائی سردار اویس احمد خان لغاری ءَ گوں چینی کاروباری ڈل ءَ ڈائریکٹر آل چائنہ فیڈریشن آف انڈسٹری اینڈ کامرس یی جیانگ ءِ سروکی ءَ گند ءُ نند کت۔ گند ءُ نند ءَ پاکستان ءَ سرمایہ کاری، چینی صنعت آناں پاکستان ءَ جاگہ کنگ، ٹیکنالوجی ءِ ٹرانسفر ءُ توان ءِ شوبگ ءَ بوت کنوکیں کمک ءِ بابت ءَ سرجمی ءَ گپ ءُ تران کنگ بوت۔ چار شمبے ءِ روچ ءَ وزارت توانائی (پاور ڈویژن) ءِ نیمگ ءَ جاڑی بوتگیں بیان ءِ رد ءَ چینی ڈل ءَ وفاقی وزیر ءَ را سرپدی داتگ کہ چین ءِ نجی کاروباری کمیونٹی ءِ نمائندہ تنظیم اے سی ایف آئی سی نوں کاروباری موہ آنی شوھازگ ءُ 155 شریکیں ملک آنی تہ ءَ شریکداری ءِ جوڑ کنگ ءِ تہ ءَ سرگرم اِنت۔ ڈل ءَ گوشت کہ آ چینی صنعت آنی پاکستان ءَ جاہ منند کنگ، بنجاھی کاروباری براتی ءِ گوما ھوار بوھگ ءُ ٹیکنالوجی ءِ ٹرانسفر ءِ وڑیں ھاسیں گامگیج آنی واستہ عملی منصوبگ آنی گوما اتکگ اَنت۔ ڈل ءَ الیکٹرک گاڑی، چارجنگ اسٹیشن، شمسی پیداوار ءُ لتیم اسٹوریج ءَ ھوار توانائی ءَ گوں سیادی داروکیں صنعت آنی تہ ءَ ھاسیں دلچسپی ءِ درشانی کتگ۔ ماتیاری لائن منصوبگ ءَ را کامیابیں ماڈل ءِ رنگ ءَ ساڑہ کنان ءَ ڈل ءَ گوشت کہ پاکستان ءَ سرمایہ کاری ءَ چہ نہ ایوک ءَ بنجاہی بلکینگ ءَ دمگی لوٹ آناں پیلو کنگ بوت کنت۔ کریپٹو کان کنی ءِ ھوالگ ءَ ڈل ءَ اے گپ ءَ را راجی گرڈ ءَ لچک پیداک کنگ ءِ یک ممکنہ وسیلہ ءِ رنگ ءَ لیک اتگ۔ اے موہ ءِ سر ءَ بجلی ءِ وفاقی وزیر سردار اویس لیگاری ءَ ڈل ءَ را وش اتک کت ءُ گوشت کہ پاکستان ءِ حکومت صنعتی کمک ءُ ٹیکنالوجی ءِ مٹ ءُ بدلی ءِ واستہ ھمک رنگ ءِ آسراتی پجاری کنگ ءَ تیار اِنت۔ آئی ءَ اے گپ ءِ پدرائی کت کہ استیں مالیاتی جاور ھال آنی تہ ءَ حکومت سبسڈی ءِ سر ءَ ھچ وڑیں صنعت ءَ را بجلی ءِ پھجارینگ ءِ وس ءَ نہ کنت۔ آئی ءَ ڈل ءَ را گوشت کہ اگاں مجوزہ تجویز ءِ ھوالگ ءَ ھچ وڑیں ماڈل است کہ ایشی ءِ تہ ءَ حکومت ءَ را سبسڈی دیگ ءِ ضلورت نہ اِنت گڈا آ سرجمیں اعداد و شمار ءُ تفصیل آنی گوما پیش بہ کن اَنت۔ آئی ءَ اے ھم گوشت کہ حکومت ھما ھما تجویز آنی سر ءَ چار ءُ تپاسی کنت کہ آھانی تہ ءَ مالی پائدگ ھاسیں رنگ ءَ ھست ءُ راجی نپ آنی تہ ءَ اَنت۔ وفاقی وزیر ءَ گوشت کہ سرجمیں ملک ءَ 36 ءَ چہ 37 ملین صارف است انت کہ آھانی گور ءَ سمارٹ میٹر نیست انت۔ حکومت زوت یک مزنیں میٹرنگ منصوبگ ءِ بندات کنگ ءَ انت کہ ایشی ءِ ھاتر ءَ سرکاری ءُ نجی شریکداری ماڈل ءِ رد ءَ یک ءُ نیم ءَ چہ دو ارب ڈالر ءِ سرمایہ کاری ءِ گمان انت۔ گند ءُ نند ءِ گڈ ءَ دوئیں نیمگاں اے گپ ءِ سر ءَ تپاک کنگ بوت کہ پیش کرتگیں منصوبگ آنی سر ءَ گیش تکنیکی شور ءُ سلاھ کنگ بیت ءُ ھما ماڈل آنی سر ءَ دلگوشی دیگ بیت کہ آ دیر مدتی، مالی رد ءَ مھکم ءُ شریکداری ءِ اصول آنی سر ءَ بنیات ءِ سر ءَ بہ بنت۔