چیئرمین سینیٹ یوسف رضا گیلانی ءُ ریاست گتر  ءِ اسپیکر شوری کونسل حسن الغنیم ءِ نیام ءَ گند ءُ نند

جنیوا۔30جولائی  (اے پی پی):جنیوا ءَ بین الاقوامی پارلیمانی یونین ءِ نیمگ ءَ برجم داشتگیں ششمی ورلڈ اسپیکر کانفرنس ءِ ساھت ءَ سینیٹ ءِ چیئرمین سید یوسف رضا گیلانی ءُگتر  ءِ ریاست ءِ اسپیکر شورا کونسل حسن الغنیم ءِ نیام ءَ دو نیمگی گند ءُ نند بوت۔ سینیٹ سیکرٹریٹ ءِ رد ءَ گند ءُ نند ءِ ساھت ءَ دوئیں رہشوناں پاکستان ءُگتر  ءِ نیام ءَ راجدپتری، براتی ءُ گہتریں سیادی ءِ پدا پدر کت کہ ایشی ءِ بنیات وت مہ وتی احترام، یکجائی اقدار، امن ءُ دیمروئی ءِ واستہ یکجائی وژن ءِ سر ءَ انت۔ دوئیں نیمگ ءَ وت مہ وتی دلچسپی ءِ جتا جتائیں جیڈھ آنی سر ءَ تران کنگ بوت، ایشی ءِ تہ ءَ سیاسی، اقتصادی، پارلیمانی ءُ راج ءِ تک ءَ سیادی آناں دیمروئی دیگ ءِ تک ءُ پہنات ھوار اَنت۔ چیئرمین سینیٹ ءَ جھان ءِ چیلنجز آنی گیواری ءِ واستہ نزیکیں کمک ءِ ارزشت ءِ سر ءَ زور پر دات ءُ اے رد ءَ گتر  ءِ کرد ءَ را ساڑات۔ آہاں میاں اوستمانی پارلیمانی فورم ھاسیں رنگ ءَ آئی پی یو ءِ تہ ءَ کمک ءِ برجاہ دارگ ءِ ضلورت ءِ سر ءَ زور پر دات تانکہ جیڈھ آنی پرامن گیواری، میاں اوستمانی کانود ءِ سر ءَ عمل کنگ ءُ ھواریں دیمروئی ءَ را دیم ءَ برگ بہ بیت۔ دوئیں بامرد آنی نیام ءَ پارلیمانی کمک ءَ را گیش مھکم کنگ، باقاعدہ تبادلہ ءُ پارلیمانی دوستی گل آنی تر ءُ تاب آناں دیمروئی دیگ ءِ سر ءَ تپاک کنگ بوتگ۔ اے موہ ءِ سر ءَ چیئرمین سینیٹ ءَ حسن الغنیم ءَ را 11-12نومبر 2025ءَ پاکستان ءَ برجم دارگ بوھوکیں اسپیکر کانفرنس ءَ بھر زوری ءِ دعوت ھم داتگ ات کہ آئی ءَ اے گپ ءَ گوں وشی ءَ من اِتگ ءُ کانفرنس ءِ سوبمندیں برجم دارگ ءِ واستہ سرجمیں کمک ءِ دل یکیمی داتگ ات۔ گند ءُ نند دوستانہ ماحول ءُ وت مہ وتی نیک راھی ءِ ماحول ءَ آسر بوت، ایشی ءِ تہا دوئیں نیمگ ءَ ہر تک ءُ پھنات ءَ دو نیمگی سیادی ءَ را گیش دیمروئی دیگ ءِ جزم ءِ درشانی کت۔