ازبکستان ءِ سفیر ءَ وفاقی وزیر چوہدری سالک حسین ءَ گوں گند ءُ نند کت، ازبکستان ءَ پاکستانی آناں روزگار ءِ موہ پجارینگ ءِ ھوالگ ءَ جتا جتائیں تجویز آنی سر ءَ گپ ءُ تران

اسلام آباد۔15جولائی (اے پی پی):اوورسیز پاکستانی آنی وفاقی وزیر چوہدری سالق حسین ءَ پاکستان ءَ ازبکستان ءِ سفیر علیشر تختیف ءَ گوں گند ءُ نند کت۔ گند ءُ نند ءَ ازبکستان ءَ پاکستانی آں روزگار ءِ موہ پجاری ءِ ھوالگ ءَ جتاجتائیں تجویز آنی سر ءَ ھیال ریچی کنگ بوت۔ وزارت اوورسیز پاکستانی ءُ انسانی وسائل ءِ دیمروئی ءِ نیمگ ءَ جاڑی بوتگیں پریس ریلیز ءِ رد ءَ ازبکستان ءِ سفیر علیشر تختیف ءَ گوشت کہ ازبکستان ءُ پاکستان ءِ نیام ءَ راجدپتری، مذھبی، دود ءُ ربیدگی ءُ بیپاری سیادی است انت۔ ازبکستان ءُ پاکستان ءِ نیام ءَ انفارمیشن ٹیکنالوجی، دوا ءُ درمان، کشت ءُ کشاری، ءُ لیبر ءِ پڑ ءَ کمک ءِ مزنیں موہ است انت۔ مشترکہ کمک ءَ چہ دمگ ءِ اقتصادی وشھالی ءَ را دیم ءَ برگ ءُ دوئیں ملک آنی الس آنی واستہ نوکیں روزگار ءِ موہ پیداک کنگ بوت کنت۔ وفاقی وزیر چوہدری سالک حسین ءَ گوشت کہ پاکستان ءَ جنوبی کوریا ءُ جاپان ءِ گوما لیبر سپلائی ءِ ھوالگ ءَ پائلٹ پروجیکٹ بندات کتگ ایشی ءِ آسر سک باز جوان انت۔ ھمے رنگ ءَ نوں آ ازبکستان ءِ گوما پاکستانی آناں روزگار ءِ پھجارینگ ءِ سر ءَ پائلٹ پروجیکٹ ءِ بندات کنگ ءِ جھد ءَ اَنت۔ 12 ملین ءَ چہ گیش پاکستانی روزگار ءِ واستہ درملک ءَ نندوک انت ۔ پاکستان اے وھد ءَ زرّ دیم دیگ ءِ رد ءَ دگنیا ءِ اولی 10 ملک آنی تہ ءَ ھوار اِنت۔ مالی سال 2025 ءِ تہ ءَ درملکیں پاکستانی آں پاکستان ءَ ریکارڈ 38.8ارب ڈالر ءِ زرّ دیم داتگ۔ آیوکیں 2 ءُ 3 سالانی تہ ءَ زرّ ءِ دیم دیگ ءِ کساس 50 ارب ڈالر ءَ سر بوھگ ءِ گمان اِنت۔ مقصد ایش انت کہ آ دیمتر ءِ پڑ ءَ سر بہ بیت۔ گند ءُ نند ءَ ازبکستان ءَ پاکستانی آناں روزگار ءِ موہ پجاری ءِ واستہ یکجائی ورکنگ گلے ءِ جوڑ کنگ ءِ سر ءَ تپاک کنگ بوت۔