اسلام آباد۔24جولائی (اے پی پی): مزن وزیر محمد شہباز شریف ءَ ورلڈ بینک ءِ نیمگ ءَ سندھ ءِ آپانی دوبر منوگری ءِ سر ءَ بھارت ءِ یک نیمگی ءُ ناجائزیں کارروائی آنی ھلاپ ءَ پاکستان ءِ جائزیں موقف ءِ اصولی حمایت ءِ توسیپ کنان ءَ میاں اوستمانی کانود ءِ برجائی ءِ واستہ پاکستان ءِ عزم ءِ درشانی کت ءُ دمگی امن ءِ وسیلگ ءَ سرجمیں جیڈھ ءِ سر ءَ زور پر دات۔ پنچ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ گوں ورلڈ بینک ءِ میاں اوستمانی، شمالی افریقہ، اوگانستان ءُ پاکستان ءِ دمگی نائب صدر عثمان ڈائیون ءَ گند ءُ نند کت۔ مزن وزیر ءَ ورلڈ بینک ھاسیں رنگ ءَ ورلڈ بینک ءِ صدر اجے بنگا ءُ پاکستان ءِ واستہ پیسریگیں ورلڈ بینک ءِ کنٹری ڈائریکٹر ناجی بن حسین ءِ دل ءِ تہ ءَ چہ منت واری ءِ درشان کت کہ آھاں پاکستان ءِ واستہ نوکیں ملکی شراکت داری فریم ورک (سی پی ایف) ءَ را دیم ءَ برگ ءِ واستہ ھاسیں کرد پیلو کتگ۔ مزن وزیر ءَ پاکستان ءِ دیمروئی ءِ اولیت آنی کمک ءَ سی پی ایف ءِ اسٹریٹجک کرد ءَ را ساڑات، ھاسیں رنگ ءَ توانائی، انسانی وسائل، موسمی مٹ ءُ بدلی ءُ گورننس اصلاحات ءِ شوبگ آنی تہ ءَ۔ مزن وزیر ءَ سندھ ءِ آپانی معاہدہ ءِ یک ھاسیں میاں اوستمانی معاہدہ ءِ رد ءَ بھارت ءِ یک نیمگی ءُ غیر قانونی کارروائی آنی رژنائی ءَ پاکستان ءِ جائزیں موقف ءِ واستہ ورلڈ بینک ءِ نیمگ ءَ چہ اصولی کمک ءِ توسیپ کت۔ آئی ءَ میاں اوستمانی کانود ءِ برجائی، وشھالی ءِ ھاترا پاکستان ءِ عزم ءِ سر ءَ زور پر دات ءُ دمگی امن ءِ برجائی ءِ ھاترا پاکستان ءِ جزم ءِ سر ءَ زور پر دات۔ آئی ءَ پاکستان ءِ ھمک جیڈھ آں گپ ءُ تران ءِ وسیلگ ءَ گیش ءُ گیوار کنگ ءِ جزم ءِ ھم درشان کت۔ مزن وزیر ءَ 2022ءِ تباہ کنوکیں سیلاب ءِ وھد ءَ وھد ءِ سر ءَ ءُ دل ءِ جہلانکی ءَ کمک ءِ سر ءَ ورلڈ بینک ءِ منت گپت، ایشی ءَ چہ پاکستان ءَ را ترندیں کمکی کوشست ءُ نوک جوڑیشت ءُ بحالی ءِ گامگیج آنی بندات کنگ ءَ کمک رستگ۔ عثمان دیون ءَ مزن وزیر شہباز شریف ءِ پاکستان ءِ تر ءُ تاب ءِ وھد ءَ گرمیں مہمان داری ءِ پد ءَ آئی ءِ شگر ءُ منت گپت۔ آئی ءَ معیشت ءِ کلیدی شوبگ آنی تہ ءَ پاکستان ءِ دیریں شریکداری ءُ کمک آناں گیش وسعت دیگ ءِ واستہ ورلڈ بینک ءِ جزم ءِ سر ءَ زور پر دات۔ ڈیون ءَ پاکستان ءِ برجاھیں میکرو اکنامک ریکوری ءِ توسیپ کت ءُ مزن وزیر شہباز شریف ءِ حکومت ءِ توسیپ کت کہ آ ملک ءَ را اقتصادی استحکام ءُ پائیدار دیمروئی ءِ نیمگ ءَ رھشونی کنگ ءَ انت۔ آئی ءَ ھاسیں رنگ ءَ انوگیں انتظامیہ ءِ اصلاحات ءِ ایجنڈا ءِ ھم ساڑات۔ آئی ءَ مزن وزیر شہباز شریف ءِ مھکمیں سروکی ءَ را ادارگی اصلاحات ءَ را دیم ءَ برگ، سرمایہ کار آنی اعتماد ءِ بحال کنگ ءُ ھواریں اقتصادی دیمروئی ءَ را دیم ءَ برگ ءِ واستہ المی لیک اتگ۔ گند ءُ نند ءَ پاکستان ءِ حکومت ءُ ورلڈ بینک ءِ یکجائی جزم ءِ درشان کنگ بوت کہ آیوکیں سال آنی تہ ءَ دراجیں مدت ءِ دیمروئی ءِ مول ءُ مراد آنی سرجمی ءُ پاکستان ءِ الس ءِ وشھالیں باندات ءِ جوڑ کنگ ءِ واستہ کمک ءَ را گیش مھکم کنگ بیت۔
