بلوچستان اٹی نیزگاری نا چٹفنگ اولیت، زالبول آتا شونداری و شونہالی زرگزرانی سوگوی ٹی اہم کڑد ادا کیک، بنجائی وزیر آتا سیمینار آن تران

کوئٹہ۔ 30 جولائی (اے پی پی) بنجائی وزیر تخفیف و نیزگاری و راجی رکھ سید عمران احمد شاہ و بنجائی وزیر مملکت تعلیم و کسبی تربیت وجیہہ قمر ئسک پارینو کہ بلوچستان اٹی نیزگاری نا چٹفنگ اولیت ءِ، زالبول آتا شونداری و شونہالی زرگزرانی سوگوی ٹی اہم کڑد ادا کیک، نیزگاری بیرہ کٹیا نا کمتی نا پن اف دا محرومی، وارخواہی تا مفننگ و وسیلہ غاتسکان بے بریبر رسینگ نا نتیجہ ءِ، نیزگاری نا چٹفنگ و شمولیتی شونداری تنیا ممکن اف، حکومت جہانی شریدار، سول سوسائٹی و نجی بشخ انا نیام اٹ مربوط کوشست آتے اٹ ہی نن اسہ ہندن ءُ آخبت اس جوڑ کننگ کینہ ہراڑے ہر پاکستانی ءِ بریبر نا وارخواہی دُوبرے۔ بلوچستان ہمووخت آ شون ہلیک ہراتم داجاگہ نا زالبول ، یوتھ ءِ امپائر کننگے۔ داخیال آتا درشانی ءِ اوفک کشت وکشار اٹی زالبول لیڈرشپ و جدیدیت نا سرحال آن اڈ ہلوک دود آن تران کرساکریر۔ داوخت آ گورنر بلوچستان شیخ جعفر خان مندوخیل، صوبائی وزیر تعلیم راحیلہ حمید درانی، سینیٹر سردار عمر گورگیج، مسکوہی سینیٹر روشن خورشید بروچہ ، صوبائی سلاہکار شونداری نسواں ڈاکٹر ربابہ بلیدی، سیکرٹری کشت وکشار نور احمد پرکانی، پاکستان پاور ٹی ایولیشن فنڈ انا چیف ایگزیکٹیو آفیسر نادرگل بڑیچ ، مولانا انوارالحق حقانی، بلوچستان رورل سپورٹ پروگرام نا چیف ایگزیکٹیو آفیسر ڈاکٹر طاہر رشید و ایلوفک ہم ساڑی ئسر۔ سید عمران احمد شاہ پارے کہ کنا دا بلوچستان نا اولیکو دورہ ءِ، ای دا پیدوار کیوہ کہ ننا است بلوچستان تون دھڑکک۔ ہراتم وزارت ملا تو دا قول کرین کہ نن مچھی کُننگ آخا بلکن ہلنگ ہیل ایتنہ، ارٹ میکو نن نیزگاری ٹی تخفیف کروئی ءِ و بلوچستان دا بابت اولیت ءِ۔ داہیت پیدوار ءِ کہ ہراوڑ راجی رکھ انا کمک اٹ شمولیتی شونداری نئے بیرہ مخلوق نا زند ءِ بدل کیک بلکن نیزگاری نا ماس تے ہم براہ راست شست کیک۔ وزارت نیزگاری نا چٹفنگ و راجی رکھ اٹی ننا یقین ءِ کہ نیزگاری بیرہ کٹیانا کمتی نا پن اف دا محرومی ، وارخواہی تا مفننگ و وسیلہ غاتسکان بے بریبر رسینگ نا نتیجہ ءِ ۔ دارداٹ ای پاکستان پاور ٹی ایلیویشن فنڈ انا کوشست آتے خاص وڑاٹ تالان کننگ خواوہ ، ہرا گروتھ فاررورل ایڈوانسمنٹ اینڈ سسٹین ایبل پراگریس پروجیکٹ نا کمک اٹ کننگ انگ ءِ۔ دا شش سالہ ڈٹ یورپی یونین نا مالی کمکاری اٹ، انٹرنیشنل ٹریڈ سینٹر نا کنڈآن ، ایف اے او، و پی پی اے ایف نا شریداری اٹ چلیفنگ انگ ءِ دا ڈٹ انا دنگ سندھ انا 12 و بلوچستان نا 10 ضلع غاتون اوار ملک انا کل 22پسماندہ و ضرورت مند علاقہ غاتسکان تالان مروک ءِ ۔ گراسپ نا اصل مسخت خلقی پاکستان اٹ نیزگاری نا چٹفنگ و پائیدار و شمولیتی زرگزرانی شونداری ءِ مون آ دننگ ءِ۔ دانا خاص ہدف دادے کہ زالبول و خواجہ غاتیکن اسہ وڑ کٹیاو روزگار نا وارخواہی ودی کننگے، و چنکا و نیامی درجہ نا کاروبار(ایس ایم ایز) نا پیدواری لائخی وکٹیا ءِ ودفنگے ہرا بنداوی پیدوار، خذمت و ویلیو ایڈیشن نا بشخ آتون وابستہ ءِ۔ ہراتسکان حقی سرسہبی تا تعلق ءِ ، تو او ننا مون آٹو۔ گراسپ نا رداٹ 399 میچنگ گرانٹس کم و ود 1.52 ارب روپئی نا خڑچ آن تننگا، ہراخلقی کاروباری بندغ آتے براہ راست فائدہ تس۔ دا ڈٹ 24 مالیاتی ادارہ غاتون مفاہمتی یات داشت (ایم او یوز) آ دستخط کریر، وخت اس کہ 13 مالیاتی ادارہ غاتے کریڈٹ گارنٹی اسکیم فراوان کننگ اٹ کمک تننگا۔ نتیجتاََ 22 مالیاتی ادارہ داسہ خصوصی مالی آسراتی فراوان کننگ ءُ۔ لائخی سازی ننا حکمت عملی نا المی جزمسنے۔ 1271 ایس ایم ایز ءِ مالی خواندگی و کاروباری ڈٹ سازی نا تربیت تننگا، تانکہ او تینا کاروبار ءِ پائیدار و کٹیا کروک جوڑ کننگ کیر۔