موسمیاتی بدلی انسانیت ءِ ھاترا مزنیں ھترہ یے، احسن اقبال

اسلام آباد۔22جولائی  (اے پی پی): منصوبگ بندی، دیمروئی ءُ ھاسیں گامگیج آنی وفاقی وزیر پروفیسر احسن اقبال ءَ گوشت کہ موسمی بدلی یک گمانے نہ اِنت بلکیں یک ھرابیں راستی یے جوڑ بوتگ، ایشی ءَ چہ سرجمیں انسانیت ءِ آیوکیں وھد ءَ را ھترناک کنگ ءَ اِنت۔ سئے شمبے ءِ روچ ءَ موسمیاتی بدلی ءِ سرھال ءِ سر ءَ یک مراگشے ءَ گوں تران کنان ءَ آئی ءَ گوشت کہ جھان ءِ تک ءَ چاگردی انصاف ءِ دیمروئی وھد ءِ لوٹ اِنت ءُ نوں وھد اتکگ کہ آماچیں دیمروئی کنوکیں ملک وت چہ جھان ءِ طاقت آنی نیمگ ءَ چہ ”ڈو مور“ ءِ لوٹ ءَ بہ کن اَنت، پرچا کہ نوں گیشیں چپ ءُ چاگرد ءِ دعوت دیگ ءِ برابر اِنت۔ منصوبہ بندی ءِ وزیر ءَ گوشت کہ سالی 100ارب ڈالر آماچیں ملک آنی واستہ خیرات نہ انت بلکیں آہانی جائزیں حق انت کہ دیمروئی کتگیں دگنیا ءِ چاگردی وعدہ آنی بنیات انت۔ گلوبل ساؤتھ ءَ چہ مدام گیشتر کار کنگ ءِ لوٹ کنگ بوتگ، نوں وھد اتکگ کہ دیمروئی کتگیں ملک گیشتر کار بہ کن انت۔ دیمروئی کتگیں ملک وتی چاگردی وعدہ آں پیلو بہ کن انت ءُ آماچیں ملک آناں مالی ءُ فنی کمک بہ کن انت۔ آئی ءَ گوشت کہ پاکستان ءَ 7ہزار ءَ چہ گیش گلیشیر است انت کہ آ گوں ترندی ءَ پگھل بوھگ ءَ انت ایشانی شرح 60سال آنی تہ ءَ مستریں کچ ءَ سر بوتگ۔ اے جاور ھال دریائے سندھ ءِ آپی نظام ءَ را مزنیں ھترہ یے جوڑ کنت کہ ملک ءِ 90 درسد کشت ءُ کشاری پیداوار ءِ ریڑھ ءِ ھڈ اِنت۔ احسن اقبال ءَ گوشت کہ 2022 ءِ تباہ کنوکیں سیلاب موسمی بدلی ءِ ھترہ آنی پدریں گواہ انت کہ ایشی ءَ چہ ملک ءِ معیشت، کشت ءُ کشاری، بنیاتی ڈھانچہ ءُ انسانی جان آناں مزنیں تاوان رستگ۔ آئی ءَ گوشت کہ موسمی مٹ ءُ مٹ ءِ آسر ءَ غیر معمولی موسم، زبردستیں ھور، سیلاب، ھشک سالی ءُ وردن ءُ وراک ءِ بحران ءِ وڑیں نوکیں ھترہ دیم ءَ آیگ ءَ انت۔ منصوبگ بندی ءِ وزیر ءَ گوشت کہ حکومت پاکستان وفاقی وزیر ءَ موسمی بدلی ءَ را وتی راجی حکمت عملی ءُ ’’پنچ ءِ رد‘‘ ءِ پالیشی ءِ یک کلیدی ستون جوڑ کتگ، تانکہ چاگردی رکھینگ، پائیدار دیمروئی، قابل تجدید توانائی، آپ ءِ رکھینگ ءُ موسمیاتی ھترہ آں چہ رکھینگ ءِ واستہ موثر گامگیج چست کنگ بہ بنت۔ وفاقی وزیر ءَ میاں اوستمانی براتی ءَ را گوشت کہ نوں وھد اِنت کہ ما چاگردی بحران ءِ گیواری ءِ واستہ یکجائی ءَ پیسلہ بہ کن اَنت، گپ ءُ تران ءَ چہ دیم ءَ بہ رو اَنت ءُ عملی گامگیج بہ زور اَنت۔ پاکستان ءِ وڑیں آماچیں ملک چاگردی رکھینگ ءِ واستہ مالی کمک، ٹیکنیکل کمک ءُ انصاف ءِ سک باز ضلورت ءَ انت۔