کنا تغ جان جوڑی راج ءِ، پاکستان اٹ شرح پیدائش 3.6 ءِ، جان جوڑی نا آسراتی تا کمتی ءِ اسہ ملک اس ہم سگنگ کپک، بنجائی وزیر قومی جان جوڑی

اسلام آباد۔ 29 جولائی (اے پی پی) بنجائی وزیر قومی جان جوڑی سید مصطفیٰ کمال پارینے کہ ہر جان جوڑ پالیسی نا مرکز الس نا جان جوڑی بایدے مرے، ننا تغ اسہ جان جوڑ راج اسے ہرانا بنداو لمہ و چنانا جان جوڑی آن بناکیک، ہرسال حمل اٹی 11 ہزار زالبول جون آن دوتے سلرہ، پاکستان اٹی شرح پیدائش 3.6 ءِ، دا کچ اتون اسہ ملک اس ہم شون ہلنگ کپک، اسہ ملک اس ہم داوڑ ءُ نظام اسے سگپک ہراڑے جان جوڑی نا آسراتی تا کمتی مرے۔ داخیال آتا درشانی ءِ او سے شنبے نادے آ داڑے پاکستان و جہانی ادارہ جان جوڑی (ڈبلیو ایچ او) نا نیام اٹ چناتا کینسر نا مفت دوائی اسکان رسینگ نا بابت ایل او اے آ دستخط نا دود اٹی کرے۔ بنجائی وزیر جان جوڑی مصطفیٰ کمال داوخت آ نیشنل ہیضہ کنٹرول پلان 2025-28نا بناءِ ہم کرے و پارے کہ داڑآن ہرسال 8 ہزار چناکینسر نا مفت دوائی فراوان کننگک۔ اوپارے کہ پاکستان نا گلوبل پلیٹ فارم چائلڈ ہوڈ کینسر میڈیسن اٹی اوار مننگ نا مسخت چناتیٹی کینسر آن رکھ انا کچ 30 درسد آن ودفسا 60 درسد کننگ ءِ۔ او پارے کہ معاہدہ نا رداٹ ڈبلیو ایچ او  قومی وزارت جان جوڑی ءِ تکنیکی کمک فراوان کیک۔ اومستی پارے کہ معاہدہ نا رداٹ یونیسیف دوائی تا ہلنگ و پاکستان ءِ دوائی تا فراوانی نا زموار مریک۔ بنجائی وزیر اظہار تاسف کرساپارے کہ کم و نیامی کٹیا والا ملک آتیٹی چناتیٹی کینسر آن مرک آتا کچ 70 درسد اسکان ءِ۔ اوپارے کہ ننا مدام دا موقف مسنے کہ ناجوڑی تا توننگ ہسپتال آتیان پیشن آن بناکیک، اگہ نن ناجوڑی تے توننگ اٹ بے سہب مسن تو بھلو تنکی اس ودی مننگ کیک۔