منصوبہ بندی ءِ بنجاھی  وزیر احسن اقبال ءَ ورلڈ بینک ءِ نائب صدر عثمان ڈی اون ءَ گوں گند ءُ نند کتگ، دو نیمگی کمک، اقتصادی دیمروئی، موسمیاتی بدلی ءِ چیلنج ءُ چاگردی دیمروئی ءِ بابت ءَ گپ ءُ تران

اسلام آباد۔25جولائی  (اے پی پی): منصوبگ بندی، دیمروئی ءُ ھاسیں گامگیج آنی بنجاھی  وزیر پروفیسر احسن اقبال ءَ میاں اوستمانی ءُ شمالی افریقہ ءِ واستہ ورلڈ بینک ءِ نائب صدر عثمان ڈی اون ءَ گوں گند ءُ نند کت۔ گند ءُ نند ءِ تہ ءَ دو نیمگی کمک، اقتصادی دیمروئی، موسمیاتی مٹ ءُ بدلی ءِ چیلنج ءُ چاگردی دیمروئی ءَ ھوار بازیں ھاسیں بنگپانی سر ءَ ھیال ریچی کنگ بوت۔ ورلڈ بینک ءِ نائب صدر ءَ پاکستان ءِ اقتصادی دیمروئی ءِ تہ ءَ احسن اقبال ءِ ازمت آناں ساڑات ءُ جاری اصلاحات ءِ گامگیج آنی سر ءَ دل یکیمی ءِ درشان کت۔ احسن اقبال ءَ گوشت کہ وزارت ءِ منصوبگ بندی ءُ ورلڈ بینک ءِ نیام ءَ جوڑ بوتگیں شریکداری ءَ را گیش موثر ءُ فعال جوڑ کنگ ءِ ضلورت انت تانکہ دیمروئی ءِ مول ءُ مراد زوت سرجم کنگ بہ بنت۔ آئی ءَ اے گپ ءِ سر ءَ زور پر دات کہ دگنیا صنعتی معیشت ءَ چہ ٹیکنالوجی بنیات ءِ معیشت ءِ نیمگ ءَ رھادگ بوھگ ءَ انت ءُ پاکستان ءَ را ھم ایکسپورٹ بنیات ءِ دیمروئی ماڈل ءِ وتی کنگ ءِ ضلورت انت۔ بنجاھی  وزیر ءَ میاں اوستمانی براتی ءَ را زور پر دات کہ آ بھارت ءَ را سندھ ءِ آپانی معاہدے ءِ خلاف ورزی ءَ چہ بہ رکّین ایت، پرچا کہ آپ ءَ را سلاہ بند کنگ جھان ءِ امن ءِ واستہ یک خطرناکیں رجحان اِنت۔ سندھ ءِ آپانی منوگری ءِ ھلاپ ورزی ءِ سبب ءَ دگنیا ءَ وردن ءُ آپ ءِ شدیدیں بحران ءِ آماچ بوت کنت۔ آپ ءِ جیڑھ ایوک ءَ پاکستان ءِ جیڑھ نہ انت بلکیں سرجمیں دگنیا ءِ مشترکہ جیڑھ انت ۔ احسن اقبال ءَ گیش گوشت کہ پاکستان ءَ مہنگائی ءِ گر ءُ دار ءِ واستہ سکیں پیسلہ کنگ بوتگ ایشی ءِ جوانیں آسر دیم ءَ آیگ ءَ بندات بوتگ اَنت۔ پاکستان اسٹاک مارکیٹ ءَ یک لکھ 30ہزار پوائنٹ ءِ سرا چہ سرمایہ کار آنی اعتماد ءِ بحالی ءِ ثبوت انت۔ آئی ءَ گوشت کہ حکومت ءِ مول ءُ مراد برآمدات ءَ را 32ارب ڈالر ءَ چہ 100ارب ڈالر ءَ سر کنگ اِنت۔ منصوبگ بندی ءِ وزیر ءَ زھگانی دیمروئی ءِ جیڈھ ءَ را یک سنگینیں راجی چیلنج لیک اِتگ ءُ گوشت کہ حکومت ایشی ءِ سر ءَ چہ گر ءُ چیل بوھگ ءِ واستہ ٹھوس گامگیج کنگ ءَ اِنت۔ آئی ءَ گوشت کہ ملک ءَ ہائیر ایجوکیشن ءِ وانگ ءِ نودربر آنی تہ ءَ مزنیں کساسے ءَ گیشی بوتگ، وھدیکہ دیمروئی ءِ تہ ءَ زالبول آنی فعالیں کرد کلیدی اِنت۔ احسن اقبال ءَ درائینتگ کہ وزارت منصوبہ بندی ءَ اقتصادی اصلاحات ءِ ھاتر ءَ ”پنچ آس“ ءِ چارچوب جوڑ کتگ کہ دیمروئی ءِ ھاتر ءَ یک جامع روڈ میپ ءِ دات کنت۔ آئی ءَ ورلڈ بینک ءِ سر ءَ زور پر دات کہ آ پاکستان ءَ موسمی مٹ بدلی ءِ آسر آناں گر ءُ دار ءِ واستہ وتی کمک ءَ را گیش موثر جوڑ بہ کنت۔ بنجاھی  وزیر ءَ گوشت کہ 2022ءِ تباہ کنوکیں سیلاب ءَ پاکستان ءِ پدمنتگیں دمگ آناں سک باز تاوان داتگ ءُ موسمی بدلی ءِ بار دیمروئی کنوکیں ملک آنی سر ءَ بے تناسب ءَ گیش اِنت، ایشی ءِ واستہ میاں اوستمانی براتی ءَ را وتی کرد پیلو کنگی اِنت۔