غزہ ”میاں اوستمانی قانون ءُ انسانی اصولانی قبرستان“ جوڑ بوتگ، نائب مزن وزیر ءُ درئی کارانی وزیر اسحاق دار فلسطین ءِ جیڈھ ءِ سرا میاں اوستمانی کانفرنس ءَ گوں تران

نیویارک۔29جولائی  (اے پی پی): نائب مزن وزیر ءُ دری کارانی وزیر سینیٹر محمد اسحاق دار ءَ فلسطین ءِ جیڈھ ءِ پرامن ءُ دو ریاستی گیواری ءِ ھوالگ ءَ مزنیں تک ءِ میاں اوستمانی کانفرنس ءَ بھر زوری کت۔ ادا دری کارانی کارگس ءِ جارکش ءِ نیمگ ءَ جاڑی بوتگیں بیان ءِ رد ءَ کانفرنس سعودی عرب ءُ فرانس ءِ یکجائی سروکی ءَ برجم دارگ بوھگ ءَ اِنت۔ نائب مزن وزیر ءُ دری کارانی وزیر ءَ شریکیں چیئرمین آنی سروکی ءُ ہشت کارگس آنی کوشست آناں ساڑات کنان ءَ کانفرنس ءَ چہ بامردیں آسراتی ءِ ھاترا پاکستان ءِ سرگرمیں بھر زوری ءُ عزم ءِ یک رندے پدر کت۔ آئی ءَ غزہ ءَ برجاھیں اسرائیل ءِ زوراکی ءَ را سک مذمت کتگ ءُ اے زوراکی ءَ را ”میاں اوستمانی کانود ءُ انسانی رہبندانی قبرستان“ لیک اِتگ۔ آئی ءَ گوشت کہ 58 ھزار ءَ چہ گیش فلسطینی آنی کوش کہ گیشتر جنین ءُ زھگ اَنت، میاں اوستمانی کانود، اقوام متحدہ ءِ قرارداد ءُ میاں اوستمانی آمید گس ءِ کارروائی آنی پدریں ھلاپ ورزی اِنت۔ نائب مزن وزیر ءُ دری کارانی وزیر ءَ میاں اوستمانی گامگیج ءِ زوتیں ضلورت ءِ سر ءَ زور پر دیان ءَ ترندیں ، بے شرط ءُ دائمی جنگ بندی ، بے رکاوٹیں انسانی کمک ءِ رسائی ، اقوام متحدہ ءِ ادارگ UNRWA ءِ کمک ، جنگی جرائم ءِ احتساب ءُ دو ریاستی گیواری ءِ واستہ یک حقیقی سیاسی عمل ءِ پدا بندات کنگ ءِ لوٹ کت۔ آئی ءَ فلسطین ءِ واستہ اقوام متحدہ ءِ سرجمیں باسک بوھگ ءُ جھان ءِ تک ءَ آئی ءِ منگ ءِ ھم لوٹ کتگ۔ آئی ءَ اے گپ ءِ سر ءَ ھم زور پر دات کہ اے دیوان ءَ دو ریاستی گیواری ءِ مرکزیت ءِ گوں کارروائی ءِ زمہ واری آنی گوما پدا پدر کنگ بہ بیت، اسرائیل ءِ غزہ ءَ چہ درآھگ ءِ لوٹ کنگ بہ بیت ءُ اقوام متحدہ ءِ سلامتی کونسل ءِ قرارداد 2735 ءُ او آئی سی ءُ عرب منصوبگ ءِ رد ءَ غزہ ءِ نوک جوڑیشت ءِ حمایت کنگ بہ بیت۔ آئی ءَ گیش کرتگ کہ اے دیوان ءَ زوراکی ءِ آوار جنگ، آبادی ءِ دستکاری، آبادی ءُ الحاق ءَ ھم رد کنگ بہ بیت۔ فرانس ءِ فلسطین ءِ ریاست ءِ منگ ءِ پیسلہ ءِ وش آتک کنان ءَ نائب مزن وزیر ءُ دری کارانی وزیر ءَ دگہ ملک آناں ھم اے پیسلہ ءِ رندگیری کنگ ءِ ھاترا دلبڈی دات۔ آئی ءَ او آئی سی عرب منصوبگ ءُ کجام ھم میاں اوستمانی ایمنی ءِ میکانزم ءِ واستہ ٹیکنیکل کمک، صلاحیت سازی ءُ کمک ءِ واستہ پاکستان ءِ تیاری ءِ ھم درشان کت۔ نائب مزن وزیر ءُ دری کارانی وزیر سینیٹر محمد اسحاق دار ءَ اے گپ ءِ سر ءَ زور پر دات کہ فلسطین ءِ جیڈھ اخلاقی لوٹ اِنت ءُ میاں اوستمانی براتی ءِ واستہ چکاس اِنت۔ آئی ءَ گوشت کہ قبضہ ھلاس کنگ بہ بیت ءُ اے نوں ھلاس کنگ بہ بیت، فلسطین ءِ آجوئی، حاکمیت ءُ ریاست ءِ رسگ ءِ وھد اتکگ۔