وزیر صوبائی منصوبہ بندی  ءُ دیمروئی   میر ظہور احمد بلیدی دیوان   ءِ سروکی ءَ دیمروئی منصوبگ آنی ھوالگ  ءَ دیوان

کوئٹہ۔ 22 جولائی (اے پی پی): صوبائی وزیر منصوبہ بندی ءُ دیمروئی میر ظہور احمد بلیدی ءِ سروکی ءَ دیمروئی منصوبگ آنی بابت ءَ دیوان ءِ برجم دارگ بوت۔ گند ءُ نند ءَ صوبائی وزیر ءَ را تربت شہر ءِ دیمروئی، شہری منصوبہ بندی، بی اینڈ آر ءُ اے دگہ برجاھیں دیمروئی منصوبگ آنی ھوالگ ءَ سرجمیں بریفنگ دیگ بوت۔ گند ءُ نند ءَ تحصیل بلیدہ ءُ ضلع کیچ ءَ جاری منصوبگ آنی انوگیں جاور ھال ، دیم ءَ اتکگیں اڑاند ءُ گیواری نہ بوتگیں جیڈھ آنی سر ءَ ھم گپ ءُ تران کنگ بوت۔ صوبائی وزیر ءَ پنت ءُ شون کت کہ توامیں دیمروئی منصوبگ آنی سر ءَ کار ءِ گام  ترند کنگ بہ بیت ءُ ھمک  قیمت ءَ ایشانی ایر کتگیں وھد ءُ پاس ءِ اندر ءَ سرجمی ءَ را دل یکیمی کنگ بہ بیت۔ آئی ءَ دو گال  آنی تہءَ  گوشت کہ دیمروئی منصوبگ آنی تہ ءَ ھرچ وڑیں لاپرواہی یا رد کنگ سگ ءُ اوپار  کنگ نہ بیت۔ آئی ءَ ڈپٹی کمشنر کیچ ءَ را ھم پنت ءُ شون کت کہ آ توامیں دیمروئی منصوبگ آنی سر ءَ  یک شلی  ءَ چار ءُ تپاسی بہ کنت ءُ بند یا  مھتل  ءُ اوشت ءِ آماچ  بوتگیں منصوبگ آنی ھوالگ ءَ ترندیں رپوٹ پیش بہ کنت۔ صوبائی وزیر ءَ ضلع کیچ ءَ دراجیں بجلی ءِ لوڈ شیڈنگ ءُ ایندگر بجلی ءِ سپلائی ءِ جیڈھ آنی گیواری ءِ سر ءَ ھم گپ ءُ تران کت ءُ اے جیڈھ آنی دائمی گیواری ءِ واستہ یکجاھیں حکمت عملی ءِ زورگ ءِ ضلورت ءِ سر ءَ زور پر دات۔ گند ءُ نند ءَ تربت شہر ءِ دیمروئی منصوبہ ءِ ڈپٹی کمشنر کیچ، بشیر احمد بڑیچ ،  انجینئر قاسم گچکی، محکمہ اربن پلاننگ اینڈ ڈویلپمنٹ  محکمہ ءِ انجینئر عبدالروف بلوچ، بی اینڈ آر ءِ انجینئر عبید شاد، ایکسئین واپڈا ایس ڈی او واپڈا مہیم خان ءُ  دگہ ٹھیکیدار ءُ ھمگرنچیں مردم آں بہر زروی کت۔