چیئرمین سینیٹ ءَ ھور ءُ سیلاب ءِ سبب ءَ گران بھائیں انسانی جان ءُ مالی تاوان ءِ سرا غم ءِ درشانی کتگ، آماچیں دمگاں موثر ریسکیو ءُ ریلیف ءِ گامگیج آنی پنت ءُ شون

اسلام آباد۔22جولائی  (اے پی پی): سینیٹ ءِ چیئرمین سید یوسف رضا گیلانی ءَ ملک ءِ جتا جتائیں دمگاں ھاسیں رنگ ءَ بابوسر ٹاپ، مظفر آباد، لوئر دیر،سوات ءُ ایندگر بازیں جاہاں  گران بھائیں بنی آدم آنی مالی ءُ جان تاوان بار ءِ پد ءِ دلپدردی ءِ درشان کتگ۔  سئے شمبے ءِ روچ ءَ سینیٹ سیکرٹریٹ ءِ نیمگ ءَ جاڑی بوتگیں بیان ءِ رد ءَ چیئرمین سینیٹ ءَ گوشت کہ آماچیں ھاندان آنی غم ءَ سرجمیں راج یک پیم ءَ بھر زوریت ءُ اے گرانیں وھد ءَ مارا درستاں یکوئی، ھمدردی ءُ ترندیں عملی گامگیج آنی ضلورت اِنت۔ آئی ءَ آماچیں ھاندان ءِ گوما دل ءِ جہلانکی ءَ ھمدردی ءِ درشانی کنان ءَ بیران بوتگیں مردمانی بستار ءِ بُرز کنگ ءُ ٹپیگ آنی زوت جان سلامتی ءِ دعا کتگ۔ آئی ءَ پاکستان ءِ حکومت، این ڈی ایم اے، صوبائی حکومت ءُ ایندگر سیادی داروکیں ادارگ آناں لوٹ کتگ کہ آ آماچیں دمگ آنی تہ ءَ زوتیں وھد ءَ موثر ریسکیو ءُ ریلیف ءِ گامگیج بہ زور اَنت ھاسیں رنگ ءَ ھما دمگ آنی تہ ءَ کہ ابر ءِ ٹکر یا زمین چنڈ ءِ وڑیں ہنگامی جاور ھال بوتگ اَنت۔ آئی ءَ گوشت کہ ٹپیگ آنی ترندی ءَ چہ دوا ءُ درمان کمک، آوار جنگ بوتگیں مردم آناں گس، وردن ءُ وراک ءُ ضروری چیز آنی پجاری کنگ بہ بیت۔ سید یوسف رضا گیلانی ءَ گوشت کہ پاکستان ءِ وڑیں ملک آنی تہ ءَ موسمیاتی بدلی ءِ اثر سک باز گندگ بوھگ ءَ انت ءُ گوستگیں وھد ءِ ھور ءُ جمبر ءِ ٹکر ءِ وڑیں وئیل ایشی ءِ بھر انت۔ آئی ءَ فنکشنل، انٹیگریٹڈ ءُ جدید لائنز ءِ سر ءَ قدرتی آفت آنی گوما گر ءُ چیل بوھگ ءِ واستہ راجی نظام ءِ دوبر جوڑ کنگ ءِ سر ءَ زور پر دات تانکہ آیوکیں وھد ءَ اے وڑیں سانحہ آں گوں جوانیں رنگ ءَ گر ءُ دار کنگ بہ بیت۔ سینیٹ ءِ چیئرمین ءَ گوشت کہ ایوان بالا ھمک مشکلیں وھد ءَ الس ءِ گوما اوشتاتگ ءُ استیں جاور آنی تہ ءَ ھم ما وتی توامیں وسیلگ ءُ اثر ءَ را آماچیں الس ءِ جیڈھ آنی گیواری ءِ واستہ کرد پیلو کنگ ءِ واستہ کارمرد کناں۔