پاکستان ءَ مصر ءِ سفیر ءَ مزن وزیر ءِ ھاسیں کمکار رانا احسان افضل خان ءَ گوں گند ءُ نند

اسلام آباد۔23جولائی  (اے پی پی): پاکستان ءَ مصر ءِ سفیر ڈاکٹر ایہاب عبدالحمید حسن  ءَ مزن وزیر ءِ تجارت ءِ بابت ءَ ھاسیں کمکار رانا احسان افضل خان ءَ گوں گند ءُ نند کت۔ چار شمبے ءِ روچ ءَ وزارت تجارت ءِ نیمگ ءَ جاڑی بوتگیں پریس ریلیز ءِ رد ءَ گند ءُ نند ءَ پاکستان ءُ مصر ءِ نیام ءَ دو نیمگی تجارت ءِ تہ ءَ گیشی ءِ راہ آنی سر ءَ ھیال ریچی کنگ بوتگ۔ اے موہ ءِ سر ءَ مصر ءِ سفیر ءَ گوشت کہ پاکستان ءُ مصر ءِ یکجاھی رنگ ءَ جھان ءِ مسلمان آبادی ءِ مزنیں بھر ءِ نمائندگی کنگ ءِ باوجود انوگیں تجارتی کساس کم اِنت۔ آئی ءَ تجارتی سیادی ءَ را گیش مھکم کنگ ءِ ضلورت ءِ سر ءَ زور پر دات ءُ گوشت کہ پاکستان ءِ جتاجتائیں چیمبر آف کامرس ءِ چیئرمین آں گوں پیسر ءَ گند ءُ نند کتگ تانکہ تجارت ءِ تہ ءَ گیشی ءِ واستہ نوکیں راہ ءُ درانی پٹ ءُ پول کنگ بہ بیت۔ سفیر ءَ پاکستان ءُ مصر ءِ نیام ءَ وشیں تجارتی سیادی ءِ آسراتی ءِ واستہ ترجیحی تجارتی معاہدہ ءِ جوڑ کنگ ءِ تجویز پیش کتگ۔ کمک ءَ را ادارگ جوڑ کنگ ءِ واستہ سفیر ءَ فیڈریشن آف پاکستان چیمبرز آف کامرس اینڈ انڈسٹری ءُ آئی ءِ مصری ہم منصب ءِ نیام ءَ یک مفاہمت نامہ ءِ سر ءَ دستخط کنگ ءِ سفارش کتگ ءُ ہمے رنگ ءَ مصر ءُ پاکستان ءِ بزنس کونسل ءِ جوڑ کنگ ءِ سفارش کتگ کہ ایشی ءِ تہ ءَ مسالہ، دوا ءُ درمان ءُ سرگی ءِ سر ءَ دلگوشی دیگ بیت۔ مزن وزیر ءِ تجارت ءِ ھاسیں کمکار ءَ دل یکیمی دات کہ وزارت تجارت اے گامگیج آنی سرجمیں کمک ءَ کنت ءُ دوئیں ملک آنی نیام ءَ تجارتی سیادی ءَ را گیش کنگ ءِ واستہ گامگیج آناں آسراتی دنت۔ آئی ءَ مصر ءِ گوما مھکمیں تجارتی سیادی آناں دیمروئی دیگ ءِ واستہ وزارت تجارت ءِ عزم ءِ سر ءَ زور پر دات ءُ برآمد کنوک ءُ سرمایہ کار آنی واستہ سازگاریں چاگرد ءِ جوڑ کنگ ءِ واستہ وتی عزم ءِ سر ءَ زور پر دات۔