مزن وزیر شہباز شریف ءَ کرغزستان ءِ ڈل ءَ گوں گند ءُ نند کتگ، پاکستان ءُ کرغزستان ءِ نیام ءَ دو نیمگی کمک ءِ تہ ءَ گیشی ءِ سر ءَ دل یکیمی ءِ درشانی

اسلام آباد۔29جولائی  (اے پی پی): مزن وزیر محمد شہباز شریف ءَ پاکستان ءُ کرغزستان ءِ نیام ءَ دو نیمگی کمک ءِ تہ ءَ گیشی ءِ سر ءَ دل یکیمی ءِ درشانی کتگ ءُ دو نیمگی تجارت، توان ءُ مردم آنی نیام ءَ مردم آنی تبادلہ ءِ دیمروئی ءِ واستہ دوئیں ملک آنی نیام ءَ بازیں تپاک نامہ آنی سر ءَ دستخط کنگ ءَ را ساڑاتگ۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ سئے شمبے ءِ روچ ءَ کرغزستان ءِ وزیرانی کابینہ ءِ ڈپٹی چیئرمین  عادل بیسالوف (Edil Baisalov)  ءِ سروکی ءَ مزنیں تک ءِ ڈل ءَ مزن وزیر محمد شہباز شریف ءَ گوں گند ءُ نند کتگ۔ ڈل پاکستان ءُ کرغزستان ءِ یکجائی بین حکومتی کمیشن ءِ پنچمی دیوان ءَ بہر زورگ ءِ واستہ پاکستان ءِ تر ءُ تاب ءَ کنگ ءَ انت ایشی ءِ مول ءُ مراد بازیں پڑ آنی تہ ءَ دو نیمگی کمک ءَ را گیش مھکم کنگ انت۔ مزن وزیر محمد شہباز شریف ءَ ڈل ءَ را وش اتک کنان ءَ پاکستان ءُ کرغزستان ءِ نیام ءَ دو نیمگی کمک ءِ دیمروئی ءُ آئی جی سی ءِ پنچمی دیوان ءِ سوبمندیں برجم دارگ ءِ سر ءَ دل یکیمی ءِ درشان کت۔ آئی ءَ پاکستان ءُ کرغزستان ءِ نیام ءَ بازیں پروٹوکول ءُ تپاک نامہ ءِ سر ءَ دستخط کنگ ءِ توسیپ کت ءُ آھاں تجارت، توانائی، کمک، رابطہ ءُ مردم آنی نیام ءَ تبادلہ ءِ دیمروئی ءِ ھاترا ھاسیں گامگیج لیک ات۔ مزن وزیر ءَ آئی جی سی ءِ ساھت ءَ بوتگیں معاہدہ آنی سر ءَ عمل کنگ ءِ واستہ پاکستان ءِ مھکمیں جزم ءِ سر ءَ زور پر دات ءُ معاہدہ آناں ٹھوس نتیجہ آنی تہ ءَ بدل کنگ ءِ واستہ ایشانی جوانیں ءُ وھد ءِ سر ءَ پیلو کنگ ءِ ارزشت ءِ سر ءَ زور پر دات۔ عادل بسالوف ءَ دوئیں ملک آنی نیام ءَ دوستی ءِ دو نیمگی سیادی آناں دیمروئی دیگ ءِ واستہ پاکستانی حکومت ءِ کوشست آناں ساڑات ءُ دل یکیمی ءِ درشان کت کہ آئی جی سی دوئیں ملک آنی نیام ءَ دو نیمگی کمک ءَ را گیش مھکم کنت۔ دوئیں رہشوناں پاکستان ءُ کرغزستان ءِ الس ءِ مفاد ءِ ھاتر ءَ یکجائی ءَ کار کنگ ءُ مھکمیں سیادی ءِ دیمروئی ءِ ھاتر ءَ وتی کمک ءَ را برجاہ دارگ ءِ وتی جزم ءِ پدا زور دات۔