وزیراعظم شہباز شریف نا کرغزڈل اتون اوڑدہی، پاکستان و کرغزستان نا نیام اٹ کمکاری ٹی ودکی آ است جمی نا درشان

اسلام آباد۔ 29 جولائی (اے پی پی) وزیراعظم محمد شہباز شریف پاکستان و کرغزستان نا نیام اٹ کمکاری ٹی ودکی آ است جمی نا درشانی ءِ کرسا ہڑتوم آ ملک آتا نیام اٹ واپار، توانائی و السی ہن و بر نا مون آ دننگ کن مفاہمت نا چندی یات داشت آتیا دستخط آتا ستاءِ کرینے۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف تون کرغزستان نا کابینہ نا ڈپٹی چیئرمین عادل بیسالوف (Edil Baisalov)نا کماشی ٹی بڑزکو کہول انا ڈل سے شنبے نادے آ داڑے اوڑدہی کرے۔ ڈل پاکستان کرغزستان اسیجائی بین الحکومتی کمیشن (آئی جی سی ) نا پنچ می دیوان اٹی بشخ ہلنگ کن پاکستان نا دورہ غاٹی ءِ ہرانا مسخت چندی بشخ آتیٹی ہڑتوم آ کنڈآتا کمکاری ءِ سوگو کننگ ءِ۔ وزیراعظم محمد شہباز شریف پاکستان و کرغزستان نا نیام اٹ کمکاری ٹی پیش رفت و آئی جی سی نا پنچ می دیوان نا سرسہب اڈتننگ آ است جمی نا درشانی ءِ کرسا ڈل انا ستاءِ کرے ۔ اوپاکستان و کرغزستان نا نیام اٹ پروٹوکول و مفاہمت نا چندی یات داشت (ایم او یوز) آ دستخط نا ستاءِ کرسا اودے واپار، توانائی ، کمکاری ، رابطہ و السی ہن و بر نا مون آ دننگ نا کنڈآ اہم ءُ گام اس گوندا۔ وزیراعظم آئی جی سی ٹی کروک آ فیصلہ غاتیا عملدرآمد کن پاکستان نا سوگو عزم انا درشانی ءِ کرے و معاہدہ غاتے پبی نتیجہ غاتیٹی بدل کننگ کن اوفتا گچین ووخت آ پیروی نا اہمیت آ زور شاغا۔ عادل بیسالوف ہڑتوم آملک آتا نیام اٹ خڑکی ہڑتوم آ کنڈآتا تعلقداری تے مون آ دننگ کن حکومت ءِ پاکستان نا کوشست آتا ستاءِ کرسا داپت انا درشانی ءِ کرے کہ آئی جی سی آن ہڑتوم آملک آتا نیام اٹ کمکاری ٹی پین ودکی مریک۔ ہڑتوم آ راہشونک پاکستان و کرغزستان نا الس نا فائدہ غاتیٹی اواری اٹ کاریم کننگ و سوگو تعلقداری تا مون آ دننگ کن کمکاری ءِ برجاتخنگ نا عزم انا درشانی ءِ کرے۔