ریاستی رٹ ءَ چیلنج کنوکیں مردماں گوں ترندی ءَ گر گ ءُ پنجگ کنگ بیت،  محسن نقوی

کوئٹہ۔26جولائی  (اے پی پی):وفاقی تہی کارانی وزیر محسن نقوی ءَ گوشت کہ بھارت ءِ سرپرستی ءَ بوتگیں ناشرکار ءُ آھانی آسراتی دیوک آناں گرگ ءُ پنجگ کنگ بیت،   ریاستی رٹ ءَ را چیلنج کنوکیں مردماں گوں آہنی دست ءَ کار کنگ بیت ءُ ناشرکاری ءِ ھلاپ ءَ جنگ ءَ بلوچستان حکومت ءَ را سرجمیں کمک برجاہ دارگ بیت۔ وزارت داخلہ ءِ نیمگ ءَ چہ جاڑی بوتگیں بیان ءِ رد ءَ وفاقی وزیر داخلہ محسن نقوی ءُ بلوچستان ءِ سر وزیر میر سرفراز بگٹی ءِ سروکی ءَ امن ءُ ایمنی ءِ ھوالگ ءَ ھاسیں دیوان ءَ فتنہ الهندستان ءِ ھلاپ ءَ جتا جتائیں دمگ آنی تہ ءَ سیکورٹی فورسز ءِ آپریشن آنی سر ءَ سرجمیں رنگ ءَ گپ ءُ تران کنگ بوتگ۔ دیوان ءَ پولیس ءِ انسپکٹر جنرل آئی جی ایف سی نارتھ، ڈی آئی جی سی ٹی ڈی، ڈی آئی جی اسپیشل برانچ، ڈی جی لیویز ءِ ھوار محکمہ داخلہ ءُ کانود ءِ نفاذ ءِ ادارگ آنی مزنیں کارندہ آنی بھر زوری بوتگ۔ اے موہ ءِ سر ءَ بنجاھی وزیر سرفراز بگٹی ءَ امن ءُ ایمنی ءِ سرجمیں جاور ھال ءُ سیکورٹی ءِ گامگیج آنی ھوالگ ءَ بریفنگ دات۔ گند ءُ نند ءِ ساھت ءَ صوبائی ایکشن پلان ءِ نفاذ ءُ ایشی ءِ تہ ءَ دیم ءَ اتکگیں رکاوٹ آنی سر ءَ چار ءُ تپاسی کنگ بوت۔ اے موہ ءِ سر ءَ تران کنان ءَ وفاقی تہی کارانی وزیر محسن نقوی ءَ گوشت کہ فتنہ الهندستان ءِ ناشرکار آنی قسمت شرمندگی ءِ مرگ اِنت، بھارت ءِ سرپرستی ءَ ناشرکار ءُ آھانی آسراتی دیوک آناں ھلاس کنگ بیت، ءُ ریاستی رٹ ءَ را چیلنج کنوکیں آناں گوں آہنی دستاں کار کنگ بیت۔ وفاقی تہی کارانی وزیر ءَ گیش گوشت کہ ناشرکاری ءِ ھلاپ ءَ جنگ ءَ بلوچستان حکومت ءِ سرجمی ءَ کمک ءَ برجاہ دار ایت۔ آئی ءَ گوشت کہ پاکستان ءَ گوں دژمنیں عناصر آنی واستہ زمین سنگ کنگ بوتگ۔ بلوچستان ءِ سر وزیر میر سرفراز بگٹی ءَ گند ءُ نند ءِ ساھت ءَ وتی ھیالانی درشان کنان ءَ گوشت کہ وفاقی ءُ صوبائی حکومت اے گپ ءِ سر ءَ تپاک کن اَنت کہ اے جنگ سیکورٹی فورسز ءِ جنگ نہ اِنت بلکیں سرجمیں راج ءِ جنگ اِنت، ناشرکاری ءَ ھواریں عناصر ءِ ھلاپ ءَ آپریشن گیش ترند کنگ بوتگ اَنت۔ آئی ءَ گوشت کہ بلوچستان ءَ امن ءِ برجائی ءِ واستہ ریاستی ادارگ سرجمیں ھمگرنچی ءَ کار کنگ ءَ انت، سیکورٹی فورسز ءُ مہلوک ءِ قربانی بے سوب نہ رو انت، آ ہر قیمت ءَ امن ءِ برجائی ءَ کن انت۔