وزیراعظم نا خصوصی کمکار صنعت و پیدوار ہارون اختر خان تون صدر نیشنل بینک انا اوڑدہی، صنعتی شونداری کن مالی کمکاری ءِ ودفنگ آ گپ وتران

اسلام آباد۔ 30 جولائی (اے پی پی) وزیراعظم نا خصوصی کمکار صنعت وپیدوار ہارون اخترخان تون چارشنبے نادے آ نیشنل بینک آف پاکستان (این بی پی)نا صدر رحمت علی حسنی اوڑدہی کرے ۔ اوڑدہی ٹی صنعتی شونداری کن مالی کمکاری ءِ ودفنگ آ سرجمی اٹ گپ وتران کننگا۔ داوخت آ صنعتی وام، زرکاری نا مون آ دننگ، و بینکاری بشخ و صنعتی پنجر نا نیام اٹ شریداری ءِ سوگو کننگ نا بابت امور آ گپ وتران کننگا۔ ہارون اخترخان پارے کہ پائیدار صنعتی شونداری کن مالی آسراتی تا مون آ دننگ المی ءِ۔ اوصنعت آتے وام تا فراوانی ٹی نیشنل بینک انا اہم کڑد انا ستاءِ کرے و پارے کہ داوڑنا کمکاری زرگزران نا گچینی کن بے کچ اہم ءِ۔ اومستی پارے کہ زرگزرانی شونداری کن بینکاری بشخ انا کمکاری بے کچ المی ءِ و سوگو صنعتی پنجر کن مالیاتی ادارہ غاتا شراکت المی ءِ۔ ہارون اخترخان داہیت آ زور شاغا کہ پاکستان اٹ زرکاری ءِ ودفنگ کن بینک آتے اہم کڑد ادا کروئی مریک و حکومت کاروباری ادارہ غاتے کن سازگار مالی چاگڑد فراوان کننگ کن سنبرینگوک ءِ۔ صدر نیشنل بینک رحمت علی حسنی خصوصی کمکار ءِ حکومت نا صنعتی شونداری نا وژن اٹی پورو کمکاری نا باوری کرفے و اقتصادی شونداری نا مون آ دننگ کن پدریسہ شراکت نا عزم ظاہرکرے۔