وزیراعظم یوتھ پروگرام و پلڈ اٹ نانیام اٹ تاریخی معاہدہ غا دستخط

اسلام آباد۔ 30 جولائی (اے پی پی) ورناتا جمہوری طرز حکمرانی ٹی اواری ءِ سوگو کننگ کن اسہ اہم پیش رفت اسے نا وڑاٹ وزیراعظم یوتھ پروگرام و پاکستان انسٹی ٹیوٹ آف لیجسلیٹوڈویلپمنٹ اینڈ ٹرانسپیرنسی (پلڈ اٹ) نا نیام اٹ اسہ لیٹر آف انٹینٹ (ایل او آئی) آ دستخط کننگا۔ دامعاہدہ وزیراعظم آفس اٹی چیئرمین وزیراعظم یوتھ پروگرام رانا مشہود احمد خان نا کماشی ٹی دیوان اٹی ہڑتوم آ ادارہ غاتا نمائندہ غاتا ساڑی گری ٹی طے مس، معاہدہ ورناتیٹی باشعور و فعال شہریت ءِ مون آ دننگ کن اسہ اسیجائی فریم ورک اس جوڑ کیک۔ دا شریداری نا مسخت ورناتا جمہوری عمل اٹ شمولیت ءِ ودفنگ و ورنا تا سرکڑدہ ئی نا لائخی ءِ مون آدننگ ناءِ۔ چارشنبے نادے آ وزیراعظم یوتھ پروگرام آن جاری بیان نا رداٹ دا کمکاری نا رداٹ وزیراعظم یوتھ پروگرام و پلڈ اٹ کیہی اسیجائی گام گیج کیرہ ہرافتے ٹی یوتھ پارلیمنٹ پاکستان و ڈیموکریسی ٹاکس کون آ شاری شمولیت نا پروگرام تا ڈیزین و نفاذ اوار ءِ۔ داکان بیدس مچ آملک انا ورناتیکن ہیلکاری ورکشاپ و لیڈرشپ ڈویلپمنٹ پروگرام اڈتننگک۔ دا شریداری نا رداٹ شاری تعلیم و جمہوری اصول آتا بابت پٹ وپولی رپورٹس، پالیسی بریفز و تعلیمی مواد ہم تیار کننگک۔ داکان بیدس ہڑتوم آ ادارہ غاک جمہوری قدر و ورناتا شمولیت نا مون آدننگ کن سیمینار مہم و کانفرنس اڈ ایترہ، خاص وڑاٹ ڈیجیٹل و سوشل میڈیا مہم آتیا چکار کننگک تانکہ گیشتر ورناتپہ اسکان رسینگ دوئی مننگ کے۔ دا کمکاری نا اسہ اہم پلو پاکستان نا اولیکو نیشنل ایڈولسنٹ اینڈ یوتھ پالیسی کن ڈیٹایکجا کننگ و اونا تجزیہ ءِ کننگ اٹ آسراتی فراوان کننگ ہم ارے ۔ رانا مشہود احمد خان داوخت آپارے کہ دا شریداری وزیراعظم یوتھ پروگرام نا چار ایز فریم ورک (تعلیم، شمولیت، روزگار و چاگڑد) نا رداٹ ورناپاکستانی تے واکدار کننگ نا مشن نا اسہ اہم ءُ بشخ اسے۔ اوپارے کہ دا گام آن قومی پالیسی تے جمہوری قدر و جہانی آب انا رداٹ ہم گرنچ کننگ اٹ کمک رسینگک۔ ایل او آئی آ دستخط پاکستان اٹ ورناتا شونداری نا اسہ پوسکن آ بشخ اسے نا بناءِ ہرا اسہ باشعور ، زموار و فعال نسل انا قیام کن حکومت نا عزم ءِ پین سوگو کیک۔