ٹیلی میڈیسن نا ڈٹ وخت انا اہم گرج مسنے، بنجائی وزیر جان جوڑی سید مصطفیٰ کمال

اسلام آباد۔ 30 جولائی (اے پی پی) بنجائی وزیر جان جوڑی سید مصطفیٰ کمال پارینے کہ ٹیلی میڈیسن نا ڈٹ وخت انا اہم ءُ گرج اس مسنے، پوسکن آ ٹیکنالوجی آن فائدہ ہرفسا ڈاکٹرز و دوا مریض نا درگہ اسکان اتنگ اُن۔ داخیال آتا درشانی ءِ او چارشنبے نادے آ ٹیلی میڈیسن ڈٹ آ پیش رفت نا بابت اسہ بڑزکو کہول انا دیوان اٹی گپ وتران کرساکرے۔ دیوان اٹی جوائنٹ سیکرٹری ہیلتھ و ڈائریکٹر جنرل ڈویلپمنٹ تون اوار اسپیشل کنسلٹنٹ ٹیلی میڈیسن ہم بشخ ہلک۔ بنجائی وزیر پارے کہ ٹیلی میڈیسن نا ڈٹ وخت انا اہم گرج اس جوڑ مسنے، ڈٹ انا زوت آن زوت پوروی ءِ پک کننگے تانکہ مچ آملک انا الس دا پوسکن آآسراتی آن پبی فائدہ ہرفنگ کیر۔ اوپارے کہ پوسکن آ ٹیکنالوجی آن فائدہ ہرفسا ڈاکٹر و دوامرض نا درگہ اسکان اتنگ اُن، بنائی ریسہ ٹی کراچی و اسلام آباد اٹی پائلٹ پروگرام نا بناءِ کننگ انگ ءِ، 70 درسد مخلوق ہرا بنداوی جان جوڑی ہند انا جاگہ غا بھلا ہسپتال آتیا کارہ ہرانا سوب آن ہموڑے ناجوڑ آتا دباؤ ودنگ ءِ۔ مصطفیٰ کمال پارے کہ دا پوسکن آ نظام نا کمک اٹ نئے بیرہ ہسپتال آتیا بھاریم  کم مریک بلکن شاری تے اوفتا درگہ غا گچین طبی آسراتی ہم دُوبریک۔ اوپارے کہ ٹیلی میڈیسن نا کمک اٹ مرانگا علاقہ غاتا ہنکین آتے درگہ اسکان ڈاکٹر و دوانا آسراتی فراوان مریک، داگام آن نیزگار ولاچار مریض ہراہسپتال آ ہِننگ نا وس تخپسہ اوفتے اُرانا درگہ غا ڈاکٹر و دوانا آسراتی دُوبریک۔ مصطفیٰ کمال پارے کہ پرائمری ہیلتھ کیئر سسٹم ءِ سوگو کننگ نا کنڈ آ اسہ اہم ءُ گام اسے۔ دیوان اٹی ٹیلی میڈیسن ڈٹ انا پیش رفت نا جاچ و مون تروک چیلنج آتیا حوال ہم تننگا۔