اسلام آباد۔23جولائی (اے پی پی):مزن وزیر محمد شہباز شریف ءَ پاکستان ءُ برطانیہ ءِ نیام ءَ دو نیمگی کمک ءِ سر ءَ دل یکیمی ءِ درشان کتگ ءُ گوشت کہ دوئیں ملک آنی نیام ءَ انوگیں بیپاری گپ ءُ تران دوئیں ملک آنی واستہ سیت مند ثابت بنت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ چار شمبے ءِ روچ ءَ پاکستان ءِ واستہ برطانیہ ءِ ہائی کمشنر جین میریٹ ءَ مزن وزیر محمد شہباز شریف ءَ گوں گند ءُ نند کتگ۔ مزن وزیر ءَ بادشاہ چارلس دوم ءُ برطانیہ ءِ مزن وزیر کیر اسٹارمر ءِ واستہ نیکیں واھگ آنی درشان کت ءُ گوشت کہ اے سال ءِ گڈ ءَ برطانوی ہائی کمشنر ءِ گوما گند ءُ نند ءِ واھشت مند آں ۔ آئی ءَ پی آئی اے ءِ بالی گراب آناں پدا بندات کنگ ءِ برطانوی حکومت ءِ پیسلہ ءَ را وش اتک کت ءُ گوشت کہ اے جوانیں گامگیج ءَ چہ برطانوی پاکستانی کمیونٹی ءَ را ھما جیڈھ آناں چہ دیم ءَ رؤگ ءَ کمک رسیت ءُ مردم آنی نیام ءَ مردم آنی تبادلہ ءَ را ھم گیش کنگ بیت۔ آئی ءَ اے درگت ءَ ہائی کمشنر ءِ جوانیں کرد ءَ را ھاسیں رنگ ءَ ساڑات۔ مزن وزیر ءَ پاکستان ءُ برطانیہ ءِ نیام ءَ دو نیمگی کمک ءِ جوانیں رپک ءِ سر ءَ دل یکیمی ءِ درشان کت ءُ گوشت کہ دوئیں ملک آنی نیام ءَ انوگیں آسر بوتگیں بیپاری گپ ءُ تران دوئیں ملک آنی واستہ وت مہ وتی پائدگ ءِ ثابت بنت۔ آئی ءَ گوشت کہ اقوام متحدہ ءِ سلامتی کونسل ءِ تہ ءَ ھم پاکستان برطانیہ ءِ گوما نزیکی ءَ گوں کمک کنگ ءَ انت، ایشی ءِ سروکی اے وھد ءَ پاکستان انت۔ گند ءُ نند ءَ جنوبی ایشیا ءُ میاں اوستمانی دمگی جاورانی بابت ءَ ھم گپ ءُ تران کنگ بیت ۔ مزن وزیر ءَ پاکستان ءُ بھارت ءِ نیام ءَ جیڈھ ءَ را کم کنگ ءَ برطانیہ ءِ کرد ءَ را ساڑات ءُ یک رندے پدا گوشت کہ پاکستان بھارت ءِ گوما توامیں بُستیں جیڈھ آنی سر ءَ بامردیں گپ ءُ تران ءِ واستہ تیار اِنت۔ برطانوی ہائی کمشنر ءَ مزن وزیر ءَ را لندن ءِ گوستگیں تر ءُ تاب ءِ بابت ءَ سرپد کت ایشی ءِ تہ ءَ پاکستان ءُ برطانیہ ءِ دو نیمگی سیادی آناں گیش کنگ ءِ ھوالگ ءَ مزنیں شور ءُ سلاھ کت۔ برطانوی ہائی کمشنر ءَ مزن وزیر ءِ وژن ءُ سروکی ءِ چیر دستی ءَ گوستگیں یک ءُ نیم سال آنی تہ ءَ حکومت ءِ اقتصادی کارکردگی ءِ توسیپ کت کہ ایشی ءَ چہ درستیں کلیتی میکرو اکنامک اشاریہ آنی تہ ءَ مزنیں گہتری اتکگ۔ گند ءُ نند ءِ ساھت ءَ برطانوی ہائی کمشنر ءَ مزن وزیر ءَ گوں جنوبی ایشیا ءُ میاں اوستمانی تک ءَ دمگی دیمروئی ءِ ھوالگ ءَ برطانیہ ءِ لیکہ ءِ سر ءَ ھیال ریچی کت۔
