بے نظیر کفالت پروگرام ءِ چیر دستی ءَ پنجاب ءِ 4.7 ملین مستحقیں ھاندان ءَ را کمک دیگ بوھگ ءَ انت، بنجاھی وزیر عمران احمد شاہ

لاہور۔17جولائی (اے پی پی):بنجاھی وزیر گریبی ءِ ھلاسی ءُ چاگردی رکھینگ عمران احمد شاہ ءَ پنچ شمبے ءِ روچ ءَ بے نظیر کفالت پروگرام ءِ مرکزی زونل آفس لاہور ءِ تر ءُ تاب کتگ۔ اے موہ ءِ سر ءَ آئی ءَ برجاھیں گامگیج آنی سر ءَ چار ءُ تپاسی کت ءُ شفافیت، احتساب ءُ موثر سروس ڈیلیوری ءِ واستہ حکومت ءِ عزم ءِ سر ءَ پدا زور دات۔ بنجاھی وزیر ءِ کارگس ءَ سر بوھگ ءِ سر ءَ ڈائریکٹر جنرل بی آئی ایس پی پنجاب محمد ناصر خلیلی ءَ مزنیں وش اتک کت۔ ڈی جی بی آئی ایس پی پنجاب ءَ سرجمیں صوبگ ءَ بی آئی ایس پی ءِ چست ءُ ایر آنی بابت ءَ سرجمیں بریفنگ دات۔ آئی ءَ گوشت کہ اے وھد ءَ بے نظیر کفلت پروگرام ءِ چیر دستی ءَ پنجاب ءِ نزیک ءَ 4.7ملین مستحقیں ھاندان آناں بے شرطیں مالی کمک پجاری کنگ بوھگ ءَ انت۔ بریفنگ ءِ ساھت ءَ مشروط مالی کمک ءِ پروگرام بے نظیر طوالت وزیف ءِ اثر ءِ سر ءَ ھم چمشانک دیگ بوت کہ ایشی ءِ چیر دستی ءَ لاکھوں زھگ آناں اسکول آنی تہ ءَ داخل کنگ بوتگ ءُ حاضری ءَ را آسراتی دیگ بوتگ۔ اے پروگرام ءِ بندات ءَ چہ سرجمیں پنجاب ءَ اے پروگرام ءِ چیر دستی ءَ 8.2 ملین ءَ چہ گیش زھگ داخلہ زورگ بوتگ اَنت کہ اے چہ نزوریں تبک ءَ را وانگ ءُ زانگ ءِ آسراتی ءِ ھاترا مزنیں گامگیج اِنت۔ ایشی ءَ ابید بے نظیر کفالت پروگرام ھم ھاسیں کرد پیلو کنگ ءَ اِنت، ایشی ءَ چہ حاملہ ءُ شیر ءِ ورگ ءِ زالبول ءُ نادراھی ءِ آماچیں زھگ آنی وردن ءِ لوٹ آناں پیلو کنگ ءِ آسراتی رستگ ءُ ملک ءَ نادراھی ءِ ھلاپ ءَ یک جوانیں وسیلگ اِنت۔ بنجاھی وزیر ءَ مستفید بوؤکیں مردم آنی شکایت آنی وھد ءُ پاس ءِ سر ءَ جوانیں رنگ ءَ گیواری ءِ ارزشت ءِ سر ءَ زور پر دات ءُ اپسرگ آناں پنت ءُ شون کت کہ آ رجسٹریشن ءُ شکایت آناں گیواری ءِ نظام ءَ را گیش مھکم بہ کن اَنت تانکہ الس ءِ جیڈھ آناں اولیت ءِ سر ءَ گیش ءُ گیوار کنگ بہ بیت۔ آئی ءَ بی آئی ایس پی پنجاب ٹیم ءِ کوشست آں ھم ساڑات۔ بنجاھی وزیر ءَ نادیدگیں ہنرمندیں پروگرام ءِ وسیلگ ءَ ورنا آناں بااختیار جوڑ کنگ ءِ سر ءَ ھم زور پر دات ءُ گوشت کہ ہنرمندیں تکنیکی تربیت پروگرام ءِ وسیلگ ءَ بی آئی ایس پی نہ ایوک ءَ وتی فائدگ مند آناں بلکن ءَ آوانی آیوکیں نسل آناں ھم شریں روزگار ءِ موہ پجارینگ ءِ کوشست ءَ کنگ ءَ اِنت تانکہ آ اقتصادی رد ءَ وت واجہ بہ بنت۔ اے موہ ءِ سر ءَ ڈائریکٹر جنرل آرگنائزیشن مینجمنٹ بی آئی ایس پی ہیڈکوارٹرز فواد نواز کیانی، ڈائریکٹر سنٹرل زون وقار النسا، ڈپٹی ڈائریکٹرز ءُ اسسٹنٹ ڈائریکٹرز ھم ھوار اتنت۔