ورلڈ بینک ءِ نائب صدر ءَ اقتصادی امور ءِ وفاقی وزیر احد خان چیمہ ءَ گوں گند ءُ نند کت، پاکستان ءُ ورلڈ بینک ءِ نیام ءَ ملکی شریکداری فریم ورک ءِ بابت ءَ گپ ءُ تران بوت

اسلام آباد۔23جولائی  (اے پی پی): وفاقی وزیر برائے اقتصادی کار احد خان چیمہ ءَ گوں چار شمبے ءِ روچ ءَ میاں اوستمانی، شمالی افریقہ، اوگانستان ءُ پاکستان ءِ دمگ ءِ واستہ ورلڈ بینک ءِ نائب صدر عثمان ڈیون ءَ گوں گند ءُ نند کت۔ وزارت اقتصادی امور ڈویژن ءِ جارکش ءِ رد ءَ گند ءُ نند ءَ پاکستان ءُ ورلڈ بینک ءِ نیام ءَ ملکی شریکداری فریم ورک (سی پی ایف) ءِ سر ءَ سرجمیں رنگ ءَ گپ ءُ تران کنگ بوت۔ وفاقی وزیر احد چیمہ ءَ میاں اوستمانی، شمالی افریقہ ءُ اوگانستان ءِ دمگ ءَ پاکستان ءِ ھوار کنگ ءَ را ورلڈ بینک ءِ یک جوانیں ءُ وھد ءِ پیسلہ لیک اتگ۔ احد چیمہ ءَ اے گپ ءِ سر ءَ زور پر دات کہ سی پی ایف ءِ سر ءَ عمل درآمد ءِ واستہ یک سرجمیں ءُ یکجاھیں حکمت عملی ءِ جوڑ کنگ بیت۔ آئی ءَ گوشت کہ ورلڈ بینک ءِ ملکی کارگس پاکستان ءِ حکومت ءِ گوما سرجمی ءَ کمک کنگ ءَ انت ءُ اقتصادی اصلاحات ءِ تہ ءَ ورلڈ بینک ءِ کرد ستا کرز انت۔ آئی ءَ ورلڈ بینک ءِ سروکی ءِ بے دروریں کمک ءِ سر ءَ منت واری ءِ درشان کت ءُ گوشت کہ وفاقی حکومت صوبائی حکومت آنی گوما کمک ءَ سی پی ایف ءِ جوانیں رنگ ءَ عمل کنگ ءِ واستہ جزم انت۔ ورلڈ بینک ءِ نائب صدر عثمان دیون ءَ اے موہ ءِ سر ءَ گوشت کہ ورلڈ بینک پاکستان ءَ اقتصادی اصلاحات ءُ دیمروئی منصوبگ آناں سرجمی ءَ کمک ءَ برجاہ دار ایت۔ آئی ءَ سی پی ایف ءُ ایندگر اقتصادی گامگیج آنی تہ ءَ حکومت ءِ پاکستان ءِ کوشست آناں ساڑات۔