وفاقی داخلہ ءِ وزیر محسن نقوی ءَ ایران ءِ صدر مسعود پزشکیان ءَ گوں گند ءُ نند کتگ، وت مہ وتی مفاد، پاک ایران ءِ سیادی ءُ دو نیمگی کمک ءِ جیڈھ آنی سر ءَ گپ ءُ تران

تہران ۔15جولائی (اے پی پی):وفاقی تہی کارانی وزیر محسن نقوی ءَ گوں ایران ءِ صدر مسعود پزشکیان ءَ ھاسیں گند ءُ نند کت ایشی ءِ تہ ءَ وت مہ وتی مفاد، پاک ایران ءِ سیادی ءُ دو نیمگی کمک ءِ جیڈھ آنی سر ءَ گپ ءُ تران کت۔ وزارت داخلہ ءِ نیمگ ءَ چہ جاڑی بوتگیں بیان ءِ رد ءَ وزیر داخلہ محسن نقوی ءَ ایران ءِ صدر مسعود پزشکیان ءَ را جنگ ءِ تہ ءَ مزنیں سوبمندی ءِ سر ءَ مبارک بات داتگ۔ وزیر داخلہ ءَ گوشت کہ ایران ءِ سروک ءَ ھوار سرجمیں راج ءَ گوں جزم ءَ تجاوز ءِ جنگ کتگ۔ محسن نقوی ءَ گوشت کہ ایران ءِ سروک آیت اللہ خامنہ ای ءِ زانتکاریں سروکی ءُ آئی ءِ جوانیں حکمت عملی ءَ جنگ ءِ تہ ءَ فیصلہ کنوکیں کرد پیلو کتگ کہ اے جنگ ءَ را مسلمان امت ءِ واستہ فخر ءِ وسیلگ اِنت۔ تہی کارانی وزیر ءَ گوشت کہ پاکستان ءَ ھمک فورم ءَ ایران ءِ سر ءَ اُرش ءَ را تچکیں رنگ ءَ مذمت کتگ ۔ محسن نقوی ءَ گشتگ کہ پاکستانی پارلیمنٹ اولی مردم انت کہ آئی ءَ ایران ءِ سرا جنگ ءِ مسلط کنگ ءِ مذمت ءِ قرارداد منظور کتگ ءُ ایران ءِ وت دیمپانی ءِ جائزیں حق ءِ حمایت کتگ۔ تہی کارانی وزیر محسن نقوی ءَ مزن وزیر شہباز شریف ءِ نیمگ ءَ ایران ءِ صدر مسعود پزشکیان ءَ را نیکیں واھشت ءُ احترام ءِ کلوہ دات۔ ایران ءِ صدر مسعود پزشکیان ءَ گشتگ کہ آ پاکستان ءِ گوما وتی سیادی ءَ سک باز ارزشت ءَ دنت ۔ آئی ءَ گوشت کہ جنگ ءِ وھد ءَ پاکستان ءَ منی چونیں کمک کتگ من کدی شموشت نہ کناں۔ ایران ءِ صدر مسعود پزشکیان ءَ گشتگ کہ صیہونی سرکار ءِ کوشست انت کہ مسلمان ملکانی نیام ءَ تپاکی ءُ نزوری پیداک کنگ بہ بیت، اسلامی ملکانی نیام ءَ یکوئی ءُ اتحاد ناگزیر انت۔ ایران ءِ صدر مسعود پزشکیان ءَ گشتگ اگاں مسلمانیں حکومت اسلامی یکوئی ءِ ارزشت ءَ سرجمی ءَ سرپد بہ بنت گڈا آ صیہونی حکومت ءِ حلاف ءَ یک مشترکہ محاذے جوڑ کت کن انت۔ صدر مسعود پزشکیان ءَ ایران ءُ پاکستان ءِ استیں دو نیمگی سیادی آنی سر ءَ دل یکیمی ءِ درشان کت۔ ایران ءِ صدر ءَ دوئیں ملک آنی نیام ءَ سرجمیں کمک ءِ تہ ءَ گیشی ءِ واستہ سفارتی تبادلہ ءُ جوڑیشت گپ ءُ تران ءِ ارزشت ءِ سر ءَ زور پر دات۔ ایران ءِ صدر ءَ اسرائیل ءِ مسلطیں جنگ ءِ وھد ءَ پاکستان ءِ دلجمیں کمک ءِ سر ءَ شگر ءُ منت گپت۔ آئی ءَ گوشت کہ دوئیں ملک آنی تہ ءَ کمک ءِ دیمروئی ءِ واستہ بے دروریں موہ است انت۔ اے موہ ءِ سر ءَ ایران ءِ تہی کارانی وزیر سکندر مومنی ، ایران ءِ صدر ءِ ھاسیں کمکار ، پاکستان ءَ ایران ءِ سفیر ءُ ایران ءَ پاکستان ءِ سفیر ھم ھوار بوتگ اَنت۔