انفارمیشن گروپ ءِ ماموران ملک ءِ نظریاتی سیمسر ءِ دیم ءِ محافظ انت، عطا اللہ تارڑ

اسلام آباد۔21جولائی  (اے پی پی): وفاقی وزیر اطلاعات ءُ نشریات عطا اللہ تارڑ ءَ گوشت کہ انفارمیشن گروپ ءِ افسر ملک ءِ نظریاتی سیمسر آنی دیم ءِ محافظ اَنت کہ آ نہ ایوک ءَ حکومت ءِ کار آناں جوانیں رنگ ءَ ترجمانی کن اَنت بلکیں پاکستان ءِ یک جوانیں عکس ءِ دیم ءَ آرگ ءَ ھم جھان ءِ تک ءَ المی کرد پیلو کن اَنت۔ اے ھیالانی درشانی آئی ءَ انفارمیشن سروسز اکیڈمی ءَ 41می اسپیشلائزڈ ٹریننگ پروگرام ءِ پاس آؤٹ مراگش ءَ گوں تران کنان ءَ کت۔ وفاقی وزیر ءَ گوشت کہ آزمائشی آناں گوں گند ءُ نند کنگ فخر ءِ گپ اِنت، راجی ھزمت ءِ نوکیں آسراتی اے ورنائیں افسر آنی گوما ھمگرنچ اَنت۔ آئی ءَ گوشت کہ انفارمیشن گروپ ءَ ھمک دور ءَ ملک ءِ دیمروئی، نظریاتی سیم سر آنی رکھینگ ءُ راجی یکوئی ءِ جوڑ کنگ ءَ ھاسیں کرد پیلو کتگ۔ عطا اللہ تارڑ ءَ گوشت کہ گوستگیں ھند ءُ پاکستان ءِ جیڈھ ءَ پاکستان ءَ را ھاسیں برتری رستگ، ءُ اے سوبمندی ءِ تہ ءَ انفارمیشن گروپ ءُ وزارت ءِ اھوالکاری ءِ کرد ءِ سر ءَ ھم پخر اِنت۔ آئی ئَ گوشت کہ جنگ ئِ اولی محاذ انفارمیشن فرنٹ بوتگ ءُ ما ایشی ئَ یک چیلنج ئِ رنگ ئَ من اِتگ۔ انفارمیشن گروپ ءُ وزارت انفارمیشن ءَ انٹیلی جنس ءِ محاذ ءِ سر ءَ دراجیں کرد پیلو کتگ کہ ایشی ءَ را مزنیں تک ءَ ستا دیگ بوتگ۔ آئی ءَ گوشت کہ انفارمیشن ءِ شوبگ ءَ 24/7 یا شپ ءُ روچ نیست، اے یک برجاھیں ذمہ واری یے کہ ایشی ءَ را راجی فرض ءِ رنگ ءَ پیلو کنگ لوٹ ایت۔ وفاقی وزیر ءَ گوشت کہ ما وزارت ءِ اھوالکاری ءِ جتا جتائیں ادارگ آنی تہ ءَ اصلاحات ءُ نوآبادیاتی آورتگ تانکہ آ بدل بوھوکیں لوٹ آنی گوما ھمگرنچ بہ بنت۔ آئی ءَ گوشت کہ ڈیجیٹل میڈیا ونگ ءَ را ڈیجیٹل کمیونیکیشن ڈیپارٹمنٹ ءَ مٹ کنگ بہ بیت۔ آئی ءَ گوشت کہ انفارمیشن یک انچیں شوبگ اِنت کہ ایشی ءِ تہ ءَ چہ مارا زندمان ءِ ھمک تک ءُ پھنات ءُ ریاست ءِ ھمک کار آنی تہ ءَ گہتریں کارکردگی ءِ امیت اِنت، مئے افسر سرجمیں دگنیا ءَ تعینات اَنت، مئے افسر ھمک وزارت ءُ ڈویژن ءَ ساڑی اَنت، آ پاکستان ءَ را جوانیں ھزمت کنگ ءَ اَنت۔ آئی ئَ گوشت کہ سوبمندی یکجائی ءُ ھمکوپگی ئَ چہ کئیت۔ وفاقی وزیر ءَ گوشت کہ ما وت ءَ را ڈیجیٹل میڈیا ءِ دور ءَ گوں ھمگرنچ کتگ، ما روایتی میڈیا ءَ چہ میڈیا ءِ نوکیں پڑ ءَ مزنیں بدلی کتگ۔ ادا ھستیں سینئر افسر ڈیجیٹل میڈیا ءِ نیمگ ءَ شتگ انت، اے ھما بدلی انت کہ سینئراں مارا وھد ءِ گوزگ ءَ گوں وانینتگ، پمیشکا شمئے ءُ شمئے سینئر آنی نیام ءَ یک مھکمیں سیادی یے بہ بیت۔ وفاقی وزیر عطا اللہ تارڑ ءَ گوشت کہ سکیں تربیتی عمل ءَ چہ گوزگ ءَ پد انفارمیشن افسر آناں عملی کار کنگ ءَ چہ بازیں چیزے دربرتگ۔ اے ڈیجیٹل دور ءَ گوں وت ءَ نوکیں چیلنج ھم آورتگ اَنت۔ مئے مین اسٹریم میڈیا ءَ پرنٹ میڈیا ءَ چہ الیکٹرانک میڈیا ءَ یک منظمیں تدریجی عملے ءَ چہ گوستگ۔ وھدے کہ پاکستان ءَ الیکٹرانک میڈیا ءِ دیم ءَ آرگ بوت ءُ رابطہ ءِ نوکیں وسیلہ ءِ رنگ ءَ گندگ بوت گڑا اے یک ارتقائی عملے ات کہ آئی ءَ گوں وت ءَ یک سرجمیں میکانزم ءِ سیٹ ءِ زرتگ ات کہ ایشی ءِ تہا مواد ءِ کنٹرول، ادارہ جاتی بورڈ، ادارہ جات ءِ پالیسی ءُ ھاسیں رہبند ھوار اتنت۔ آئی ءَ گوشت کہ ڈیجیٹل میڈیا ءَ را ھچ وڑیں کوھنیں ادارگ یا کوھنیں طریقہ کار ءَ چہ دیمروئی نہ کتگ۔ ڈیجیٹل میڈیا ءِ وتی وتی تب ءُ مئیل اَنت بلے چیا کہ اے یک انچیں ھستی یے کہ وتی وس ءَ دیم ءَ اتکگ، پمیشکا اے گوں وت ءَ بازیں چیلنج ھم کشّ اِیت۔ عطا اللہ تارڑ ءَ گوشت کہ نوکیں دور ءِ اے چیلنج آں گوں گر ءُ چیل بوھگ ءِ واستہ شمارا چہ مزنیں امیت است انت۔ ورلڈ اکنامک فورم ءِ حوالہ ءَ آئی ءَ گوشت کہ ورلڈ اکنامک فورم ءَ وھدے جھان ءِ سروک آناں جست کنگ بوت کہ مئے وھد ءِ مستریں ھترہ چی اِنت گڈا آھاں ایٹمی جنگ ءُ موسمی مٹ ءُ بدلی ءِ نام مزنیں ھترہ ءِ نام ءَ نہ گپتگ بلکیں گوشت کہ مئے وھد ءِ مستریں چیلنج جعلی ھال، پروپیگنڈا ءُ ردیں ھال اَنت۔ وفاقی وزیر ءِ اھوالکاری ءَ گوشت کہ اھوالکاری سروس ءِ تہ ءَ گمنامیں بامرد آنی یک دراجیں لسٹ است انت ایشاں ملک ءِ واستہ بہادری کار کتگ۔ انوگیں وھد ءَ ما یک انچیں سلسلہ یے بندات کتگ کہ ایشی ءِ وسیلگ ءَ اے گمنامیں بامرد آنی ھزمت آناں کہ آیاں وتی زند ءِ دہائیاں پاکستان ءِ ھزمت ءَ ندر کتگ آھاں شرپ ءُ شان دیگ بیت۔ آئی ءَ گوشت کہ انفارمیشن گروپ ءِ افسر آنی بھرتی ءِ اے بنداتی پڑ سک باز المی اِنت، منی دعا اِنت کہ شما نہ ایوک ءَ اے شوبگ ءِ واستہ بلکیں ملک ءِ واستہ ھمے آسراتی ءَ سر بہ بئے، کہ شمئے سینئراں رستگ اَنت۔ آئی ءَ گوشت کہ گوستگیں سال آنی تہ ءَ انفارمیشن گروپ ءِ افسر آنی کرد ءَ را مدام گیش کنگ بوھگ ءَ اِنت۔ بازیں شرپ ءُ شرپ گوں شما ھمگرنچ اَنت۔ تو ھما مشعل ءَ دست ءَ ئے کہ تئی پیریناں تئی سپرد کتگ۔ وت ءَ ، وتی ادارہ ءَ ءُ وتی ڈیھ ءَ نام جوڑ بکن پرچہ کہ پاکستان ءِ نظریاتی نگہبان ءِ بستار ءَ شمئے سرا مزنیں ذمہ واری یے گون اِنت۔ اے زمہ واری ءَ گوں فخر ءُ شان ءَ پیلو کن اِت ءُ ملک ءُ راج ءِ ھزمت ءَ بکن اِت۔ بازیں مردماں اے موہ نہ رسیت پمیشکا وت ءَ وش نصیب لیک کہ اللہ تعالیٰ ءَ ترا اے مزنیں زمہ واری داتگ۔ وفاقی وزیر ءَ مراگش ءِ گڈ ءَ شریکیں مردم آناں وتی نیکیں واھگ آنی درشانی کت۔