زالبول آناں اراسمنٹ  ءَ چہ رکھینگ ءِ بابت ءَ ترمیمی بل ءِ منظوری مزنیں پیشرفت اِنت،     سر وزیر بلوچستان

کوئٹہ۔ 28 جولائی (اے پی پی): سر وزیر بلوچستان میر سرفراز بگٹی ءَ بلوچستان اسمبلی ءَ کار جاھاں زالبول آناں  اراسمنٹ  ءَ چہ رکھینگ ءِ ھوالگ ءَ ترمیمی بل ءِ منظوری ءَ را بلوچستان ءِ زالبول آنی واستہ ایمن ءُ ایمنی ءِ نیمگ ءَ یک مزنیں پیشرفت ءُ عملی گامگیج لیک اتگ۔ اسمبلی ءِ دیوان ءِ ساھت ءَ وتی گشتانک ءَ بنجاھی وزیر ءَ زالبول آنی دیمروئی ءِ ھوالگ ءَ مشیر ڈاکٹر روبابا خان بلیدی ءَ را اے ھاسیں بل ءِ سر ءَ کار کنگ ءُ ایشی ءِ منظوری ءِ واستہ ایوان ءَ را اعتماد ءِ تہ ءَ زورگ ءِ سر ءَ شگر ءُ منت گپت۔ آئی ءَ گوشت کہ اے بل مئے زالبول آنی واستہ دلبڈی ءِ وسیلہ بیت پرچا کہ تاں وھد ءَ زالبول ءُ مردین چاگرد ءِ تہ ءَ یکجائی ءَ کار مہ کن انت دیمروئی ممکن نہ انت۔ بنجاھی وزیر میر سرفراز بگٹی ءَ گوشت کہ اے بل ءَ چہ نہ ایوک ءَ زالبول آنی جان سلامتی ءِ ضمانت دیگ بیت بلکینگ ءَ کارجاہ ءَ انچیں چاگرد ءِ ھم پجاری کنگ بیت کہ ایشی ءِ تہ ءَ زالبول ایمن، بااختیار ءُ بھروسہ ءِ احساس ءَ بہ کن اَنت۔ آئی ءَ گوشت کہ ھما کانود کہ زالبول آنی ھک آنی رکھینگ ءَ کنت مئے اجتماعی سوبمندی اِنت۔ آئی ءَ اپوزیشن ءِ باسک آنی ھم منت گپت کہ آھاں اے ھاسیں کانود سازی ءِ تہ ءَ وتی کرد پیلو کتگ۔ بنجاھی وزیر ءَ گوشت کہ سرجمیں ایوان ءَ را مبارک بات دیگ ءَ آں کہ مرچی یک انچیں بلے منظور کنگ بوتگ ایشی ءَ چہ زالبول آنی واستہ وتی کارجاہ ءَ ایمنی ، یقین ءُ دلبڈی ءِ ماحول پیداک بیت۔ آئی ءَ گوشت کہ بلوچستان حکومت ءِ ھیال انت کہ دیمروئی ھما وھد ءَ بوت کنت کہ زالبولاں برابریں موہ دیگ بہ بنت، ایشی ءَ را رکھینگ بہ بیت ءُ شرپ دیگ بہ بیت۔ اے بل اصل ءَ مئے اے عزم ءِ عکاسی کنت کہ ما زالبولانی گوما اوشتاتگیں ءُ آہاں ہر ممکنہ تحفظ ءِ وسیلہ ءَ دات کنیں۔ دیوان ءِ گڈ ءَ بنجاھی وزیر ءَ ڈاکٹر ربابہ خان بلیدی  ءَ ھوار درستیں سیادی داروکیں مردم آناں یک جوانیں ءُ سرجمیں کانود ءِ تیاری ءُ منظوری ءِ سر ءَ مبارکی دات۔