آسیان ءِ ملک آنی گوما تجارتی ءُ سرمایہ کاری ءِ سیادی ءَ را گیش مھکم کنگ لوٹ ایت، وفاقی وزیر رانا تنویر حسین ایف پی سی سی آئی ءِ نیمگ ءَ برجم داشتگیں مراگش ءَ گوں تران

اسلام آباد۔24جولائی  (اے پی پی): راجی وردن ءُ وراک ءِ سلامتی ءُ پٹ ءُ پول ءِ وفاقی وزیر رانا تنویر حسین ءَ گوشت کہ پاکستان ءِ آسیان ءِ ملک آنی گوما راجدپتری، دود ءُ ربیدگی ءُ اسٹریٹجک سیادی ءِ تہ ءَ گہتریں سیادی است انت ءُ تجارتی ءُ سرمایہ کاری ءِ سیادی ءَ را گیش مھکم کنگ ءِ واھشت مند انت۔ پنچ شمبے ءِ روچ ءَ ایف پی سی سی آئی ءِ نیمگ ءَ برجم داشتگیں ’’پاکستان ءُ آسیان ءِ دمگ ءِ نیام ءَ اقتصادی یکوئی‘‘ ءِ سرھال ءِ سر ءَ بنداتی دیوان ءَ گوں تران کنان ءَ آئی ءَ اقتصادی سیادی ءَ را گیش دیمروئی دیگ ءِ سر ءَ زور پر دات۔ اے موہ ءَ آسیان ءِ ملک آنی سفارتکار، مزنیں سرکاری کارندہ، کاروباری رہشون ءُ جتا جتائیں شعبہ آنی نمائندگ آں بہر زرتگ۔ وفاقی وزیر ءَ پاکستان ءُ آسیان ءِ دمگ ءِ نیام ءَ اقتصادی سیادی ءَ را گیش مھکم کنگ ءِ ارزشت ءِ سر ءَ زور پر دات۔ آئی ءَ ایف پی سی سی آئی ءِ متحرک صدر عاطف اکرام شیخ ءِ توسیپ کت کہ آئی ءَ اے وھد ءِ سر ءَ ءُ دور اندیشیں دیوان ءِ بندوبست کتگ۔ آئی ءَ گوشت کہ آسیان ءِ آبادی 700ملین ءَ چہ گیش اِنت ءُ یکجاھیں جی ڈی پی 3 ٹریلین ڈالر ءَ چہ گیش اِنت، جھان ءِ معیشت ءِ تہ ءَ یک موثریں بلاک ءِ رنگ ءَ دیم ءَ اتکگ۔ پاکستان ءِ آسیان ملک آنی گوما راجدپتری، دود ءُ ربیدگی ءُ اسٹریٹجک سیادی ءِ تہ ءَ گہتریں سیادی است انت ءُ نوں آ تجارتی ءُ سرمایہ کاری ءِ سیادی ءَ را گیش مھکم کنگ ءِ واھشت مند انت۔ رانا تنویر حسین ءَ گوشت کہ وت مہ وتی توانائی ءِ باوجود پاکستان ءُ آسیان ءِ نیام ءَ تجارتی کساس وتی راستیں توانائی ءَ چہ باز کم انت۔ آئی ءَ تجارتی رکاوٹ آناں دور کنگ، برآمدات ءِ جمہ کار ءَ را گیش کنگ ءُ دو نیمگی ءُ کثیر نیمگی سرمایہ کاری ءَ را دیمروئی دیگ ءِ واستہ یکجائی کوشست کنگ ءِ لوٹ کتگ۔ آئی ءَ ھاسیں رنگ ءَ ٹیکسٹائل، زراعت، دواسازی، آئی ٹی ءُ توانائی ءِ وڑیں شوبگ آنی سر ءَ زور پر دات کہ اودا یکوئی کمک ءَ چہ جوانیں آسراتی رس ایت۔ آئی ءَ ٹیکنالوجی ءِ ٹرانسفر، ڈیجیٹل کاروباری ءُ ہنر ءِ دیمروئی ءِ پڑ ءَ کمک ءِ ضلورت ءِ سر ءَ ھم زور پر دات ءُ گوشت کہ پاکستان نوآبادیاتی، پیشہ وارانہ تربیت ءُ ورنا آنی دیمروئی ءِ پڑ ءَ آسیان ءِ ملک آنی تجروبت آں چہ سیت چست کت کنت۔ آئی ءَ مردم آنی نیام ءَ رابطہ، سیل ءُ سواد، وانگ ءُ زانگ ءِ تبادلہ ءُ دود ءُ ربیدگی شریکداری ءِ دیمروئی ءِ واستہ ویزا پالیسی آنی تہ ءَ نرمی ءِ سوج دات۔ آئی ءَ اے گپ ءِ سر ءَ زور پر دات کہ مردم آنی نیام ءَ سیادی اعتماد ءِ جوڑ کنگ ءُ برجمیں شریکداری ءِ تہ ءَ کلیدی کرد پیلو کنت۔ آئی ءَ خطہ ءِ جغرافیائی رابطہ ءِ ارزشت ءَ را زور پر دات ءُ گوشت کہ پاکستان سی پیک ءِ وسیلگ ءَ میاں اوستمانی ایشیا ءُ میاں اوستمانی تک ءِ گیٹ وے ءِ کرد ءَ پیلو کت کنت وھدیکہ آسیان پاکستان ءَ را مشرقی ایشیا ءُ پیسفک ءِ دمگ ءَ گوں گیش جوڑ کت کنت۔ وفاقی وزیر ءَ وتی کلوہ ءِ تہ ءَ یک رندے پدا گوشت کہ پاکستان ءِ حکومت خطہ ءَ اقتصادی یکوئی ءُ تجارتی سفارتکاری ءَ را دیمروئی دیگ ءِ واستہ سرجمی ءَ جزمیگ اِنت۔ آئی ءَ ایف پی سی سی آئی، ایکوسی ءُ سی اے سی سی ءِ وڑیں ادارگ آنی کرد ءِ توسیپ کت کہ آ دمگی کمک ءُ کاروباری شریکداری ءِ دیمروئی ءِ تہ ءَ المی کرد پیلو کنگ ءَ اَنت۔ آئی ءَ گوشت کہ اے گند ءُ نند ایوک ءَ گپ ءُ تران ءِ نہ انت بلکینگ ءَ یکجائی دیمروئی، دمگی برجائی ءُ وت مہ وتی وشھالی ءِ نیمگ ءَ یک ھاسیں روڈ میپ ءِ انت۔ وفاقی وزیر رانا تنویر حسین ءَ شریکیں درستیں مردم آناں زور پر دات کہ آ باقاعدہ معاہدہ آں چہ دیم ءَ بہ رو اَنت ءُ یکجائی منصوبگ، تجارتی تبادلہ ءُ مھکمیں دیمروئی ءِ گامگیج آنی سر ءَ عمل کنگ ءِ نیمگ ءَ بہ رو اَنت۔ آئی ءَ یک رندے پدا گوشت کہ پاکستان آسیان ءِ ملک آنی گوما دست ءُ دپ کنگ ءَ تیار اِنت تانکہ سرجمیں تجارتی، اسٹریٹجک کمک ءُ دائمی دوستی ءِ نوکیں دور ءِ بندات کنگ بہ بیت۔