پاکستان وتی درستیں ھمساھگ آنی گوما امن ءِ سیادی ءِ لوٹ ءَ کنت، شنگھائی کمکی گل سیاسی، سفارتی ءُ اقتصادی ارزشت ءِ یک ھاسیں پلیٹ فارمے، نائب مزن وزیر محمد اسحاق ڈار ایس سی او ءِ دری کارانی کونسل ءِ دیوان ءَ گوں تران

تیانجن۔15جولائی (اے پی پی):نائب مزن وزیر ءُ دری کارانی وزیر سینیٹر محمد اسحاق ڈار ءَ گوشت کہ پاکستان وتی توامیں ھمساھگیں ملک آنی گوما ایمنی ءِ سیادی ءِ لوٹ ءَ کنت، اے دمگ ءَ برجائی ءُ وت مہ وتی کمک ءِ دیمروئی ءِ واستہ المی اِنت۔ پاکستان شنگھائی کوآپریشن آرگنائزیشن ءَ را سیاسی، سفارتی ءُ معاشی ارزشت ءِ یک ھاسیں پلیٹ فارم ءِ رنگ ءَ چاریت۔ سئے شمبے ءِ روچ ءَ چین ءِ شہر تیانجن ءَ شنگھائی کمکی گل ءِ دری کارانی کونسل ءِ دیوان ءَ گوں تران کنان ءَ آئی ءَ گوشت کہ من ءَ اے ھاسیں دیوان ءَ پاکستان ءِ نمائندگی کنگ ءِ سر ءَ فخر اِنت۔ آئی ءَ ایس سی او ءِ مول ءُ مراد آنی سر ءَ پاکستان ءِ بے دروریں جزم ءِ سر ءَ زور پر دات ءُ دمگ ءِ یکجائی توانائی ءَ را سرجمی ءَ کارمرد کنگ، دمگی رابطہ کاری ءَ را گیش کنگ، یکجائی وشھالی، برجمیں دیمروئی ءُ برجمیں امن ءِ واستہ گامگیج آناں دیم ءَ برگ ءِ لوٹ کت۔ آئی ءَ گوشت کہ پاکستان ءَ دیریں جیڈھ آناں گیش ءُ گیوار کنگ ءُ دیم پہ دیمیں سیاست ءُ دوٹولی ءَ چہ بچگ ءِ واستہ میاں اوستمانی کانود آنی سر ءَ پابندی کنگ ءُ اقوام متحدہ ءِ سلامتی کونسل ءِ ھمگرنچیں قرارداد آنی سر ءَ عمل کنگ ءِ سر ءَ زور پر دات۔ نائب مزن وزیر اسحاق ڈار ءَ گوشت کہ پاکستان ایس سی او ءَ را سیاسی، سفارتی ءُ معاشی ارزشت ءِ گوما یک ھاسیں پلیٹ فارم ءِ رنگ ءَ چار ایت۔ آئی ءَ گوشت کہ چین ءِ براتیں الس ءُ سروکی ءِ دل ءِ جہلانکی ءَ چہ منت وار آں کہ آہاں مارا وشیں شہر تیانجن ءَ میزبانی کتگ۔ ما چین ءِ گہتریں جزمءُ اے سال ءَ ایس سی او ءِ مھکم کنگ ءِ تہ ءَ آئی ءِ کرد ءِ ستا ءَ کن ایں ۔ نائب مزن وزیر ءُ دری کارانی وزیر ءَ گوشت کہ ما بیلاروس ءِ سرجمیں باسک بوھگ ءِ سر ءَ مبارک بات ءُ وش اتک کن ایں ۔ آئی ءَ گوشت کہ جھان ءِ چیلنج آنی اے دور ءَ شنگھائی کوآپریشن آرگنائزیشن یک مھکمیں قوت ءِ رنگ ءَ دیم ءَ اتکگ، ایشی ءِ سرجمیں رھبند ءِ تہ ءَ ملک آنی حاکمیت ءُ جیڈھ آناں پرامن گیواری ءِ سر ءَ زور دیگ بیت۔ ایس سی او ءِ اجماع، دیمروئی ءُ یکے دومی ءِ احترام ءِ جزم یک شریں ءُ برابریں دنیا ءِ جوڑ کنگ ءِ ھاتر ءَ اُمیت ءِ شعاع اِنت۔ نائب مزن وزیر ءُ وزیر ءِ درئی کار ءَ گوشت کہ پاکستان اقوام متحدہ ءِ منشور ءُ شنگھائی کوآپریشن آرگنائزیشن ءِ اصول آنی سر ءَ پابند بوھگ ءِ واستہ وتی جزم ءَ را نوک کنت، مارا امن ءُ ایمنی ءِ واستہ عدم زوراکی، تہی کار آنی تہ ءَ مداخلت نہ کنگ ءُ زور ءِ کارمرد کنگ ءَ چہ رکگ ءِ اصول آنی سر ءَ ایمان اِنت۔ نائب مزن وزیر ءَ گوشت کہ ما دیریں وھد ءَ چہ استیں جیڈھ آناں ایمنی ءِ گوما گیش ءُ گیوار کنگ ءِ سر ءَ زور دیگ ءَ ایں، ایشی ءَ را میاں اوستمانی کانود، انصاف ءُ ایمانداری ءِ بنیاد ءَ گیش ءُ گیوار کنگ بہ بیت۔ آئی ءَ گوشت کہ پاکستان ءَ زوراکی ءَ را پالیسی ءِ وسیلگ ءِ رنگ ءَ کارمرد کنگ ءِ رجحان آنی سر ءَ سک دلپروش اِنت۔ آئی ءَ گوشت کہ ما ایران ءِ سر ءَ اسرائیل ءِ بے جاہیں زوراکی ءُ امریکی ایٹمی آسراتی آنی سر ءَ اُرش ءَ را سک مذمت کتگ۔ شنگھائی تعاون ءِ گل ءِ باسکیں ملکانی ھلاپ ءَ اے وڑیں ناجائزیں کارروائی نا منّگ بنت۔اسحاق ڈار ءَ غزہ ءَ اسرائیل ءِ زلم ءُ زوراکی ءُ برجاھیں انسانی بحران ءِ زوت بند کنگ ءِ ضلورت ءِ سر ءَ زور پر دات ءُ گوشت کہ فلسطین ءِ جیڑھ ءِ یکیں گیواری دو ریاستی فارمولہ اِنت کہ ایشی ءِ تہ ءَ 1967 ءِ سیمسر آنی سر ءَ یک آجوئیں فلسطینی ریاست ءِ جوڑ کنگ ھوار اِنت۔ آئی ءَ گوشت کہ جھیڑوی دمگ آنی جاور ھال ءِ یک نیمگی ءُناجائزیں بدلی ءِ مذمت کنگ بہ بیت۔ وزیر ءِ درئی کار ءَ نمائندہ آنی دلگوشی ءَ گوں گوشت کہ پاکستان وتی درستیں ھمساھگیں ملک آنی گوما امن ءُ ایمنی ءِ واھشت مند اِنت، البت گوستگیں سئے ماھ آنی تہ ءَ جنوبی ایشیا ءَ انتہائی پریشان کنوکیں وئیل بوتگ اَنت۔ ما گپ ءُ تران ءُ سفارتکاری ءِ وسیلگ ءَ جیڑہانی گیش ءُ گیوار ءِ سر ءَ باور کن ایں ۔ جنوبی ایشیا ءَ امن ءِ ھاتر ءَ سرجمیں گپ ءُ تران ءِ بندات ناگزیر اِنت۔ اسحاق ڈار ءَ گوشت کہ 22 اپریل 2025ءَ پد ءِ وئیل آناں جنوبی ایشیا ءِ سیاست ءِ تہ ءَ یک ھاسیں گپ ءِ سر ءَ چمشانک داتگ کہ دمگ ءَ برجمیں امن ءِ واستہ دیریں گیواری نہ بوتگیں جیڈھ آنی پرامنیں رنگ ءَ گیواری المی اِنت۔ شنگھائی کوآپریشن آرگنائزیشن ءِ گیش بوھوکیں ارزشت ءَ را پدر کنان ءَ وزیر ءِ درئی کار اسحاق ڈار ءَ گوشت کہ ما تنظیم ءِ نوکیں لوٹ آنی رد ءَ اصلاحات ءِ حمایت کن ایں، سیکورٹی شوبگ ءَ چار نوکیں مراگش آنی جوڑیشت ءَ چہ کمک ءَ را گیش مھکم بیت۔ آئی ءَ گوشت کہ ما انگریزی ءَ را تنظیم ءِ سیمی سرکاری زبان جوڑ کنگ ءِ پیشکش ءِ حمایت کن ایں ۔ آئی ءَ گوشت کہ اوگانستان ءَ پائیدار امن مئے یکجائی واھشت اِنت، ایشی ءِ تہ ءَ ایس سی او اوگانستان رابطہ گروپ ءِ زندگ کنگ اے رد ءَ یک جوانیں پلیٹ فارم ءِ ثابت بوت کنت۔ نائب مزن وزیر ءُ وزیر ءِ درئی کار ءَ گوشت کہ ناشرکاری انسانیت ءِ واستہ یکجائی ھوپ انت، ایشی ءِ ھلاپ ءَ مارا یکجائی ءَ کار کنگی انت۔ آئی ءَ گوشت کہ چین پاکستان اقتصادی راہداری شنگھائی کوآپریشن آرگنائزیشن ءِ وژن ءَ را گیش مھکم کنت۔ نائب مزن وزیر ءَ گوشت کہ مارا راجی کرنسی آنی کارمردی ءُ تجارتی کمک ءَ را دیم ءَ برگ لوٹ ایت، پاکستان ءَ گریبی ءِ ھلاسی ءِ ھوالگ ءَ شنگھائی کمکی گل ءِ ھاسیں کارگس ءِ دائمی چیئرمینی ءِ سر ءَ فخر اِنت۔ وزیر ءِ درئی کار ءَ گوشت کہ مارا موسمیاتی مٹ ءُ بدلی ءِ ھوپ ءَ گوں گر ءُ چیل بوھگ ءِ واستہ یکجائی گامگیج چست کنگی انت۔ من راجی کوآرڈینیٹر ءُ ماہرین آنی محنت ءُ لگن ءَ را خراج تحسین پیش کناں ءُ پاکستان ءِ جزم ءَ را نوک کناں کہ ما ”شانگھائی روح“ ءِ قدر آنی چیر دستی ءَ امن، وشھالی ءُ برجائی ءِ واستہ یکجاہ کار کن ایں ۔ بیا اِت تعاون ءُ مشترکہ دیمروئی ءِ راہ ءَ رواں ۔ نائب مزن وزیر ءُ دری کارانی وزیر اسحاق ڈار ءَ اے موہ ءِ سر ءَ ایس سی او ءِ ایندگر باسکیں ملک آنی دری کارانی وزیر آنی گوما ھم دو نیمگی گند ءُ نند کتگ ایشی ءِ تہ ءَ ایران ءِ دری کارانی وزیر ءِ گوما گپ ءُ تران ھم ھوار بوتگ ایشی ءِ تہ ءَ آئی ءَ دمگی امن ءُ ایمنی ءِ واستہ پاکستان ءِ مھکمیں کمک ءِ یک رندے پدر کتگ۔ بیلاروس ءِ ایس سی او ءِ چیر دستی ءَ یکجائی بارڈر سروسز آپریشن ”یکجہتی 2025“ ءَ بھر زوری ءِ ھم جار جنگ بوتگ کہ ایشی ءَ چہ اے گل ءِ گوما آئی ءِ کمک گیش مھکم بیت۔ اے گامگیج پاکستان ءِ گوما ایس سی او ءِ گوما کمک ءُ دمگ ءَ امن ءُ دیمروئی ءِ واستہ چست کتگیں گامگیج آنی عکس انت۔