باوہ نا شہیدی نا 20سال آن پدبہادر مار ہم وطن آ قربان ، بنجائی وزیر داخلہ بلوچستان اٹی شہید مروک آ میجر زیاد سلیم نا اُراغا ہنسا خاہوت نا حوصلہ نا ستاءِ کرے

راولپنڈی۔ 28 جولائی (اے پی پی) بنجائی وزیر داخلہ محسن نقوی بلوچستان اٹی شہید مروک آ میجر زیاد سلیم نا اُراغا ہنا، شہید میجر زیاد سلیم نا لمہ ، ایلم، ایڑھ و خاہوت تون اوڑدہی کرے و دعاپاتیاکرے۔ وزارت داخلہ نا کنڈآن دوشنبے نادے آ جاری بیان نا رداٹ وزیر داخلہ محسن نقوی شہید میجر زیاد سلیم نا لمہ، ایلم، ایڑھ و خاہوت تون اوڑدہی کرے و خاہوت تون ہمدردی و است ہسونی نا درشانی ءِ کرے و شہید انا درجہ غاتا بڑزی کن دعاپاتیا کرے۔ وزیرداخلہ محسن نقوی شہید انا درجہ غاتا بڑزی و پدسلوک آ خاہوت کن صبر وجمیل نا دعاکرے۔ وزیرداخلہ محسن نقوی شہید میجر زیاد سلیم نا لمہ، ایڑھ و ایلم تا بڑزکو حوصلہ نا ستاءِ کرے و پارے کہ نم کون آ بہادر و بڑزکو حوصلہ لمہ غاک قوم انا گمر ءُ ۔ محسن نقوی شہید میجر زیاد سلیم نا لمہ نا عظمت، حوصلہ و ہمت ءِ سلام پیش کرساپارے کہ شہید آتا خاہوت نا قربانی تا قرض ءِ قوم تننگ کپک۔ محسن نقوی پارے کہ شہید میجر زیاد سلیم نا بے مٹ قربانی تے مدام یات تخنگک، نا خاہوت نا ہروڑاٹ خیال ءِ تخنہ۔ شہید میجر زیاد سلیم نا آخیریکو آڈیو کلہو ءِ ایلم وزیرداخلہ محسن نقوی ءِ بنفے۔ شہید انا لمہ گپ وتران کرسا پارے کہ شہیدی آن منہ دے مست مار انا برام مس، اودے وطن تون عشق جنون نا حد اسکان ئس۔ اوپارے کہ ٹھپی مننگ آن پد ہم زیاد سنگت آتے بچفسا کرے۔ ٹھپ آتا ہم پرواہ اف۔ اوپارے کہ اَرے آن پد داسہ مار ہم وطن آ قربان مس۔ شہید انا لمہ پارے کہ مدام وطن و پاک فوج اتون سلوک مسنٹ و سلیوہ۔ میجر زیاد سلیم نا باوہ بریگیڈیئر سلیم ہم 2005 اٹی لمہ وطن آ قربان مسنے۔ آئی جی اسلام آباد پولیس، علی ناصر رضوی، چیف کمشنر اسلام آباد محمد علی رندھاوا ہم داوخت آ ساڑی ئسر۔