جان جوڑی نا آسراتی لگژری اس آخا بلکن ہر انسان نا بنداوی حق ءِ، مصطفیٰ کمال

اسلام آباد۔ 28 جولائی (اے پی پی) بنجائی وزیر جان جوڑی مصطفیٰ کمال پارینے کہ وزارت جان جوڑی 24 کروڑ الس ءِ جان جوڑی نا مفت آسراتی تا فراوانی کن تگ و دود کننگ ءِ، جان جوڑی نا آسراتی لگژری اس آخا بلکن ہرانسان نا بنداوی حق ءِ۔ داخیال آتا درشانی ءِ او جان جوڑی آسراتی پروگرام نا جاچ دیوان اٹی کرے۔ اوپارے کہ پاکستان یونیورسل ہیلتھ کوریج SDGs3(یوایچ سی) آ دستخط کرینے، پاکستان یونیورسل ہیلتھ کوریج نا آسراتی آ 2030 آن مست عملدرآمد نا پابند ءِ۔ اوپارے کہ بنجاو صوبہ غاتیٹی جا ن جوڑی نا حالیت آک ہندن آن ہندن ءُ، داوخت آ بنجا و صوبہ غاک جان جوڑی آ سالانہ 1154 ارب روپئی آن زیات خڑچ کننگ ءُ، دا زر ءِ خڑچ کننگ آن پد ہم جان جوڑی نا المی آسراتی تا کمتی ءِ۔ اوپارے کہ داخہ بھلو زر اس خڑچ کننگ آن پد ہم الس نا سرکاری گام گیج آتیا پورو پت اف، وزارت ءِ جان جوڑی اسہ پوسکن ءُ وژن اسے تون مون آ ہِننگ ءِ ، وزارت نا بنداوی ہدف دادے کہ 24 کروڑ الس ءِ بے پرخ جان جوڑی نا بنداوی آسراتی اسکان رسینگ تننگے۔ اوپارے کہ ہندن ءُ آسراتی ہرافتیا الس نا پت مرے و اسہ ہم پاکستانی اس جان جوڑی نا آسراتی تیان محروم سلپ۔ اوپارے کہ وزارت جان جوڑی ڈغاری راستی و ساڑی نظام نا خوڑتی اٹ جاچ ءِ ہلکنے، 1154 ارب روپئی آن بھاز کم بجٹ اٹی گچین جان جوڑی آسراتی فراوان کننگ مریک، دامسخت نا دوئی کننگ کن وزارت جان جوڑی اسہ جوان و مربوط ڈٹ اس تیار کرینے ہرا وزیراعظم نا منظوری آن پد قوم انا مون آ پیش کننگک، دامسخت کن وزارت اٹی سنجیدہ سلابت نا عمل برجاءِ۔ دیوان اٹی جان جوڑی آسراتی پروگرام نا چیف ایگزیکٹیو آفیسر بنجائی وزیر جان جوڑی ءِ پروگرام نا بارواٹی حوال تس۔