لاہور۔26جولائی (اے پی پی):عوامی جمہوریہ چین کے قونصل جنرل برائے لاہور ژا شیریں ءَ گوشت کہ چین ءُ پاکستان ءِ نیام ءَ سیادی وھد ءِ گرانیں چکاس ءِ تہ ءَ ھم مدام سوبمند، مھکم ءُ دراجیں بوتگ اَنت۔ چین پاکستان ءَ نوکیں ڈیم جوڑ کنگ ءِ واستہ تکنیکی کمک کنگ ءَ اِنت کہ موسمی بدلی ءِ ھلاپ ءَ جنگ ءُ آپی وسیلگ آناں جوانیں رنگ ءَ کارمرد کنگ ءِ واستہ سک باز المی ئیں گامگیج اِنت۔ اے ھیالانی درشانی آئی ءَ گوستگیں روچ ءَ پاکستان براڈکاسٹنگ کارپوریشن ءِ ماڑی ءَ جوڑ بوتگیں ایسوسی ایٹڈ پریس آف پاکستان اردو نیوز سروس ءِ تر ءُ تاب ءِ ساھت ءَ کت۔ قونصل جنرل ءِ ھمراھی ءَ مزن تک ءِ ڈل ھم ھوار ات۔ قونصل جنرل ژاؤ شیرین ءَ اے گپ ءِ سر ءَ زور پر دات کہ چین ایوک ءَ پاکستان ءَ تجارت یا توان ءِ شوبگ ءَ گوں بندوک نہ اِنت بلکیں بنیاتی ڈھانچگ ، ٹیکنالوجی ءِ دیمروئی ءُ چاگرد ءِ شوبگ ءَ ھم سرجمی ءَ کمک کنگ ءَ اِنت۔ ڈیم ءِ جوڑ کنگ ءَ چہ نہ ایوک ءَ توان ءِ بحران ءِ گیواری ءَ کمک رسیت بلکینگ ءَ پاکستان ءَ را موسمیاتی چیلنجز آں گوں گر ءُ چیل بوھگ ءِ وس ءُ واک ھم رس ایت۔ پاکستان ءِ جتاجتائیں دمگاں ڈیم ءِ جوڑ کنگ ءِ واستہ چینی ماہرین ٹیکنیکل کمک کنگ ءَ انت ءُ اے درگت ءَ بازیں منصوبگ آنی سر ءَ کار بوھگ ءَ انت۔ چینی قونصل جنرل ءَ چین ءُ پاکستان ءِ نیام ءَ دود ءُ ربیدگ ءِ سرپدی، وانگ ءُ زانگ ءِ سیادی ءُ راج دوستی ءَ را گیش دیمروئی دیگ ءِ ھاترا چینی زانتکار کنفیوشش ءِ نام ءَ پاکستان ءَ “کنفیوشش انسٹی ٹیوٹ” ءِ جوڑ کنگ ءِ واھشت ءِ درشانی کتگ۔ آئی ءَ گوشت کہ اے رنگیں ادارگ دوئیں ملک آنی ورنا آناں یک ءِ دومی ءِ زبان، تہذیب ءُ دود ءُ ربیدگ آنی گوما آشنا کنگ ءَ جوانیں کرد پیلو کن اَنت۔ دود ءُ ربیدگ ءِ سیادی ءَ را گیش مھکم کنگ ءِ دگہ کوشست ءِ تہ قونصل جنرل زیا شیرین ءَ جار جتگ کہ آیوکیں ماہ ءَ لاہور ءِ الحمرہ ہال ءَ چینی فلم فیسٹیول ءِ برجم دارگ بیت۔ اے فیسٹیول ءِ تہا دہ چینی فلم انگریزی ڈبنگ ءِ ہمراہی ءَ پیش کنگ بنت دانکہ پاکستانی مہلوک چینی دود ءُ ربیدگ ءَ شرتر سرپد بہ بنت۔ آئی ءَ گوشت کہ چینی زبان ءِ دربرگ وھد ءِ ضلورت انت ھاسیں رنگ ءَ ھما ادارگ آنی واستہ کہ آ دوئیں ملک آنی نیام ءَ سیادی آنی دیمروئی ءِ واستہ کرد پیلو کنگ ءَ انت۔ اے درگت ءَ آئی ءَ اشارہ کت کہ اے پی پی، ریڈیو پاکستان ءُ پاکستان ٹیلی ویژن ءِ وڑیں ادارگ آنی کارمند آناں چینی زبان ءِ وانگ ءِ موہ پجاڑیگیں کنگ بہ بیت۔ آئی ءَ وتی واھشت ءِ درشان کت کہ پاکستانی میڈیا ءِ ڈل ءَ را چین ءِ تر ءُ تاب ءَ دعوت دیگ بہ بیت تانکہ میڈیا ءِ نمائندہ چینی چاگرد ءُ میڈیا ءِ ادارگ آنی سر ءَ براہ راست وانگ ءَ بہ کن اَنت۔ قونصل جنرل ءَ آیوکیں وھد ءَ شادمن ءَ ’’چین چوک‘‘ ءِ تر ءُ تاب کنگ ءِ واھشت ءِ درشانی کت کہ ایشی ءِ نام 1964 ءَ چین ءِ ھما وھد ءِ مزن وزیر چو این لائی ءِ پاکستان ءِ راجدپتری تر ءُ تاب ءِ یات ءَ ایر کنگ بوتگ آئی ءَ گوشت کہ اے چوک دوئیں ملک آنی نیام ءَ دیریں دوستی ءِ علامت اِنت۔ تر ءُ تاب ءِ ساھت ءَ قونصل جنرل ءَ اے پی پی اردو نیوز، ویڈیو نیوز سروس ءُ فوٹو سیکشن ءَ ھوار جتا جتائیں محکمہ آنی چار ءُ تپاسی کت ءُ ادارگ ءِ پیشہ وارانہ معیار آناں ساڑات۔ آئی ءَ گوشت کہ اے پی پی نہ ایوک ءَ نیوز ریپورنگ ءِ شوبگ ءَ ھاسیں کرد پیلو کنگ ءَ انت بلکینگ ءَ پاکستان ءُ چین ءِ نیام ءَ مھکم ءُ جوانیں سیادی آناں دیمروئی دیگ ءَ ستا کرزیں ازمت ھم کنگ ءَ انت۔ ایشی ءَ چہ پیسر اے پی پی لاہور بیورو ءِ سروک طالب حسین ءَ محترمیں مہمان آناں تنظیم ءِ کارکردگی ءِ بابت ءَ سرپدی دات ءُ جتا جتائیں محکمہ آنی تر ءُ تاب ءَ کت۔ اے موہ ءِ سر ءَ انچارج اردو نیوز سروس محمد عبداللہ، ڈائریکٹر سائوتھ حافظ اعجاز بشیر، انچارج وی این ایس اعجاز الحق شہیدی اور اسپیشل کاریسپانڈنٹ ممتاز سلیم لنگاہ ھم ھوار اتنت۔ چیف رپورٹر انگلش نیوز سروس محمد نعیم خان نیازی ءَ محکمہ ءِ راجدپتر، ازمت ءُ دیمروئی ءِ مول ءُ مراد آنی بابت ءَ سرجمیں بریفنگ داتگ۔
