حکومت ڈیجیٹل ادائیگی و زر انا ڈیجیٹل گدریفنگ نا است بڈی ءِ کننگ ءِ، وزیراعظم شہباز شریف

اسلام آباد۔ 28 جولائی (اے پی پی) وزیراعظم محمد شہباز شریف پارینے کہ حکومت ڈیجیٹل ادائیگی و زر انا ڈیجیٹل گدریفنگ نا است بڈی ءِ کننگ ءِ، ڈیجیٹائزیشن ٹرانسفارمیشن پلان آ گچین وجوان عملدرآمد کن صوبائی حکومت آتون بامعنی سلابت کننگے۔ داخیال آتا درشانی ءِ او تینا کماشی ٹی کیش لیس و ڈیجیٹل اکانومی نا بابت گام گیج آتیا ہفتہ وار جاچ دیوان آن تران کرسا کرے۔ دوشنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ دیوان اٹی بنجائی وزیر خزانہ و محصولات محمد اورنگزیب ، بنجائی وزیر اقتصادی امور احدخان چیمہ، بنجائی وزیر انفارمیشن ٹیکنالوجی و ٹیلی کام شزا فاطمہ ، وزیر مملکت خزانہ و ریلوائی بلال اظہر کیانی، ہرچار آ صوبہ، گلگت بلتستان ، آزاد کشمیر نا چیف سیکرٹری، اسلا م آباد کیپٹل ٹیریٹری نا چیف کمشنر و تعلقدار بڑزکو سرکاری آفیسر آک بشخ ہلکر۔ وزیراعظم دیوان اٹی گپ وتران کرسا پارے کہ زرگزران نا ڈیجیٹائزیشن آن شفافیت نا مون آ دننگ اٹ کمک رسینگک، بنجائی حکومت نا ڈیجیٹائزیشن ٹرانسفارمیشن پلان نا بنداوی اساس الس ءِ بیدس ودکی خڑچ آتا آسراتی دمدستی سرکننگ ءِ، حکومت پالیسی گام گیج آتیان ڈیجیٹل ادائیگی و زر انا ڈیجیٹل گدریفنگ نا است بڈی ءِ کننگ ءِ۔ وزیراعظم پارت کرے کہ بنجائی حکومت ڈیجیٹائزیشن ٹرانسفارمیشن پلان آ گچین و جوان عملدرآمد کن صوبائی حکومت آتون بامعنی سلابت کے، زرگزران نا ڈیجیٹائزیشن و کیش لیس اکانومی نا بابت غٹ صوبائی حکومت، گلگت بلتستان و آزاد کشمیر نا حکومت بنجائی حکومت تون پبی کمک کیر۔ اوصوبائی حکومت و صوبائی ادارہ غاتا کمک اٹ بنجائی حکومت نا ڈیجیٹائزیشن ٹرانسفارمیشن پلان ءِ پین مستعد کننگ نا پارت کرے تانکہ ہدف آتے تخوک آ وخت اٹی دوئی کننگ مرے۔ وزیراعظم غٹ اسٹیک ہولڈر آتون بامعنی سلابت ءِ داپلان نا آخبتی بشخ جوڑ کننگ نا ہم پارت کرے۔ دیوان اٹی زرگزران نا ڈیجیٹائزیشن نا بابت پیش رفت آ حوال تننگا ہراٹی پاننگاکہ نیشنل ڈیجیٹل کمیشن و پاکستان ڈیجیٹل اتھارٹی اس جوڑ کننگانے و دا بابت المی رول جوڑ کننگانے، پاکستان ڈیجیٹل اتھارٹی نا چیئرپرسن و باسک آتا تعیناتی نا عمل آخیریکو ریسہ غاتیٹی ءِ و مرچنٹ آن بورڈنگ فریم ورک نابناءِ 25 جولائی، 2025 آ کننگانے۔