راجی فوڈ سیکیورٹی ءُ پٹ ءُ پول ءِ بنجاھی  وزیر رانا تنویر حسین ءَ اقوام متحدہ ءِ فوڈ اینڈ ایگریکلچر آرگنائزیشن ءِ ڈل ءَ گوں گند ءُ نند کتگ، پاکستان ءِ کشت ءُ کشاری ءُ لائیو سٹاک ءِ شوبگ ءَ برجاھیں کمک ءِ سر ءَ چار ءُ تپاسی

اسلام آباد۔25جولائی  (اے پی پی): راجی فوڈ سیکیورٹی ءُ پٹ ءُ پول ءِ بنجاھی  وزیر رانا تنویر حسین ءَ اقوام متحدہ ءِ فوڈ اینڈ ایگریکلچر آرگنائزیشن ءِ مزنیں تک ءِ ڈل ءَ گوں گند ءُ نند کتگ تانکہ پاکستان ءِ کشت ءُ کشاری ءُ لائیو سٹاک ءِ شوبگ ءَ برجاھیں کمک ءِ سر ءَ چار ءُ تپاسی کنگ بوتگ ءُ آیوکیں وھد ءَ کمک ءِ واستہ گیشیں موہ آنی شوھازگ ءِ سر ءَ گپ ءُ تران کتگ۔ ایف اے او   ڈل ءِ سروکی ءَ اسسٹنٹ ڈائریکٹر جنرل ءُ دلوت ءِ پیداوار ءُ جان سلامتی ءِ شعبہ ءِ ڈائریکٹر تھناوت تینسین ءَ کتگ۔ اے موہ ءِ سر ءَ پاکستان ءَ ایف اے او ءِ نمائندہ فلورنس رول ھم ساڑی ات کہ آ پاکستان ءَ وتی چارسالی اسائنمنٹ ءَ سرجم کنگ ءَ انت۔ گند ءُ نند ءَ پاکستان ءُ ایف اے او ءِ نیام ءَ دیریں سیادی ءِ بابت ءَ گپ ءُ تران کنگ بوت کہ ایشی ءِ بندات 1947ءَ بوتگ ءُ مرچی اے شریکی ءَ ملک ءِ 94ضلع آنی تہ ءَ جاری جتا جتائیں منصوبگ آنی سر ءَ احاطہ کنگ بوتگ۔ بنجاھی  وزیر ءَ ایف اے او ءِ ھزمت آناں ساڑات کت ھاسیں رنگ ءَ زرعی شوبگ ءَ را جھان ءِ جوانیں کارروائی، تکنیکی کمک ءُ پالیسی کمک ءِ پجارینگ ءِ واستہ۔ آئی ءَ ایف اے او ءِ نوکیں گلوبل ورک پلان ءِ وش اتک کت کہ ایشی ءَ را 194باسکی ملک آنی گوما شور ءُ سلاھ ءَ تیار کنگ بوتگ ءُ ایشی ءِ سر ءَ عمل کنگ ءِ تہ ءَ پاکستان ءِ سرجمیں بھر زوری ءِ واھشت ءِ درشان کت۔ بنجاھی  وزیر ءَ کشت ءُ کشاری ءُ لائیو اسٹاک ءِ شوبگ ءَ را زندگ کنگ، فوڈ سیکیورٹی ءَ را دل یکیمی کنگ ءُ ویلیو ایڈڈ ایکسپورٹ ءَ را دیمروئی دیگ ءِ واستہ حکومت ءِ جزم ءِ درشان کت۔ آئی ءَ درملکی سرمایہ کاری ءِ متحرک کنگ ءِ تہ ءَ ایف اے او ءِ کمک ءِ توسیپ کت۔ تھناوت تھینسن ءَ پاکستان ءِ لائیو اسٹاک ءِ شوبگ ءِ بے دروریں توانائی ءِ سر ءَ زور پر دات ءُ نادراھی آنی گر ءُ دار، فوڈ سیفٹی ءُ برآمداتی کوالٹی ءِ تہ ءَ گہتری ءِ واستہ حکومت ءِ گامگیج آناں ساڑات۔ بنجاھی  وزیر ءَ ڈل ءَ را گوشت کہ پاکستان ءَ انوگیں وھد ءَ نیشنل ایگری ٹریڈ اینڈ فوڈ سیفٹی اتھارٹی (نیفسا) جوڑ کتگ۔ آئی ءَ گوشت کہ پاکستان اے اتھارٹی ءَ مصر ءِ سوبمندیں ادارگی ماڈل ءِ سر ءَ جوڑ کنگ لوٹ ایت۔ مصر ءِ نیفسا ءَ را فوڈ سیکیورٹی ءِ واستہ یک موثریں ماڈل ءِ رنگ ءَ منگ بوتگ کہ ایشی ءَ چہ پاکستان دربرگ ءِ شوقین اِنت۔ اے درگت ءَ پاکستان ءِ نیمگ ءَ چہ ٹیکنیکل ڈل مصر ءِ تر ءُ تاب ءَ کنت تانکہ اودا منظور بوتگیں جوانیں پالیشی ءُ ادارگی ڈھانچہ آنی سر ءَ پٹ ءُ پول بہ کنت۔ بنجاھی  وزیر ءَ اے گپ ءِ سر ءَ زور پر دات کہ گوستگیں بازیں سالاں پاکستان ءَ ایف اے او ءَ وزیر ءِ کشت ءُ کشاری ءِ نمائندگی نہ بوتگ ایشی ءَ را زوتاں چہ زوت بحال کنگ بہ بیت۔ تھناوت تھینسن ءَ برازیل ءِ زرعی دیمروئی ماڈل ءَ را پاکستان ءِ واستہ یک پٹ ءُ پولے ءِ رنگ ءَ بیان کتگ کہ آئی ءَ پٹ ءُ پول ءُ نوآبادیاتی وسیلگ ءَ چہ وردن ءِ کمی ءَ چہ یک مزنیں وردن ءِ برآمد کنوکیں ملک جوڑ بوھگ ءِ سفر کتگ۔ بنجاھی  وزیر ءَ پاکستان زرعی پٹ ءُ پولی کونسل ءِ زندگ کنگ ءِ وتی عزم ءِ پدا زور دات ءُ مزن وزیر ءِ وژن ءِ رد ءَ سائنس ءِ بنیات ءَ زرعی دیمروئی ءِ گوما یکجا کنگ ءِ بابت ءَ گپ ءُ تران کت۔ آئی ءَ چین ءُ یورپ ءِ سروکیں پٹ ءُ پولی ادارگ آنی گوما کمک ءَ را گیش کنگ ءِ واستہ ھم دلگوشی ءِ درشانی کت۔ بنجاھی  وزیر ءَ ایف اے او ءِ تہا پاکستان ءِ مستقل نمائندہ محبوب ءِ کرد ءَ را ساڑات، آئی ءَ دو نیمگی سفارتی سیادی ءَ را دیمروئی دیگ ءَ مزنیں کرد پیلو کتگ۔ اے موہ ءِ سر ءَ اے گپ ھم سرپد کنگ بوت کہ ایف اے او ءَ کوویڈ 19 ءِ وبا ءِ وھد ءَ پاکستان ءَ را کمک ءِ واستہ 20ملین ڈالر ءِ کمک داتگ ایشی ءَ چہ دلوت آنی جان سلامتی ءِ نظام ءُ نادراھی آنی گر ءُ دار ءِ گنجائش ءَ را گہتری اتکگ۔ گند ءُ نند ءِ گڈ ءَ بنجاھی  وزیر رانا تنویر حسین ءَ ایف اے او ءِ گوما وتی شریکداری ءَ را گیش مھکم کنگ ءِ واستہ پاکستان ءِ عزم ءِ سر ءَ زور پر دات۔ آئی ءَ گوشت کہ پائیدار کشت ءُ کشاری، لائیو سٹاک ءِ دیمروئی، ءُ فوڈ سیکیورٹی حکومت پاکستان ءِ اولی ترجی آنی تہ ءَ ھوار انت ءُ اے پڑ ءَ وت مہ وتی کمک ءَ را گیش دیمروئی دیگ بیت۔