پاکستان مسہ سال اٹی جہاز رانی نا لائخی ٹی 600 درسد ودکی کننگ نا ارادہ تخک، بنجائی وزیر بحری امور نا کے پی ٹی، پی کیو اے و پی این ایس سی نا نیام اٹ کمکاری نا معاہدہ نا بابت دیوان آن تران

اسلام آباد۔ 29 جولائی (اے پی پی) بنجائی وزیر بحری امور جنید انور چوہدری پارینے کہ پاکستان بروک آ مسہ سال آتیٹی تینا جہاز رانی نا لائخی ٹی 600 درسد ودکی کننگ نا ارادہ تخک ہراٹی ننا چکار سرکاری بیڑہ ٹی گرین ٹیکنالوجی و توانائی اٹ چلینگوک آ جہاز آتے اوار کننگ آٹی ءِ، میری ٹائم انفراسٹرکچر ءِ سوگو کننگ و درملکی جہاز آتیا سیبو ءِ کم کننگ نا کوشست آتا رداٹ قومی جہاز رانی بیڑہ ءِ ودفنگ و پوسکن جوڑ کننگ کن اسہ اہم ءُ گام اسے نا بناءِ کرینے۔ سے شنبے نادے آ دا بابت معاہدہ غاتیا دستخط نا بابت دیوان نا کماشی ءِ کرسا بنجائی وزیر پارے کہ دا گام نئے بیرہ سمندری مال برادری نا بل ءِ کم کننگ و زرمبادلہ نا رکھ اکن ڈیزین کننگانے ، بلکن اسہ ساف ستھرا، زیات گچین ملکی بیڑہ ءِ سوگو کرسا موسمیاتی سمارٹ میری ٹائم وڑتا مخ تفی ءِ ہم کننگ  نا ءِ۔ بنجائی وزیرپارے کہ پاکستان بروک آمسہ سال آتیٹی تینا جہاز رانی نا لائخی ٹی 600 درسد ودکی کننگ نا ارادہ تخک ہراٹی ننا چکار سرکاری بیڑہ ٹی گرین ٹیکنالوجی و توانائی اٹ چلینگوک آ جہاز آتے اوار کننگ آٹی ءِ۔ بنجائی وزیر نا کماشی ٹی کراچی پورٹ ٹرسٹ (کے پی ٹی ) و پورٹ قاسم اتھارٹی (پی کیو اے) ریاست نا بست وبند اٹی پاکستان نیشنل شپنگ کارپوریشن (پی این ایس سی ) تون جتا جتا معاہدہ غاتیا دستخط کرینے ہراٹی بیڑہ نا ودکی نا ڈٹ آتیکن مالی کمکاری نا قول کننگانے۔ معاہدہ غاتیا کے پی ٹی نا ٹرانزیشن مینجمنٹ کمیٹی نا نمائندگی ءِ کروک آ عبداللہ ذکی و پی کیو اے نا چیئرمین ریئر ایڈمرل (ر) سید معظم الیاس ہلال امتیاز (ملٹری ) پی این ایس سی نا سی ای او سید جرار حیدر کاظمی تون دستخط کرے۔ دا معاہدہ غاتے بنجائی وزیر جنید انوار چوہدری نا کماشی ٹی بڑزکو کہولی پالیسی دیوان نا منہ دے آن پد گڈیکو دروشم اس تننگا ہراٹی میری ٹائم سٹیک ہولڈر ز آک وزیراعظم نا دفترنا کنڈآن بیان کروک چاگڑدی سوگوی و قومی آب و ہوا نا ہدف آتون بحری بیڑہ نا جدید کاری ءِ ہم گرنچ کننگ آ امنا کریر۔ کے پی ٹی و پی کیو اے نا کمامدارآک داہیت آ زور شاغار کہ بیڑہ ءِ پوسکن کننگ آن نئے بیرہ زرمبادلہ نا بچت مریک و واپاری رابطہ غاتیٹی ودکی مریک بلکن ایندھن نا کھپت ءِ کم آن کم کرسا و جہانی اخراج نا آب آتا تعمیل ءِ فعال کرسا سمندری مال برداری نا چاگڑدی خڑچ ءِ ہم نمان وڑاٹ کم کننگک۔ جنید انوار چوہدری پارے کہ دا گام میری ٹائم سیکٹر ءِ پوسکن کننگ آپریشنل کارکڑد ءِ ودفنگ و غٹ ادارہ غاتیٹی پوسکن ٹیکنالوجی درستی راستی کرفنگ نا ننا گیشتر وژن نا عکاسی ءِ کیک۔ اومستی پارے کہ حکومت شفافیت و میرٹ نا بنداو آ فیصلہ سازی کن سنبرینگوک ءِ، دا گام مچ آ دنیا ٹی گرین ہاؤس گیس آتا اخراج اٹی غٹ آن بھلا شریدار آتیان اسہ شپنگ انڈسٹری ءِ ڈی کاربونائز کننگ نا جہانی کوشست آتیٹی تینا بشخ ءِ شاغسا تینے اسہ علاقائی سمندری مرکز اسے نا وڑاٹ سلفنگ نا پاکستان نا کوشست آتا بشخ ءِ۔