اسلام آباد۔25جولائی (اے پی پی): مزن وزیر محمد شہباز شریف ءَ وفاقی کانود ءِ وزیر اعظم نظیر تارڑ ءِ سروکی ءَ کمیٹی جوڑ کتگ ءُ دل یکیمی داتگ کہ ڈاکٹر عافیہ صدیقی ءِ کیس ءَ حکومت ھمک وڑیں کانود ءُ سفارتی کمک ءَ کنت۔ جمعہ ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ ڈاکٹر عافیہ صدیقی ءِ گہار ڈاکٹر فوزیہ صدیقی ءَ مزن وزیر محمد شہباز شریف ءَ گوں گند ءُ نند کتگ۔ مزن وزیر ءَ گوشت کہ حکومت ڈاکٹر عافیہ صدیقی ءِ معاملہ ءَ ھچ رنگ ءَ لاپرواہ نہ اِنت، آئی ءَ گوشت کہ حکومت ڈاکٹر عافیہ صدیقی ءِ معاملہ ءَ سفارتی ءُ کانودی کمک پجاری کنگ ءَ اِنت۔ مزن وزیر ءَ ڈاکٹر فوزیہ صدیقی ءَ را دل یکیمی دات کہ حکومت ڈاکٹر عافیہ صدیقی ءِ معاملہ ءَ ھمک ممکنیں کانودی ءُ سفارتی کمک ءَ برجاہ دار ایت۔ مزن وزیر ءَ اے معاملہ ءِ تہ ءَ گیش دیمروئی ءِ واستہ وفاقی وزیر کانود ءُ انصاف اعظم نظیر تارڑ ءِ سروکی ءَ کمیٹی ھم جوڑ کت۔ کمیٹی اے درگت ءَ ڈاکٹر فوزیہ صدیقی ءَ گوں رابطہ ءَ بیت ءُ المی ئیں ممکنہ کمک ءِ ھاتر ءَ کار کنت۔ زانگ بہ بیت مزن وزیر ءَ ایشی ءَ چہ پیسر ڈاکٹر عافیہ صدیقی ءِ ھوالگ ءَ ھما وھد ءِ امریکی صدر جو بائیڈن ءَ را نمدی ھم دیم داتگ ات۔
