نائب مزن وزیر محمد اسحاق ڈار ءَ نیویارک ءَ پاکستانی نژادیں امریکی کمیونٹی ءَ گوں گند ءُ نند کتگ، نامداریں پاکستانی نژادیں امریکی آنی مچی ءَ گوں تران

اسلام آباد۔27جولائی  (اے پی پی): نائب مزن وزیر ءُ دری کارانی وزیر سینیٹر محمد اسحاق ڈار ءَ پاکستان ءُ امریکہ دوئیں ملک آنی تہ ءَ پاکستانی ڈائسپورا ءِ کرد ءِ ساڑات ءُ دو نیمگی سیادی ءَ را مھکم کنگ ءُ پاکستان ءِ جوانیں امیج ءَ را جھان ءِ تک ءَ دیمروئی دیگ ءِ تہ ءَ آھانی ھاسیں کرد ءِ من اِت۔ درئی کارانی کارگس ءِ جارکش ءِ نیمگ ءَ جاڑی بوتگیں بیان ءِ رد ءَ نائب مزن وزیر محمد اسحاق ڈار ءَ نیویارک ءَ پاکستانی امریکی کمیونٹی ءَ گوں گند ءُ نند کتگ ءُ نامداریں پاکستانی امریکی آنی مچی ءَ گوں تران کتگ۔ آئی ءَ پاکستانی امریکی آنی یکوئی ءُ کمک ءُ بھارت ءِ گوما گوستگیں کش ءُ چیل ءِ وھد ءَ کشمیری الس ءِ توار ءَ را چست کنگ ءِ تہ ءَ آوانی جوڑیشت ءِ کرد ءَ را ھم ساڑات۔ نائب مزن وزیر/درئی کارانی وزیر ءَ پاکستان ءِ اقتصادی ریکوری ءِ بابت ءَ کمیونٹی ءِ مچی ءَ را سرپد کت ءُ اے گپ ءِ ذکر کت کہ ملک ءَ آئی ایم ایف پروگرام ءَ را سوبمندیں رنگ ءَ سرجم کتگ، مہنگائی ءَ را مزنیں کساسے ءَ کم کتگ ءُ سرمایہ کار آنی دل یکیمی ءَ را بحال کتگ۔ آئی ءَ اے گپ ھم شیئر کت کہ گلوبل کریڈٹ ریٹنگ ایجنسی آں انوگیں وھد ءَ پاکستان ءِ گہتریں میکرو اکنامک آؤٹ لک ءَ را من اِتگ۔ آئی ءَ حکومت ءِ پاکستان ءِ واھشت ءِ سر ءَ زور پر دات کہ آ جی ٹوئنٹی ءِ معیشت آنی تہ ءَ ھوار بہ بیت۔ نائب مزن وزیر / دری کارانی وزیر ءَ اے گپ ءِ سر ءَ زور پر دات کہ پاکستان سفارتی ایوکی ءِ دور ءَ چہ دراتکگ ءُ گوستگیں مزن تک ءِ تر ءُ تاب ءُ کثیر نیمگی سفارتکاری ءِ وسیلگ ءَ میاں اوستمانی تک ءَ سرگرمیں رنگ ءَ ھوار اِنت۔ نائب مزن وزیر ءُ دری کارانی وزیر ءَ پاکستان ءِ استیں صدارت ءُ اقوام متحدہ ءِ سلامتی کونسل ءِ دو سالی غیر دائمی باسک بوھگ ءِ سر ءَ ھم زور پر دات کہ اے 182 ملک آنی کمک ءَ چہ سرجم بوتگ ءُ پاکستان ءِ اصولی سفارتکاری ءِ سر ءَ میاں اوستمانی براتی ءِ دل یکیمی ءِ گواہ اِنت۔ آئی ءَ اقوام متحدہ ءِ سلامتی کونسل ءِ سیادی داروکیں قرارداد آنی رد ءَ جموں ءُ کشمیر ءُ فلسطین ءَ ھوار جیڈھ آناں پرامن گیواری ءِ واستہ پاکستان ءِ عزم ءِ یک رندے پدا گوشت۔ دمگی حرکیات ءِ حوالہ ءَ نائب مزن وزیر ءُ دری کارانی وزیر ءَ ریل ءُ تجارتی راہداری ءِ وسیلگ ءَ میاں اوستمانی ایشیا ءَ دمگی رابطہ ءَ را گیش کنگ ءِ ھاتر ءَ ہمساہگیں اوگانستان ءَ پاکستان ءِ رسائی ءِ سر ءَ زور پر دات۔ آئی ءَ پاکستان ءِ اے امیت ءِ درشان کت کہ اوگان سرزمین ناشرکاری ءِ واستہ کارمرد کنگ نہ بیت۔ آئی ءَ اے درگت ءَ اوگان واکدار آنی نیمگ ءَ چہ گوستگیں دل یکیمی آنی سر ءَ ھم چمشانک دات۔ آئی ءَ آپریشن بنیان المرسوس ءِ وھد ءَ ملک ءِ مھکم ءُ جزمیں پسو ءِ حوالہ دیگ ءَ پاکستان ءِ وتی حاکمیت ءُ دمگی استحکام ءِ رکھینگ ءِ جزم ءِ ھم پدر کت کہ ایشی ءِ آسر ءَ شش بھارتی بالی گراب ایر کنگ بوتگ اَنت۔ آئی ءَ اے نازرکیں ساھت ءِ تہ ءَ راج ءُ ڈائسپورا ءِ نیمگ ءَ یکوئی ءِ درشان ءِ توسیپ کت۔ نائب مزن وزیر ءُ دری کارانی وزیر ءَ کمیونٹی ءَ را دل یکیمی دات کہ حکومت پی آئی اے ءِ بالی گراب آنی زوتیں وھد ءَ پدا بندات کنگ ءِ ھاترا سرگرمیں رنگ ءَ کار کنگ ءَ اِنت، ایشی ءِ تہ ءَ یورپ ءُ برطانیہ ءِ روٹ آناں میاں اوستمانی ہوابازی ءِ معیار آنی رد ءَ بحال کنگ ءِ گامگیج ھوار اَنت۔ آئی ءَ حکومت ءِ کلیدی گامگیج آنی سر ءَ چمشانک دات، ھاسیں رنگ ءَ ھاسیں سرمایہ کاری ءِ آسراتی کونسل ءِ کرد ءِ سر ءَ زور پر دات، ایشی ءِ مول ءُ مراد سرمایہ کاری ءِ کارروائی آناں آسان کنگ ءُ ترجیحی شوبگ آنی تہ ءَ موہ آناں پچ کنگ ءِ ھاترا جوڑ کنگ بوتگ۔ آئی ءَ ڈائسپورا ءَ را پاکستان ءِ دیمروئی ءِ تہ ءَ ھاسیں رنگ ءَ سرمایہ کاری، تجارت، وانگ ءُ زانگ ءُ ڈیجیٹل نوآبادیاتی ءِ تہ ءَ سرگرمیں کرد پیلو کنگ ءِ دعوت دات۔ نائب مزن وزیر ءُ دری کارانی وزیر ءَ راجی دیمروئی ءِ تہ ءَ پاکستانی امریکی ڈائسپورا ءَ را اسٹریٹجک پارٹنر ءِ رنگ ءَ ھوار کنگ ءِ ھوار وت مہ وتی پائدگ مندیں پاکستان ءُ امریکہ کمک ءَ را مھکم کنگ ءِ حکومت ءِ پاکستان ءِ جزم ءِ سر ءَ یک رندے پدا گوشت۔