این ڈی ایم اے 28 آن 31 جولائی اسکان گمانی موسمی حالیت آتا رداٹ الرٹ جاری کرے

اسلام آباد۔ 28 جولائی (اے پی پی) نیشنل ڈیزاسٹر مینجمنٹ اتھارٹی نا نیشنل ایمرجنسیز آپریشن سینٹر 28 آن 31 جولائی اسکان ملک انا گیشتر علاقہ غاتیٹی گمانی موسمی حالیت آتا رداٹ الرٹ جاری کرینے۔ ترجمان این ڈی ایم اے نا رداٹ پنجاب، خیبرپختونخوا ، گلگت بلتستان و آزاد کشمیر اٹی ترند پِر تا سوب نوکاپ و لینڈ سلائیڈنگ نا خطرہ ءِ، تعلقدار ادارہ غاتے ہلہلہ ئی حالیت آتون مون تننگ کن وخت آ گام گیج نا پارت کننگانے۔ پنجاب نا ضلع سرگودھا، حافظ آباد، گوجرانوالہ، گجرات، سیالکوٹ، فیصل آباد، لاہور و نارووال اٹی ترند پِر انا گمانی ءِ۔ سویلی پنجاب نا ضلع ڈیرہ غازی خان، راجن پورو رحیم یار خان اٹی نیامی درجہ نا پِر آتون مشی آ علاقہ غاتیٹی برساتی نالہ غاتیٹی ترند بہاؤ نا گمان ءِ۔ پیر پنجال مشی آ سلسلہ غان پیش تموک آ نالہ غاتیٹی دیر انا بہاؤ ٹی نیامی درجہ نا ودکی گمانی ءِ۔ خیبرپختونخوا نا ضلع کوہستان، سوات، مالاکنڈ، دیر، بونیر و کیبی ندی نالہ و دریاتیٹی طغیانی نا خطرہ ءِ۔ دریائے سوات، پنجکوڑہ ، بارہ و کلپانی نالہ ٹی دیر انا کچ بڑز مننگ آن دریائے کابل اٹی نوشہرہ نا ہند آ بہاؤ ٹی ودکی گمانی ءِ۔ چترال، بونی و ریشون اٹی گلیشیئرز نا دیر مننگ و گمانی پِر تا سوب دریائے چترال نا بہاؤ ٹی ودکی مننگ کیک۔ گلگت ، سکردو، ہنزہ، شگر، مظفرآباد، وادی نیلم و باغ اٹی پِر تا سوب لینڈ سلائیڈنگ و ندی نالہ غاتیٹی نوکاپ نا گڑتی ءِ۔ مظفرآباد، باغ، پشاور، مردان، نوشہرہ و ایبٹ آباد نا شاری علاقہ غاتیٹی ہم نوکاپی حالیت ودی مننگ کیک۔ این ڈی ایم اے غٹ تعلقدار ادارہ غاتے گمانی حالیت آتا رداٹ پیشگی گام گیج نا پارت جاری کرینے۔ ادارہ غاتے ہلہلہ ئی حالیت آتون مون تننگ کن کارندہ ، مشینری و ریسکیو ٹیم تیار تخنگ نا پارت تننگانے۔ ہندی انتظامیہ و صوبائی ڈیزاسٹر مینجمنٹ اتھارٹیز ءِ ہلہلہ ئی حالیت آتون مون تننگ  و وخت آ گام یج کننگ نا تاکید کننگانے۔ الس آن خواست کننگانے کہ او موسم نا بابت پیشگی آگاہی ، گمانی خطرہ و احتیاطی تدابیر کن پاک این ڈی ایم اے ڈیزاسٹر الرٹ ایپ آن راہشونی ہلیر۔ الس آن خواست ءِ کہ او موسمی حالیت آتا رداٹ احتیاط کیر و ہلہلہ ئی حالیت آتیٹی تعلقدار ادارہ غاتون کمک کیر۔ دا الرٹ الس نا رکھ و گمانی نسخان تیان بچفنگ کن جاری کننگانے تانکہ وخت آ گام گیج آن جونی و مالی نسخان ءِ کم کننگ مرے۔