متکن آ جہانی جھیڑہ غاتا پرامن ایسری کن سلامتی کونسل نا قرارداد آتا رداٹ بایدے عمل کننگے، سردار ایاز صادق

جنیوا۔ 30 جولائی (اے پی پی) اسپیکر قومی اسمبلی سردار ایاز صادق کثیرالجہتی کہول آ جہانی پت ءِ بحال کننگ نا گرج آ زور شاغسا پارینے کہ متکن آ جہانی جھیڑہ خاص کر فلسطین و جموں وکشمیر نا پرامن ایسری کن اقوام متحدہ نا سلامتی کونسل نا قرارداد آتا رداٹ بایدے عمل کننگے، جہانی امن و انصاف نا رکھ اکن انسانی اصول آتا سیاست و جہانی باندات آتیٹی دوآبہ نا اطلاق  ءِ بایدے چٹفنگے۔ داخیال آتا درشانی ءِ او 29 آن 31 جولائی 2025 آ جنیوا ٹی بین الپارلیمانی یونین (آئی پی یو) و اقوام متحدہ نا کنڈآن اسیجائی وڑاٹ اڈ ہلوک پارلیمنٹ نا اسپیکر آتا شش  می جہانی کانفرنس نا دیوان آن تران کرساکرے۔ جہانی سفارت کاری نا مرکز نا وڑاٹ جنیوا نا تاریخی کڑد ءِ مون آتخسا اسپیکر سردار ایاز صادق پارے کہ شار ہراڑے لیگ آف نیشنز نا بنداو ءِ تخنگاسس و بالآخر بے سہب مسوسس، پاپولزم، انتہاپسندی و تنگ نظر قوم پرستی نا کمک اٹ کثیر الجہتی کہول ءِ نزور کننگ نا نتیجہ غاتا اسہ واکدار یات دہانی اسے نا وڑاٹ کاریم کیک۔ اوپارے کہ دنیا اسہ وار ولدا اسہ نازرک ءُ دور اسے آ سلوک ءِ و چندی باہم گنڈوک تنکی تا مقابلہ ءِ کننگ ءِ ہرا جہانی امن وسلامتی ، اقتصادی سوگوی، پائیدار شونداری و کثیر الجہتی نظام نا سالمیت کن خطرہ ءِ۔ اسپیکر سردار ایاز صادق بھلو وخت اسکان درملکی کوزہ غاتا حالیت آتے مون آ تخا ہراڑے جہانی امن آ بالادستی نا ہدف و گونڈ مدی سیاسی فائدہ غاتے اولیت تروک آتا کمک اٹ جہانی کانود، انسانی ہمدردی نا آب و اقوام متحدہ نا چارٹر نا بنداوی اصول آتا خلاف ورزی کننگک۔ اواسہ کنڈی و بے کچ قوم پرستی نا ودوک آ رجحان تا سوب آن اقوام متحدہ نا ساکھ انا تمنگ آ است ہسونی نا درشانی ءِ کرے۔ اوداہیت آہم زور شاغا کہ جھیڑہ غاتا پرامن ایسری ءِ داسہ نئے بیرہ اسہ کانودی زمواری اسے نا وڑاٹ بلکن اسہ اسٹریٹجک گرج اسے نا وڑاٹ بایدے ہُننگے۔ اوپارے کہ جور و اسہ کنڈی کارروائی آن پائیدار امن دوئی مننگ کپک، دانا جاگہ غا دنیا ءِ مذاکرات، سفارتکاری ، تین پہ تینی شرف و اقوام متحدہ نا چارٹر نا حقی پاسداری ٹی زرکاری بایدے کننگے۔ اوپاکستان نا کماشی ٹی اقوام متحدہ نا سلامتی کونسل نا قرارداد 2788 نا ساڑی آ امنائی منظوری نا ستاءِ کرے ہراٹی جھیڑہ غاتا پرامن ایسری نا وڑوڈول آتے سوگو کننگ آ زور شاغنگانے ہراٹی مذاکرات ، انکوائری ، ثالثی ، مفاہمت ، عدالتی تصفیہ و سیکرٹری جنرل نا علاقائی تنظیم و ذیلی دفتری تنظیم آتون کمکاری اوار ءِ۔