ملک انا شونداری نا راز تعلیم اٹی اودیم ءِ، احسن اقبال

کراچی۔ 28 جولائی (اے پی پی) بنجائی وزیر ڈٹ بندی و شونداری پروفیسر احسن اقبال پارینے کہ تعلیم ہرملک و راج انا شونداری نا کنجی ءِ، تعلیم اسہ واکدار سلہہ سے ہرانا کمک اٹ قومک شون ہلیرہ۔ اوداہیت ءِ دوشنبے نادے آ داڑے کراچی کنٹونمنٹ اٹی فیڈرل گورنمنٹ پبلک اسکول اٹی اسہ دود اسے آن تران کرساپارے۔ پروفیسر احسن اقبال تعلیم نا اہمیت آ زور شاغسا پارے کہ کینٹ پبلک اسکول اٹی تعلیم کروک آ زیات طالب علم آتا تعلق نیامی و شیفکو تپہ غان ءِ و ہندا ورناک تعلیم کرسا ملک انا شونداری ٹی اہم کڑد ادا کیرہ۔ اوپارے کہ ہرقوم انا سرسہبی نا راز تعلیم اٹی اودیم ءِ، ننا قومی شناخت ننا وطن ءِ و ہراقوم انا ہچ ءُ وطن اس مف، اونا آجوئی وخت اس ہم پک مننگ کپک ۔ غزہ ٹی انسانی تنکی و مقبوضہ جموں و کشمیر نا حالیت آتا حوالہ ءِ ترسا اوپارے کہ ہموڑے مروک آ ظلم ننا خن تیٹی دترنا خڑینک اتیک۔ قومی دفاع نا بابت ہیت کرسا احسن اقبال پاکستان نا سلہہ بند فوج انا بہادری  نا ستاءِ کرے و پارے کہ ننا بہادر فوج دشمن نا جلہو ءِ بے سہب کرے و آپریشن بنیان مرصوص اٹی بھارت ءِ دے اٹی استار تے نشان تس۔ اومستی پارے کہ پاکستان، ہرا اسہ وخت اسے ٹی کچ اٹنگا وسیلہ غاتون جہد کریکہ، اینو دنیا نا ہفت می ایٹمی واکدار ءِ، ہراوڑ نن میدان ءِ جنگ اٹی بھارت ءِ شکست تسن ہمووڑ زرگزران نا پڑاٹی ہم پاکستانی بیرک ءِ بڑز کینہ۔ تینا ذاتی زند انا حوالہ ءِ ترسا اوپارے کہ کنا تعلق نئے جاگیر دار تپہ غان ءِ و نئے سرمایہ دار تپہ غان، اینو ای بنجائی کابینہ ٹی ہنداخاطرآن تولوک اُٹ کہ ای تعلیم کریٹ۔ طالب علم آتیان مخاطب مرسا اواوفتے خواری و لگن اٹ تعلیم دوئی کننگ نا تلقین کرے وپارے کہ او ہم آخبت اٹ ملک انا شونداری ٹی اہم کڑد ادا کننگ کیرہ۔ داکان مست اسکول آ بننگ آ بنجائی وزیر ءِ جم وجوش اٹ بخیرکننگا۔ اسکول انتظامیہ اودے ادارہ نا تعلیمی سرجزو شونداری نا بابت حوال ہم تس۔