معاون مزن وزیر ءُ وزیر ءِ درئی کار واجہ محمد اسحاق ڈار ءَ کویت ءِ دری کارانی وزیر عبداللہ ال یحیی ءَ گوں گند ءُ نند

اسلام آباد۔29جولائی  (اے پی پی): اقوام متحدہ ءَ دو ریاستی گیواری ءِ ھوالگ ءَ میاں اوستمانی کانفرنس ءِ ساھت ءَ نائب مزن وزیر ءُ درئی کارانی وزیر محمد اسحاق ڈار ءَ کویت ءِ دری کارانی وزیر عبداللہ ال یحیی ءَ گوں گند ءُ نند کت۔ درئی کارانی کارگس ءِ جارکش ءِ رد ءَ اے موہ ءِ سر ءَ دوئیں بامرد آں پاکستان ءُ کویت ءِ نیام ءَ دو نیمگی سیادی ءَ را گیش مھکم کنگ ءِ امکان آنی سر ءَ چار ءُ تپاسی کت ایشی ءِ تہ ءَ تجارت، سرمایہ کاری، توان، فوڈ سیکیورٹی ءُ دفاع ءِ شوبگ آنی تہ ءَ وت مہ وتی کمک ءَ را دیمروئی دیگ ءِ سر ءَ دلگوشی دات۔ ایشاں اقوام متحدہ ءُ او آئی سی ءِ وڑیں کثیر جہتی فورم آنی تہ ءَ ھم دو نیمگی کمک ءِ ھوالگ ءَ ھیال ءُ لیکہ درشان کت۔ دوئیں نیمگ ءَ نزیکیں وھد ءَ مزن تک ءِ تبادلہ کنگ ءِ سر ءَ تپاک کنگ بوتگ تانکہ دو نیمگی سیادی ءَ را گیش پراھی کنگ بہ بیت۔ دوئیں وزیراں فلسطینی آنی سر ءَ برجاھیں اسرائیل ءِ زوراکی ءُ غزہ ءِ تہ ءَ انسانی جاور ھال آنی ھراب بوھگ ءِ سر ءَ سک باز جیڈھ ءِ درشانی کنان ءَ یک انصاف ءُ برجمیں گیواری ءِ زوتیں ضلورت ءِ سر ءَ زور پر دات۔ آہاں امیت سہرا کت کہ کانفرنس ءِ آسر دو ریاستی گیواری ءِ ھاتر ءَ مزنیں کردے پیلو کن انت۔