غزہ ”بین الاقوامی قانون ءُ انسانی اصولانی قبرستان“ جوڑ بوتگ، معاون مزن وزیر ءُ درئی کارانی وزیر اسحاق ڈار فلسطین ءِ جیڑہ ءِ سرا بین الاقوامی کانفرنس ءَ گوں تران

نیویارک۔29جولائی  (اے پی پی): نیویارک ءَ نائب مزن وزیر ءُ دری کارانی وزیر محمد اسحاق ڈار ءَ سئے شمبے ءِ روچ ءَ نیویارک ءَ فلسطین ءِ جیڈھ ءِ امن ءُ دو ریاستی گیواری ءِ ھوالگ ءَ مزن تک ءِ میاں اوستمانی کانفرنس ءَ بھر زوری کت۔ ادا دری کارانی کارگس ءِ جارکش ءِ نیمگ ءَ جاڑی بوتگیں بیان ءِ رد ءَ کانفرنس سعودی عرب ءُ فرانس ءِ یکجائی سروکی ءَ برجم دارگ بوھگ ءَ اِنت۔ نائب مزن وزیر ءُ دری کارانی وزیر ءَ شریکیں چیئرمین آنی کوشست ءُ ہشت کارگس آنی کرد ءَ را ساڑات کنان ءَ کانفرنس ءَ چہ بامردیں آسراتی آناں رسگ ءِ واستہ پاکستان ءِ سرگرمیں بھر زوری ءُ جزم ءِ سر ءَ پدا زور دات۔ آئی ءَ غزہ ءَ برجاھیں اسرائیل ءِ زوراکی ءَ را سک مذمت کتگ ءُ اے زوراکی ءَ را ”بین الاقوامی کانود ءُ انسانی رہبندانی قبرستان“ لیک اِتگ۔ آئی ءَ گوشت کہ 58 ہزار ءَ چہ گیش فلسطینی آنی کوش کہ آھانی تہ ءَ گیشتریں جنین ءُ زھگ بوتگ اَنت، میاں اوستمانی کانود، اقوام متحدہ ءِ قرارداد ءُ میاں اوستمانی انصاف ءِ آمید گس ءِ کارروائی آنی بے دروریں ھلاپ ورزی اِنت۔ نائب مزن وزیر ءُ دری کارانی وزیر ءَ میاں اوستمانی گامگیج ءِ زوتیں ضلورت ءِ سر ءَ زور پر دیان ءَ ترندیں ، بے شرط ءُ دائمی جنگ بندی ، انسانی کمک ءِ بے رکاوٹیں رسائی ، یو این آر ڈبلیو اے ءِ کمک ، جنگی جرم آنی احتساب ءُ دو ریاستی گیواری ءِ واستہ معتبریں سیاسی عمل ءِ بحال کنگ ءِ لوٹ کتگ۔ آئی ءَ فلسطین ءِ واستہ اقوام متحدہ ءِ سرجمیں باسک بوھگ ءُ جھان ءِ تک ءَ آئی ءِ منگ ءِ ھم لوٹ کتگ۔ آئی ءَ اے گپ ءِ سر ءَ ھم زور پر دات کہ اے دیوان ءَ دو ریاستی گیواری ءِ مرکزیت ءِ گوں کارروائی ءِ زمہ واری آنی گوما پدا پدر کنگ بہ بیت، اسرائیل ءِ غزہ ءَ چہ درآھگ ءِ لوٹ کنگ بہ بیت ءُ اقوام متحدہ ءِ سلامتی کونسل ءِ قرارداد 2735 ءُ او آئی سی ءُ عرب منصوبگ ءِ رد ءَ غزہ ءِ نوک جوڑیشت ءِ حمایت کنگ بہ بیت۔ آئی ءَ گیش گوشت کہ کانفرنس ءَ زوراکی ءِ آوار جنگ، آبادی ءِ ھرابکاری، آبادی ءُ الحاق ءَ ھم رد کنگ بہ بیت۔ نائب مزن وزیر ءُ دری کارانی وزیر ءَ فرانس ءِ نیمگ ءَ چہ فلسطین ءِ ریاست ءِ منگ ءِ پیسلہ ءَ را وش اتک کنان ءَ ایندگہ ملک آناں ھم اے پیسلہ ءِ رندگیری کنگ ءِ سر ءَ زور پر دات۔ آئی ءَ او آئی سی عرب منصوبگ ءُ کجام ھم میاں اوستمانی ایمنی ءِ میکانزم ءِ واستہ ٹیکنیکل کمک، صلاحیت سازی ءُ کمک ءِ واستہ پاکستان ءِ تیاری ءِ ھم درشان کت۔ نائب مزن وزیر ءُ دری کارانی وزیر ایس محمد اسحاق ڈار ءَ اے گپ ءِ سر ءَ زور پر دات کہ فلسطین ءِ جیڈھ اخلاقی لوٹ اِنت ءُ میاں اوستمانی براتی ءِ واستہ چکاس اِنت۔ آئی ءَ گوشت کہ قبضہ ھلاس کنگ بہ بیت ءُ اے نوں ھلاس کنگ بہ بیت، فلسطین ءِ واستہ آجوئی، حاکمیت ءُ ریاست ءِ رسگ ءِ وھد اتکگ۔